Владыко Вседержителю, Святый Царю, наказуяй и не умерщвляяй, утверждаяй низпадающия, возводяй низверженныя, телесныя человеков скорби исправляя и, молимся Тебе, Боже наш, раба Твоя (имя), немощствующа посети милостию Твоею, прости ей всякое согрешение вольное и невольное. Ей, Господи, врачебную Твою силу с небесе низпосли, прикоснися телеси, угаси огневицу, укроти страсть и всякую немощь таящуюся, буди врач рабы Твоей (имя), воздвигни её от одра болезненнаго, и от ложа озлобления цела и всесовершенна, даруй ей Церкви Твоей благоугождающа и творяща волю Твою, Твое бо есть, еже миловати и спасати ны, Боже наш, и Тебе славу возсылаем. Отцу, и Сыну, и Святому Духу, ныне и присно, и во веки веков, аминь.
Иная молитва к Господу
Владыка Вседержителю, Врачу душ и телес наших, смиряяй и возносяй, наказуяй и паки исцеляяй! Рабу Твою (имя) немощствующа посети и исцели её, возставив от одра и немощи. Запрети духу немощи, остави от неё всяку язву, всяку болезнь, и еже есть в ней согрешение или беззаконие, ослаби, остави, прости Твоего ради человеколюбия. Ей, Господи, пощади создание Твое во Христе Иисусе, Господе нашем, с Ним же благословен еси, и со Пресвятым, и Благим, и Животворящим Твоим Духом, ныне и присно и во веки веков. Аминь.
Молитва Иисусу Христу
Господи Иисусе Христе! Сыне Божий! Огради рабу Божию (имя) святыми Твоими ангелами и молитвами Всепречистыя Владычицы нашия Богородицы и приснодевы Марии, силою Честного и Животворящего Креста, святого архистратига Божия Михаила и прочих небесных сил бесплотных, святого пророка и Предтечи крестителя Господня Иоанна Богослова, священномученика Киприана и мученицы Иустины, святителя Николая архиепископа Мир Ликийских Чудотворца, святителя Никиты Новгородского, преподобного Сергия и Никона, игуменов Радонежских, преподобного Серафима Саровского чудотворца, святых мучениц Веры, Надежды, Любови и матери их Софии, святых и праведных Богоотец Иоакима и Анны, и всех святых Твоих, помощи нам, недостойным, рабу Божию (имя). Избави её от всех навет вражеских, от всякого зла, колдовства, чародейства и лукавых человек, да не возмогут они причинить ей никоего зла. Господи, светом Твоего сияния, сохрани рабу Божию (имя) на утро, на день, на вечер, на сон грядущий, и силою благодати Твоея отврати и удали всякие злые нечестия, действуемыя по наущению диавола. Кто думал и делал, на рабу Божию (имя) верни их зло обратно, в преисподнюю, яко Твое есть Царствие и Сила, и Слава Отца, и Сына, и Святого Духа! Аминь.
Символ Веры
Верую во единаго Бога Отца, Вседержителя, Творца небу и земли, видимым же всем и невидимым. И во единаго Господа Иисуса Христа, Сына Божия, Единороднаго, Иже от Отца рожденнаго прежде всех век; Света от Света, Бога истинна от Бога истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес, и воплотившагося от Духа Свята и Марии Девы, и вочеловечшася. Распятаго же за ны при Понтийстем Пилате, и страдавша, и погребенна. И воскресшаго в третий день по Писанием. И возшедшаго на небеса, и седяща одесную Отца. И паки грядущаго со славою судити живым и мёртвым, Его же Царствию не будет конца. И в Духа Святаго, Господа Животворящаго, Иже от Отца исходящаго, Иже со Отцем и Сыном спокланяема и сславима, глаголавшаго пророки. Во едину Святую, Соборную и Апостольскую Церковь. Исповедую едино крещение во оставление грехов. Чаю воскресения мертвых, и жизни будущаго века. Аминь.
Молитва Кресту
Да воскреснет Бог, и расточатся врази Его, и да бежат от лица Его ненавидящий Его. Яко исчезает дым, да исчезнут; яко тает воск от лица огня, тако да погибнут беси от лица любящих Бога и знаменующихся крестным знамением, и в веселии глаголющих: радуйся, Пречестный и Животворящий Кресте Господень, прогоняй беси силою на тебе пропятого Господа нашего Иисуса Христа, во ад сшедшего и поправщаго силу диавола, и даровавшего нам тебя, Крест Свой Честный на прогнание всякого супостата. О, Пречестный и Животворящий Кресте Господень! Помогай ми со Святою Госпожею Девою Богородицею и со всеми святыми во веки. Аминь. (Осеняйте себя крестным знамением.)
Псалом 50
Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя; яко беззаконие мое аз знаю, и грех мой предо мною есть выну. Тебе Единому согреших и лукавое пред Тобою сотворих, яко да оправдишися во словесех Твоих, и победиши внегда судити Ти. Се бо, в беззакониях зачат есмь, и во гресех роди мя мати моя. Се бо, истину возлюбил еси; безвестная и тайная премудрости Твоея явил ми еси. Окропиши мя иссопом, и очищуся; омыеши мя, и паче снега убелюся. Слуху моему даси радость и веселие; возрадуются кости смиренныя. Отврати лице Твоё от грех моих и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего и Духа Твоего Святаго не отыми от мене. Воздаждь ми радость спасения Твоего и Духом владычним утверди мя. Научу беззаконыя путём Твоим, и нечестивии к Тебе обратятся. Избави мя от кровей, Боже, Боже спасения моего; возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен; сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая; тогда возложат на oлтарь Твой тельцы.
Псалом 90
Живый в помощи Вышняго, в крове Бога Небеснаго водворится. Речет Господеви: Заступник мой еси и Прибежище мое, Бог мой, и уповаю на Него. Яко Той избавит тя от сети ловчи, и от словесе мятежна, плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни, от вещи во тме преходяшия, от сряща, и беса полуденнаго. Падет от страны твоея тысяща, и тма одесную тебе, к тебе же не приближится, обаче очима твоима смотриши, и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло, и рана не приближится телеси твоему, яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою, на аспида и василиска наступиши, и попереши льва и змия. Яко на Мя упова, и избавлю и: покрыю и, яко позна имя Мое. Воззовет ко Мне, и услышу его: с ним есмь в скорби, изму его, и прославлю его, долготою дней исполню его, и явлю ему спасение Мое.
Молитва Пресвятой Богородице
перед Ея иконой, именуемая "Целительница"
Приими, о Всеблагословенная и Всемощная Госпоже Владычице Богородице Дево, сия молитвы, со слезами Тебе приносимыя от недостойного рабы Божей (имя), ко Твоему цельбоносному образу пение возсылающего со умилением, яко Тебе Самой зде сущей и внемлющей молению нашему. По коемуждо бо прошению исполнение твориши, скорби облегчаеши, немощным здравие даруеши, разслабленныя и недужныя исцеляеши, от бесных бесы прогоняеши, обидимыя от бед избавлявши, прокаженныя очищаеши и малыя дети милуеши: еще же, Госпоже Владычице Богородице, от уз и темниц свобождаеши и всякия многоразличныя страсти врачуеши: вся бо суть возможна ходатайством Твоим к Сыну Твоему, Христу Богу нашему. О Всепетая Мати, Пресвятая Богородице! Не престай молитися о нас, недостойной рабы Божей (имя), славящего Тя и почитающего Тя, и поклоняющигося со умилением Пречистому образу Твоему, и надежду имущих невозвратну и веру несумненну к Тебе, Приснодеве Преславней и Непорочней, ныне и присно и во веки веков Аминь.
Молитва к Пресвятой Богородице
перед Ея иконой,
именуемой "Всецарица"
О Пречистая Богомати, Всецарице! Услыши многоболезненное воздыхание наше пред чудотворною иконою Твоею, из удела Афонскаго в Россию принесенною, призри на чад Твоих, неисцельными недуги страждущих, ко святому образу Твоему с верою припадающих! Якоже птица крилома покрывает птенцы своя, тако и Ты ныне, присно жива сущи, покрый нас многоцелебным Твоим омофором. Терпением и Ослабою явися. Тамо, идеже надежда исчезает, несумненною Надеждою буди. Тамо, идеже лютые скорби превознемогают, тамо, идеже мрак отчаяния в души вселися, да возсияет неизреченный свет Божества! Малодушных утеши, немощныя укрепи, ожесточенным сердцам умягчение и просвещение даруй. Исцели болящия люди Твоя, о Всемилостивая Царице! Ум и руки врачующих нас благослови, да послужат орудием Всемощнаго Врача Христа Спаса нашего. Яко живей Ти, сущей с нами, молимся пред иконою Твоею, о Владычице! Простри руце Твои, исполненныя исцеления и врачбы, Радосте скорбящих, в печалех Утешение, да чудотворную помощь скоро получив, прославляем Живоначальную Нераздельную Троицу, Отца, Сына, и Святаго Духа во веки веков. Аминь.
Молитва к пресвятой Богородице
перед иконою,
именуемой "Скоропослушница"
Преблагословенная Владычице, Приснодево Богородице, Бога Слова паче всякаго слова на спасение наше рождшая, и благодать Его преизобильно паче всех приявшая, море явльшаяся Божественных дарований и чудес приснотекущая река, изливающая благость всем, с верою к Тебе прибегающим! Чудотворному Твоему образу припадающе, молимся Тебе, Всещедрей Матери Человеколюбиваго Владыки: удиви на нас пребогатыя милости Твоя, и прошения наша, приносимая Тебе, Скоропослушнице, ускори исполнити, все, еже на пользу во утешение и спасение коемуждо устрояющи. Посети, Преблагая, рабы Твоя благодатию Твоею, подаждь недугуюшим цельбу и совершенное здравие, обуреваемым тишину, плененным свободу и различными образы страждущих утеши, избави, Всемилостивая Госпоже, всяк град и страну от глада, язвы, труса, потопа, огня, меча и иныя казни временныя и вечныя, Матерним Твоим дерзновением отвращающи гнев Божий: и душевнаго разслабления, обуревания страстей и грехопадений свободи рабы Твоя, яко да непреткновенно во всяком благочестии поживше в сем веце, и в будущем вечных благ сподобимся благодатию и человеколюбием Сына Твоего и Бога, Емуже подобает всякая слава, честь и поклонение, со Безначальным Его Отцем и Пресвятым Духом, ныне и присно, и во веки веков. Аминь.
Молитва Святителю Николаю Чудотворцу
О, всеблагий отче Николае, пастырю и учителю всех верою притекающих к твоему заступлению, и теплою молитвою тебе призывающих, скоропотщися, и избави Христово стадо от волков, губящих е; и всяку страну христианскую огради и сохрани святыми твоими молитвами от мирскаго; мятежа, труса, нашествия иноплеменников и междуусобные брани, от глада, потока, огня, меча и напрасныя смерти; и якоже помиловал еси треих мужей в темнице седящих, и избавил еси их царева гнева и посечения мечнаго, тако помилуй и мене, умом, словом и делом во тьме грехов суща, и избави мя гнева Божия и вечныя казни; яко да твоим ходатайством и помощию, Своим же милосердием и благодатию Христос Бог тихое и безгрешное житие даст ми пожити в веце сем, и избавит мя шуияго стояния, сподобит же деснаго со всеми святыми. Аминь.
Молитва Архангелу Михаилу
Господи, Боже Великий, Царю безначальный, пошли, Господи, Архангела Твоего Михаила на помощь рабе Божей (имя). Защити, Архангеле, его от всех врагов, видимых и невидимых. О, Господень Великий Архангеле Михаиле! Демонов сокрушитель, запрети всем врагам, борющимся с ней, и сотвори их яко овцы, и смири их злобные сердца, и сокруши их яко прах перед лицом ветра. О, Господень Великий Архангеле Михаиле! Шестикрылый первый Князь и Воевода Небесных сил Херувимов и Серафимов, буди рабе Божей (имя) помощник во всех бедах, скорбях, в печалях, в пустыни и на морях тихое пристанище. О, Господень Великий Архангеле Михаиле! Избави рабу Божью (имя) от всякия прелести диавольския, егды услышишь ее, грешную, молящую Тебе, призывающих имя Твое Святое. Ускори ей помощь и побори всех, противящихся ей, силою Честнаго и Животворящего Креста Господня, молитвами Пресвятой Богородицы, молитвами святых Апостолов, Святителя Чудотворца Николая, Андрея, Христа ради, юродивого, святого пророка Илии и всех святых великомучеников: святый мученики Никиты и Евстафия, и всех преподобных отцов наших, от века Богу угодивших, и всех святых Небесных Сил.
О, Господень Великий архангеле Михаиле! Помоги рабе Божьей (имя) и избави ее от труса, потопа, огня, меча и напрасной смерти, от великого зла, от врага льстивого, от бури поносимой, от лукавого избави ее навсегда, ныне и присно и во веки веков. Аминь. Святой Архистратиг Божий Михаил, молниеносным мечом Твоим отжени от рабы Божьей (имя) духа лукавого, искушающего и томящего ее. Аминь.
Молитва Архангелу Рафаилу
О, святый Архангеле Рафаиле! Всеусердно молим тя, буди рабе Божьей (имя) путеводитель в жизни нашей, сохрани от всех видимых и невидимых враг, исцели душевныя и телесныя болезни наша, управи жизнь нашу к покаянию во гресех и ко творению добрых дел. О, святый великий Рафаиле Архангеле! Услыши меня, грешную рабу Божью (имя), молящихся тебе, и сподоби в здешней и в будущей жизни благодарити и славити общаго Создателя нашего в безконечныя веки веков. Аминь.
Молитва Священномученику Киприану
Начинаем глаголати молитву Священномученика Киприана, во дни или в нощи, или в кой час упражняешися, вся силы сопротивнаго от славы Бога Живаго отпадут.
Сей Священномученик, всей душею моляшеся Богу глаголах: "Господи Боже Сильный и Святый, Царь царствующих, ныне услыши молитву раба Твоего, Киприана".
Тебе предстоят тысяща тысящь и тьма тьмам Ангел и Архангел, Ты веси тайное, сердца раба Твоего (имя), предстани ему Господи, яко во узах Павлу и во огне Фекле. Тако, познати мне, Тебя, аз бо первый творях вся беззакония моя.
Ты, держах облак, и небо неодождих древа садовняго, и то плод нетворих. Непраздным жёнам переждати, и иным зачатия недах. На ограждение пертограда токмо взирах, и нетворих. Розге не цвести и класу непрозябати; Винограду неродити, и зверям неплождатися. Рыбам морским неплавати и птицам небесным летати возбраних. Тако, Ты показал силу Свою при пророце Илие.
Молю Тя, Господи Боже мой; вся чародейства, и вся лукавыя бесы ко греху человека клонях и на нём грех творях, Ты, силою Своею, запрети! Нынеже, Господи Боже мой, Сильный и Великий, благоволивый от недостойного, достойному мне быти, и сопричастному Святому Твоему стаду, молю Тя, Господи Боже мой, кто имать молитву сию в дому или при себе, сотвори ему просящее ею.
Пресвятым Величеством Своим, милосердовах на мне и не восхоте погубити мя со беззакониями моима; тако непогуби всякого молящего Тя молитвою сиею.
Непрочнаго в вере, утверди! Безсильного духом, укрепи! Отчаянного, вразуми и не отверзи всякаго прибегающего к Твоему Святому имени.
Яже, припадая к Тебе Господи, молю и прошу святое имя Твое: во всяком доме и на всяком месте наипаче на православном христианине яже имеется чародейство кое от лукавых человек или от бесов, да прочтётся молитва сия над главою человека или в дому и да разрешится от связания злыми духами в зависти, лести, ревности, ненависти, злопомучении, злоустрашении, действенном отравлении, от языческаго ядения и от всякаго заклинания и клятвы.
Кто убо стяжав молитву сию во своем дому да будет соблюден от всякаго ухищрения диавольского, потвора, отравы злыми и лукавыми человеками, от заклинаний и всякаго колдования и чародеяния, и да бежат от него бесы и да отступят злые духи. Господи Боже мой, имеяй власть на небеси и на земли, ради имени Твоего Святаго и ради несказанныя благости Сына Твоего, Бога нашего Иисуса Христа, услыши в час сей недостойного раба Твоего (имя), яже чтет молитву сию и по ней да разрешится вся диавольская козни.
Яко тает воск от лица огня, тако да погибнут вся чародеяния и заклинания лукавския от лица человека чтущаго молитву сию. Яко имя, Живоначальныя Троицы, нам просвещение суть, и разве Тебе, инаго бога не знаем. Тебе веруем, Тебе поклоняемся и Тебя молим; защити, заступи и сохрани нас, Боже, от всякого лукаваго действа и чародейства злых человек.
Яко же Моисеовым сыновам из камени сладку воду источил еси, такожде, Господи Боже Сил, положи руку Свою на рабу Твою (имя), полную благости Твоея и защити от всякаго кознодейства.
Благослови, Господи, дом в нём же да пребывает молитва сия и всякаго чтущаго память мою, Милость Свою пошли ему, Господи, и защити его от всякаго чародеяния. Помощником и покровителем ему буди, Господи.
Четыре реки: Фисон, Геон, Евфрат и Тигр: эдемский человек не может удержати, тако не может никакой чародей ставления дел или мечтаний бесовских являти пред чтением молитвы сия, заклинаю Богом Живым! Да сокрушится демон и прогонится вся противная и злая сила, пущенная от злых человек на рабу Божию (имя).
Яко умножил лета Иезекию царю, тако умножи и лета имущему молитву сию: службою Ангел, пением Серафимским, благовещением Пресвятыя Девы Марии от Архангела Гавриила и безплотнаго ради зачатия Ея, Господа нашего Иисуса Христа, славного Рождества Его в Вифлиеме, закланием от Ирода царя четыре на десяти тысящь младенцев и Святого Крещения его воспринятым во Иордановой реке, постом и искушением еже от диавола, ужасныя Его победы и ужаснейшего суда Его, ужаснейших чудес Его в мире бывших: исцеление и очищение даруяй. Мёртвых оживляй, бесы изгоняй и во Иерусалим вход Его, яко Царя исполняй: "Оссаина Сыну Давидову от младенец вопиющих Ти, слышай" Святыя Страсти, Распятие и Погребение терпя, и иже в третий день Воскресению бысть якоже писано есть, и на небеса восхождение. Пение тамо многочисленных Ангел и Архангел, славя восход Его, иже одесную Отца сидения до второго пришествия Его судити живых и мёртвых. Власть дал еси святым учеником Твоим и Апостолом, рекий им: "Держите и держатся решите и разрешатся", тако и всякому по молитве сей, разреши всякое диавольское чародейство над рабой Твоей (имя).
Ради бо Святаго Великаго имени Твоего заклинаю и прогоняю вси дуси лукавыя и злыя и очеса злых человек и чародейства их наговоры, колдовство, глазную порчу, чародеяния и всякое ухищрение диавольское. Молю Тя, Многомилостиве Господи, отведи от рабы Твоей (имя), и от дому её, и от всякаго стяжания её.