Слава в вышних Богу, и на земли мир, в человецех благоволение. Хвалим Тя, благословим Тя (поклон), кланяемтися, славословим Тя (поклон), благодарим Тя великия ради славы Твоея (поклон). Господи Царю небесныи, Боже Отче Вседержителю, и Господи Сыне Единородныи Исусе Христе, и Святыи Душе: Господи Боже, Агньче Божии, Сыне Отечь, вземляи грехи мира, помилуй нас. Вземляи грехи мира, приими молитвы наша. Седяи одесную Отца, помилуй нас. Яко Ты един свят, Ты един Господь Исус Христос, в славу Богу Отцу, аминь. На всяку нощь благословлю Тя, и восхвалю имя Твое во веки, и в век века. Господи, Прибежище бысть нам, в род и род. Аз рех: Господи, помилуи мя и исцели душу мою, яко согреших Тебе. Господи, к Тебе прибегох, научи мя творити волю Твою, яко Ты еси Бог мой, яко от Тебе есть источник живота, во свете Твоем узрим свет. Пробави милость Твою ведущим Тя. Сподоби Господи, в нощь сию без греха сохранитися нам. Благословен еси, Господи Боже отец наших, и хвально и прославлено имя Твое во веки, аминь. Буди Господи, милость Твоя на нас, якоже уповахом на Тя. Благословен еси Господи, научи нас оправданием Твоим. Благословен еси Владыко, вразуми нас оправданием Твоим. Благословен еси Святыи, просвети нас оправданием Твоим. Господи, милость Твоя во веки, и дела руку Твоею не презри. Тебе подобает хвала, Тебе подобает пение. Тебе слава подобает: Отцу и Сыну и Святому Духу, ныне и присно и во веки веком, аминь.
Посем ектения. Исполним заутрения. Таже, на стиховне стихеры. Посем: Слава, и ныне, Богородичен.
Таже: Благо есть исповедатися Господеви, и пети имени Твоему, Вышнии, возвещати заутра милость Твою, и истину Твою на всяку нощь. Аще есть пост, глаголем дважды. Таже, Трисвятое. И по Отче наш, тропарь дню, или святому по уставу, и ектения и по возгласе глаголет псаломщик: Аминь. Приидите, поклонимся, трижды. И псалмы Перваго часа. И прочее. И отпуст.
Аще ли пост, то глаголем по Отче наш тропари сии: В церкви стояще славы Твоея, на небеси стояти мнимся, Богородице дверь небесная, отверзи нам двери милости Твоея. Господи помилуй (40). Господи благослови. Господи Исусе Христе Сыне Божии, помилуй нас. Глаголем: Аминь. Небесныи Царю, державу нашу укрепи, веру утверди, языки укроти, мир умири, и святыи храм сей добре сохрани, и прежде отшедшия отцы и братию нашу в кровех с праведными учини и нас в православней вере и в покаянии, Господи, приими и помилуй, яко Благ и Человеколюбец. Таже, Господи помилуй (трижды). Слава, и ныне. Честнейшую херувим, и славнейшую воистину серафим, без истления Бога Слова рождьшую, сущую Богородицу Тя величаем (поклон великий). Именем Господним благослови, отче.
И творим великия поклоны, с молитвою святаго Ефрема, якоже предуказася на вседневней полунощнице.
И абие начинаем первый час.
Девятый час
Приидите, поклонимся (трижды, и поклоны три)
Псалом 83.
Коль возлюблена села Твоя, Господи сил, желает и скончевается душа моя во дворы Господня. Сердце мое и плоть моя возрадовастася о Бозе живе. Ибо птица обрете себе храмину, и горлица гнездо себе, идеже положи птенцы своя. Олтари Твоя, Господи Боже сил, Царю мой и Боже мой. Блажени живущии в дому Твоем, в век века восхвалят Тя. Блажен муж ему же есть заступление его от Тебе. Восхождения в сердцы своем положи, во юдоли плачевне, в месте идеже положи. Ибо благословение даст закон даяи. Пойдут от силы в силу, явится Бог богом в Сионе. Господи Боже сил, услыши молитву мою, внуши Боже Ияковль. Защитниче наш, виждь Боже, и призри на лице Христа Твоего. Яко лучше день един во дворех Твоих, паче тысящ. Изволих приметатися в дому Бога моего паче, неже жити ми в селех грешничих. Яко милость и истину любит Господь. Бог благодать и славу даст. Господь не лишит блага, ходящих незлобием. Господи Боже сил, блажен человек уповаяи на Тя.
Псалом 84.
Благоволил еси Господи, землю Твою, возвратил еси плен Ияковль Оставил еси беззакония людем Твоим, покрыл еси вся грехи их. Укротил еси весь гнев Твой, возвратил еси от гнева ярости Твоея. Возврати нас, Боже спасении наших, и возврати ярость Твою от нас. Еда во веки прогневаешися на ны, или простреши гнев свой от рода в род. Боже, Ты обращ живиши ны, и людие Твои возвеселятся о Тебе. Яви нам Господи, милость Твою, и спасение Твое даждь нам. Услышу, что речет о мне Господь Бог; яко речет мир на люди Своя и на преподобныя Своя, и на обращающия сердца к Нему. Обаче близ боящихся Его, спасение Его, вселити славу в землю нашу. Милость и истина сретостеся, правда и мир облобызастася. Истина от земли восия, и правда с небесе приниче. Ибо Господь даст благость, и земля наша даст плод свой. Правда пред Ним предъидет, и положит в путь стопы своя.
Псалом 85.
Приклони Господи, ухо Твое и услыши мя, яко нищ и убог есмь аз. Сохрани душу мою, яко преподобен есмь, спаси раба Твоего, Боже мой, уповающаго на Тя. Помилуй мя Господи, яко к Тебе воззову весь день. Возвесели душу раба Твоего, яко к Тебе взях душу мою. Яко Ты Господи, благ, и долготерпелив, и многомилостив всем призывающим Тя. Внуши Господи, молитву мою, и воньми гласу моления моего. В день печали моея возвах к Тебе, яко услыша мя. Несть подобен Тебе в бозех Господи, и несть по делом Твоим. Вси языцы елико сотвори приидут, и поклонятся пред Тобою Господи, и прославят имя Твое. Яко велии еси Ты, и творяи чудеса, Ты еси Бог един. Настави мя Господи, на путь Твой, и пойду во истине Твоей: да возвеселится сердце мое, боятися имене Твоего. Исповемся Тебе, Господи Боже мой, всем сердцем моим, и прославлю имя Твое в век. Яко милость Твоя велия на мне, и избави душу мою от ада преисподняго. Боже, законопреступницы восташа на мя, и сонм державных взыскаша душу мою, и не предложиша Тебе пред собою. И Ты Господи Боже мой, щедр и милостив, долготерпелив и многомилостив и истинен. Призри на мя и помилуй мя, даждь державу Твою отроку Твоему, и спаси сына рабы Твоея. Сотвори со мною знамение во благо, и да видят ненавидящии мя и постыдятся; яко Ты Господи, поможе ми, и утешил мя еси.
Слава, и ныне. Аллилуия (трижды). Господи помилуй (трижды). Тропарь по уставу.
Аще ли же пост, глаголем сий тропарь, глас 8: Иже в девятыи час, нас ради плотию смерть вкусивыи, умертви плоти нашея мудрование, Христе Боже, спаси нас.
Стих 1:
Да приближится молитва моя пред Тя Господи, по словеси Твоему вразуми мя.
Стих 2:
Да внидет прошение мое пред Тя Господи, по словеси Твоему избави мя.
Слава, и ныне. Иже нас ради рождеися от Девы, и распятие претерпев Благии, испровергии смертию смерть, и воскресение явль яко Бог, не презри их же созда рукою Своею, яви человеколюбие Свое Милостиве, приими рождьшую Тя Богородицу, молящуся заны, и спаси, Спасе наш, люди согрешьшия.
Аще ли пост, бывает чтение. Таже: Не предаждь нас до конца, имене Твоего ради, и не разори завета Твоего, и не отстави милости Твоея от нас, Авраама ради возлюбленнаго от Тебе, и за Исаака раба Твоего, и Израиля святаго Твоего. Таже, Трисвятое. И по Отче наш, кондак дню, или святому.
Аще ли же пост, глаголем тропари сия, глас 8: Видя разбойник Начальника жизни на Кресте висяща, и глаголаше: аще небы Бог был воплощься, Иже с нами распныися, небы солнце лучи свои потаило, ниже земля трепещущи тряслася, но Иже за вся терпяи, помяни мя Спасе, егда приидеши во царствии Си.
Слава. Посреди двою разбойнику мерило праведное обретеся Крест Твой: овому убо низходящу во ад тяготою хуления, другому же легчащуся от грех к разуму богословия. Христе Боже, слава Тебе.
И ныне. Агньца и пастыря и Спаса миру, на Кресте зрящи рождьшая Тя, глаголаше слезящии: мир убо радуется, приемля Тобою избавление, утроба же Моя горит, зрящи Твое распятие, еже за всех терпиши, Сыне и Боже мой.
Таже, Господи помилуй (40). Иже на всяко время… Господи помилуй (трижды). Слава, и ныне. Честнейшую херувим… Именем Господним благослови, отче. За молитв святых отец наших… Аминь. И сотворяем три великия поклоны, со обычною молитвою: Господи и Владыко животу моему… И прочих метаний (12). Посем молитва. Владыко Боже, Отче Вседержителю…
Аще ли великий пост, и мы по поклонех молитвы: Владыко Боже, Отче… не глаголем, но поем на оба лика: Во царствии Си…
Аще ли кроме поста, глаголем молитву сию: Владыко, Господи Исусе Христе, Боже наш, долготерпеливе о наших согрешениих, даже и до нынешняго часа приведыи нас, воньже на животворящем древе вися, благоразумному разбойнику, Иже в рай путь сотворил еси вход, и смертию смерть разрушил еси, очисти нас грешных, и недостойных раб Твоих. Согрешихом бо и беззаконновахом, и несмы достойни возвести очию нашею, и возрети на высоту небесную, зане же оставихом путь правды Твоея, и ходихом в волях сердец наших, но молим Твою благость: пощади нас Господи, по множеству милости Твоея, и спаси нас имене Твоего ради святаго, яко исчезоша в суете дние наши. Изми нас из руки сопротивнаго, и остави нам прегрешения наша, и умертви плотьское наше мудрование, да ветхаго отложивше человека, и в новаго облецемся, и Тебе поживем, нашему Владыце и Благодателю, и тако Твоим повелением последующе, в вечныи покой достигнем, идеже есть всем веселящимся жилище. Ты бо еси воистину истинное веселие, и радость любящим Тя, Христе Боже наш, и Тебе славу возсылаем, со безначальным Ти Отцем, и с Пресвятым и Благим и Животворящим Ти Духом, ныне и присно и во веки веком, аминь.
Павечерница великая
Начало Великия павечерницы.
Певаема бывает в Великии пост, и в пост святых Апостол, и в пост Святыя Богородицы, и в пост Рожества Христова, егда есть Аллилуия, с поклоны.
По обычнем начале глаголем:
За молитв святых отец наших, Господи Исусе Христе, Сыне Божии, помилуй нас.
Аминь.
Царю Небесныи. Трисвятое. И по Отче наш.
Молитва Исусова.
Господи помилуй (12).
Слава, и ныне.
Приидите, поклонимся (трижды).
Аще ли есть первая неделя Великаго поста, глаголем, псалом 69:
Боже, в помощь мою воньми. Господи, помощи ми потщися. Да постыдятся и посрамятся ищущии душу мою. Да возвратятся вспять и постыдятся, мыслящии ми злая. Да возвратятся абие стыдящеся, глаголющии ми: благо же, благо же. Да возрадуются и возвеселятся о Тебе, вси ищущии Тебе Боже, и глаголют выну: да возвеличится Господь, любящии спасение Твое. Аз же нищь есмь и убог, Боже помози ми. Помощник мой и Избавитель мой еси Ты. Господи, не закосни.
Посем канон святаго Андрея Критскаго.
По каноне же глаголем псалом, 4–й Внегда возвах.
Аще ли кроме первыя недели святаго поста по изглаголании: Приидите, поклонимся, глаголем сия псалмы.
Внегда возвах, услыша мя Боже правды моея, в скорби распространил мя еси. Ущедри мя, и услыши молитву мою. Сынове человечестии, доколе тяжкосердии; вскую любите суетная, и ищете лжи; И уведите, яко удиви Господь преподобнаго Своего, Господь услышит мя внегда взову к Нему. Гневайтеся и не согрешайте, яже глаголете в сердцах ваших, на ложах ваших умилитеся. Пожрите жертву правды, и уповайте на Господа, мнози глаголют: кто явит нам благая? 3наменася на нас свет лица Твоего Господи, дал еси веселие в сердцы моем. От плода пшеницы, вина и елея своего умножишася. В мире вкупе усну и почию, яко Ты Господи, единаго на упование вселил мя еси.
Псалом 6.
Господи, да не яростию Твоею обличиши мене, ниже гневом Твоим покажеши мене. Помилуй мя Господи, яко немощен есмь, исцели мя Господи, яко смутишася кости моя. И душа моя смутися зело, и Ты Господи, доколе? Обрати Господи, изми душу мою, спаси мя ради милости Твоея. Яко несть в смерти поминаяи Тебе, во аде же кто исповестьтися? Утрудихся воздыханием моим, измыю на всяку нощь ложе мое, слезами моими постелю мою омочу. Смутися от ярости око мое, обетшах во всех вразех моих. Отступите от мене вси творящии беззаконие, яко услыша Господь глас плача моего. Услыша Господь моление мое, Господь молитву мою прият. Да постыдятся и смятутся вси врази мои, возвратятся и устыдятся зело вскоре.
Псалом 12.
Доколе Господи, забудеши мя до конца? Доколе отвращаеши лице Свое от мене? Доколе положу советы в души моей, болезни в сердцы моем день и нощь? Доколе вознесется враг мой на мя? Призри и услыши мя, Господи Боже мой. Просвети очи мои да некогда усну в смерть, да некогда речет враг мой: укрепихся нань. Стужающии ми возрадуются, аще ся подвижу, аз же на милость Твою уповах. Возрадуется сердце мое о спасении Твоем, воспою Господеви благодеявшему мне, и пою имени Господню Вышнему.
Слава, и ныне.
Аллилуия, Аллилуия, слава Тебе, Боже (трижды и поклоны три).
Господи помилуй (трижды). Слава, и ныне.
Псалом 24.
К Тебе Господи, воздвигох душу мою, Боже мой, на Тя уповах, да не постыжуся во веки. Ни посмеютмися врази мои, ибо вси терпящии Тя не постыдятся. Да постыдятся беззаконнующии всуе. Пути Твоя Господи, скажи ми, и стезям Твоим научи мя. Настави мя на истину Твою, и научи мя, яко Ты еси Бог Спас мой, и Тебе терпех весь день. Помяни щедроты Твоя Господи, и милости Твоя, яко от века суть. Грех юности моея, и невежествия моего не помяни, по милости Твоей помяни мя Ты, ради благости Твоея, Господи. Благ и прав Господь, сего ради закон положит согрешающим на пути. Наставит кроткия на суд, и научит кроткия путем Своим. Вси путие Господни милость и истина, взыскающим завета Его и свидения Его. Ради имене Твоего Господи, и очисти грех мой, мног бо есть. Кто есть человек бояися Господа; закон положит ему на пути иже изволи. Душа его во благих водворится, и семя его наследит землю. Держава Господь боящимся Его, и завет Его явит им. Очи мои выну ко Господу, яко Той исторгнет от сети нозе мои. Призри на мя и помилуй мя, яко единород и нищь есмь аз. Скорби сердца моего умножишася, и от бед моих изведи мя. Виждь смирение мое и труд мой, и отпусти вся грехи моя. Виждь враги моя, яко умножишася, и ненавидением неправедным возненавидеша мя. Сохрани душу мою и избави мя, да не постыжуся, яко уповах на Тя. Незлобивии и правии прилепляхуся мне, яко потерпех Тя, Господи. Избави Боже, Израиля от всех скорбий его.
Псалом 30.
На Тя Господи, уповах, да не постыжуся во веки, правдою Твоею избави мя, и изми мя. Приклони ко мне ухо Твое, ускори изъяти мя. Буди ми в Бог защититель, и в дом прибежища спасти мя. Яко держава моя и прибежище мое еси Ты, и имене Твоего ради наставиши мя, и препитаеши мя. Исторгнеши мя от сети сея, юже скрыша ми, яко Ты еси Защититель мой, Господи. В руце Твои предаю дух мой, избавил мя еси, Господи Боже истине. Возненавидел еси хранящия суетная затщее, аз же на Господа уповах. Возрадуюся и возвеселюся о милости Твоей, яко призрел еси на смирение мое, спасл еси от бед душу мою. И неси мене затворил в руках вражииих, поставил еси на пространне нозе мои. Помилуй мя Господи, яко скорблю, смутися от ярости око мое, душа моя и утроба моя. Яко исчезе в болезни живот мой, и лета моя в воздыханиих, изнеможе нищетою крепость моя, и кости моя смутишася. От всех враг моих бых поношение, и соседом моим зело, и страх знаемым моим. Видящии мя вон бежаша от мене, забвен бых яко мертв от сердца. Бых яко сосуд погублен, яко слышах гаждение многих живущих окрест, внегда собратися им вкупе на мя, прияти душу мою совещаша. Аз же на Тя Господи, уповах, рек: Ты еси Бог мой, в руку Твоею жребии мои. Избави мя из руки враг моих, и от гонящих мя. Просвети лице Твое на раба Твоего, спаси мя милостию Твоею Господи, да не постыжуся, яко призвах Тя. Да постыдятся нечестивии, и снидут во ад. Немы да будут устны льстивыя, глаголющия на праведнаго беззаконие, гордынею и уничижением. Коль много множество благости Твоея Господи, юже скрыл еси боящимся Тебе, соделал еси уповающим на Тя, пред сыны человеческими. Скрыеши их в тайне лица Твоего, от мятежа человеческа, покрыеши их в крове от пререкания язык. Благословен Господь, яко удиви милость Свою во граде обстояния. Аз же рех во изступлении моем: отвержен есмь от лица очию Твоею; сего ради услыша глас молитвы моея, внегда возвах к Тебе. Возлюбите Господа вси преподобнии Его, яко истины взыскает Господь, и воздает излиха творящим гордыню. Мужайтеся и да крепится сердце ваше, вси уповающии на Господа.
Псалом 90.
Живыи в помощи Вышняго, в крове Бога небеснаго водворится. Речет Господеви: Заступник мой еси, и прибежище мое, Бог мой, и уповаю Нань. Яко Той избавит тя от сети ловчи, и от словесе мятежна. Плещьма Своима осенит тя, и под криле Его надеешися. Оружие обыдет тя истина Его, не убоишися от страха нощнаго, от стрелы летящия во дни. От вещи во тме преходящия, от сряща и беса полуденнаго. Падет от страны твоея тысяща, и тма одесную тебе, к тебе же не приближится. Обаче очима своима смотриши, и воздаяние грешииком узриши. Яко Ты Господи, упование мое; Вышняго положил еси прибежище твое. Не приидет к тебе зло, и рана не приближится телеси твоему. Яко ангелом Своим заповесть о тебе, сохранити тя во всех путех твоих. На руках возмут тя, да некогда преткнеши о камень ноги твоея. На аспида и василиска наступиши, и попереши льва и змия. Яко на Мя упова, и избавлю и, покрыю и, яко позна имя Мое. Воззовет ко Мне, и услышу и, с ним есмь в скорби, изму и, и прославлю его. Долготу дний исполню и, и явлю ему спасение Мое.
Посем: Слава, и ныне.
Аллилуия, Аллилуия, слава Тебе, Боже (трижды и поклоны три).
Господи помилуй (трижды). Слава, и ныне.
Таже, песнь святаго пророка Исаии.
С нами Бог, разумейте языцы и покаряйтеся, яко с нами Бог.
Услышите и до последних земли, яко с нами Бог. Могущии покаряйтеся, яко с нами Бог. Аще бо паки возможете, и паки побеждени будете, яко с нами Бог. И иже аще совет совещаваете, и разорит и Господь, яко с нами Бог. И слово еже аще возглаголете, не имать пребывати в вас, яко с нами Бог. Страха же вашего не имам убоятися, ниже соблазнитися, яко с нами Бог. Господа же Бога нашего святите, и Той будет вам в боязнь, яко с нами Бог. И иже аще Нань надеешися, и Той будет ти во освящение, яко с нами Бог. И уповающе будем Нань, и спасемся Его ради, яко с нами Бог. Се аз и дети, яже ми дал Бог, яко с нами Бог. Людие ходящии во тме, видеша свет велии, яко с нами Бог. Живущии во стране и сени смертней, свет восияет на вы, яко с нами Бог. Яко Отроча родися нам, Сын и дастся нам, яко с нами Бог. Ему же власть бысть на раме Его, яко с нами Бог. И миру Его несть предела, яко с нами Бог. И нарицается имя Его велика совета Ангел, яко с нами Бог. Чуден Советник, яко с нами Бог. Бог крепок, Владыка, Князь смирения, яко с нами Бог. Отец будущаго века, яко с нами Бог.
Слава: Яко с нами Бог.
И ныне: Яко с нами Бог.
Таже, сей стих глаголем трижды: С нами Бог, разумейте языцы и покаряйтеся, яко с нами Бог.
Таже: День пребыв благодарю Тя Господи, вечер молюся с нощию, безнаветие подаждь ми Спасе, и спаси мя.
Слава. День изшед славословлю Тя Владыко, вечер молюся с нощию, безсоблазньство подаждь ми Спасе, и спаси мя.
И ныне. День прешед песнословя Тя Святыи, вечер молюся с нощию, без греха сохрани мя Спасе, и спаси мя.