Молитва двадцать седьмая
Благаго Царя благая Мати, Пречистая и Благословенная Богородице Марие, милость Сына Твоего и Бога нашего излей на страстную мою душу и Твоими молитвами настави мя на деяния благая, да прочее время живота моего без порока прейду и Тобою рай да обрящу, Богородице Дево, едина Чистая и Благословенная.
Молитва двадцать восьмая
Воспеваю благодать Твою, Владычице, молю Тя, ум мой облагодати. Ступати право мя настави, путем Христовых заповедей. Бдети к песни укрепи, уныния сон отгоняющи. Связана пленницами грехопадений, мольбами Твоими разреши, Богоневесто. В нощи мя и во дни сохраняй, борющих враг избавляющи мя. Жизнодателя Бога рождшая, умерщвлена мя страстьми оживи. Яже Свет невечерний рождшая, душу мою ослепшую просвети. О дивная Владычня палато, дом Духа Божественна мене сотвори. Врача рождшая, уврачуй души моея многолетныя страсти. Волнующася житейскою бурею, ко стези мя покаяния направи. Избави мя огня вечнующаго, и червия же злаго, и тартара. Да мя не явиши бесом радование, иже многим грехом повинника. Нова сотвори мя, обетшавшаго нечувственными, Пренепорочная, согрешении. Странна муки всякия покажи мя и всех Владыку умоли. Небесная ми улучити веселия, со всеми святыми, сподоби. Пресвятая Дево, услыши глас непотребнаго раба Твоего. Струю давай мне слезам, Пречистая, души моея скверну очищающи. Стенания от сердца приношу Ти непрестанно, усердствуй, Владычице. Молебную службу мою приими и Богу благоутробному принеси. Превышшая Ангел, мирскаго мя превышша слития сотвори. Светоносная Сене небесная, духовную благодать во мне направи. Руце воздею и устне к похвалению, осквернены скверною, Всенепорочная. Душетленных мя пакостей избави, Христа прилежно умоляющи; Емуже честь и поклонение подобает, ныне и присно и во веки веков. Аминь.
Песнь Пресвятой Богородице
Богородице Дево, радуйся, Благодатная Марие, Господь с Тобою; благословена Ты в женах, и благословен плод чрева Твоего, яко Спаса родила еси душ наших.
Молитва "Достойно есть"
Достойно есть яко воистинну блажити Тя Богородицу, Присноблаженную и Пренепорочную и Матерь Бога нашего.
Честнейшую Херувим и славнейшую без сравнения Серафим, без нетления Бога Слова рождшую, сущую Богородицу Тя величаем.
Молитвы святым Силам бесплотным
Молитва
K вам, яко заступникам и хранителем живота моего, аз, окаянный, припадая, молюся: подадите мне молитвами вашими дневное пребывание богоугодно и неискусно от злых деяний и помышлений прейти. Отверзите слух ушию моею, да услышу и разумею дела и словеса Божия душеполезная, да прозрю внутреннима очима тьмою греховною обдержимый. Молите за мя, по вся часы согрешающаго, да не пояст мене меч ярости Господни, зело бо превзыдоша беззакония моя главу мою и яко бремя тяжкое отяготеша на мне. Ты же, Господи мой, Господи, призри на мя, и помилуй мя, и изведи из темницы духовныя душу мою, прежде даже не отыду отсюду и не приду на Страшный оный суд Твой. Прими молящияся за ны святыя Ангелы Твоя, иже окрест Престола Твоего выну со страхом предстоят, и тех молитвами, изряднее же Пречистыя Твоея Матерее, избави мя Страшного онаго и грознаго суда Твоего. Ты бое си Агнец Божий, вземляй всего мира грехи, распятый на Кресте нашего ради спасения, вонми молитве моей и посли Ангела Хранителя души моей и телу, да тем наставляемь, избавлюся от всяких врагов видимых и невидимых и сподоблюся получити Твою милость со всеми, от века Тебе благоугодившими, яко Ты еси Бог наш, и к Тебе прибегаю, и на Тя надеюся, аще и согреших паче человек, но Тебе не отступих, ни руку моею воздех ко иному богу. Тебе молюся, Господи Иисусе Христе, Тя благославляю, и Тебе покланяюся от Троице Единому, со Отцем и Святым Духом, ныне и присно и во веки веков. Аминь.
Тропарь, глас 4
Небесных Воинств архистратизи, молим вас присно, мы, недостойнии, да вашими молитвами оградите нас кровом крил невещественныя вашея славы, сохраняюще ны припадающия прилежно, и вопиющия: от бед избавите ны, яко чиноначальницы вышних сил.
Кондак, глас 2
Архистратизи Божии, служителие Божественным славы, Ангелов начальницы и человеков наставницы, полезное нам просите и велию милость, яко безплотных архистратизи.
Величание
Величаем вас, Архангели и Ангели, и вся Воинства, Херувими и Серафими, славящия Господа.
Ино величание
Величаем вас, Архангели, Ангели, Начала, Власти, Престоли, Господствия, Силы и Херувими, страшныя Серафими, прославляющия Господа.
Молитвы Ангелу Хранителю
Молитва первая
О святый Ангеле, Хранителю и покровителю мой благий! С сокрушенным сердцем и болезненною душею предстою ти, моляся: услыши мя, грешнаго раба своего (имя), с воплем крепким и плачем горьким вопиющаго: не помяни моих беззаконий и неправд, имиже аз, окаянный, прогневляю тя по вся дни и часы и мерзостна себе творю пред Создателем нашим Господем, явися мне милосерд и не отлучайся мене, сквернаго, даже до кончины моея, возбуди мя от сна греховнаго и пособствуй твоими молитвами прочее время живота моего без порока прейти и сотворити плоды достойны покаяния, паче же от смертных падений греховных соблюди мя, да не погибну во отчаянии и да не порадуется враг о погибели моей. Вем воистину и усты исповедую, яко никтоже таков друг и предстатель, защититель и поборник, якоже ты, святый Ангеле: предстоя бо престолу Господню, молишися о мне, непотребнем и паче всех грешнейшем, да не изымет Преблагий души моея в день нечаяния моего и в день творения злобы. Не престай убо, умилостивляя Премилосердаго Господа и Бога моего, да отпустит согрешения моя, еже сотворих во всем житии моем, делом, словом и всеми моими чувствы, и имиже весть судьбами да спасет мя, да накажет мя зде по Своей неизреченней милости, но да не обличит и не истяжет мя онамо по Своему нелицеприятному правосудию, да сподобит мя покаяние принести, с покаянием же божественное Причащение достойне прияти, о сем паче молю и таковаго дара всеусердно желаю. В страшный же час смерти неотступен буди ми, благий хранителю мой, прогоняя мрачныя демоны, имущия устрашити притрепетную душу мою, защити мя от тех ловления, егда имам преходити воздушная мытарства, да, храним тобою, безбедно достигну рая, ми вожделеннаго, идеже лицы святых и горних сил непрестанно восхваляют всечестное и великолепое имя в Троице славимаго Бога, Отца и Сына и Святаго Духа, Емуже подобает честь и поклонение во веки веков. Аминь.
Молитва вторая
Святый Ангеле, предстояй окаянней моей души и страстней моей жизни, не остави мене, грешнаго, ниже отступи от мене за невоздержание мое. Не даждь места лукавому демону обладати мною, насильством смертнаго сего телесе; укрепи бедствующую и худую мою руку и настави мя на путь спасения. Ей, святый Ангеле Божий, хранителю и покровителю окаянныя моея души и тела, вся мне прости, еликими тя оскорбих, во вся дни живота моего, и аще что согреших в прешедшую нощь сию, покрый мя в настоящий день и сохрани мя от всякаго искушения противнаго, да ни в коем гресе прогневаю Бога, и молися за мя ко Господу, да утвердит мя в страсе Своем, и достойна покажет мя раба Своея благости. Аминь.
Молитва третья
Ангеле Божий, Хранителю мой святый, на соблюдение мне от Бога с небес данный! Прилежно молю тя: ты мя днесь просвети, и от всякаго зла сохрани, ко благому деянию настави, и на путь спасения направи. Аминь.
Молитва четвертая
Ангеле Христов, хранителю мой святый и покровителю души и тела моего, вся ми прости, елика согреших во днешний день; и от всякаго лукавствия противнаго ми врага избави мя, да ни в коем же гресе прогневаю Бога моего, но моли за мя, грешнаго и недостойнаго раба, яко да достойна мя покажеши благости и милости Всесвятыя Троицы и Матере Господа моего Иисуса Христа и всех святых. Аминь.
Молитва пятая
Ангеле Христов святый, к тебе припадая, молюся, хранителю мой святый, приданный мне на соблюдение души и телу моему грешному от святаго крещения, аз же своею леностию и своим злым обычаем прогневах твою пречистую светлость и отгнах тя от себе всеми студными делы: лжами, клеветами, завистию, осуждением, презорством, непокорством, братоненавидением, и злопомнением, сребролюбием, прелюбодеянием, яростию, скупостию, обядением без сытости и опивством, многоглаголанием, злыми помыслы и лукавыми, гордым обычаем и блудным возбешением, имый самохотение на всякое плотское вожделение. О злое мое произволение, егоже и скоти безсловеснии не творят! Да како возможеши воззрети на мя или приступите ко мне, аки псу смердящему? Которыма очима, Ангеле Христов, воззриши на мя, оплетшася зле во гнусных делех? Да како уже возмогу отпущения просити горьким и злым моим и лукавым деянием, в няже впадаю по вся дни и нощи и на всяк час? Но молюся ти, припадая, хранителю мой святый, умилосердися на мя, грешнаго и недостойнаго раба твоего (имя), буди ми помощник и заступник на злаго моего сопротивника, святыми твоими молитвами, и Царствия Божия причастника мя сотвори со всеми святыми, всегда, и ныне и присно и во веки веков. Аминь.
Молитва шестая
Ангеле Божий, предстояй ми от купели святаго крещения! Колико аз преогорчевах тебе злыми помыслы, скверными словесы и постыдными деяньми в житии моем! Т^томуже, не памятовах, яко имам тя даннаго ми от Бога хранителя. Егда аз упивахся вином, или безстудно плясах, или в блуде, хищениях и злоприобретениях иждивах житие мое: и в сии дни ты не отлучался еси от мене, но токмо, яко чистый дух, печален был еси о мне, непотребнем рабе. Коль множицею аз бых близ самыя смерти, творяй преступныя дела и отнюдь не помышляяй предстати внезапну Богу Судии! Смерть же не постиже мене тогда: и вем, яко ты отвратил еси ю от мене. Тако выну охраняеши мя, и ни един аз есмь, внегда един жительствую во узилищи сем, но с тобою, Хранителю мой. Аще и не вижду тебе телесными очима, ты еси присно спребываяй окаянней моей душе и телу. Якоже солнце, преходя скверныя места, не оскверняется, сице и ты, светоносный Ангеле Божий, не возгнушайся моей смрадности, но николиже отлучайся от мене и в сей темнице. Сохрани мя здрава нощию и неприступна во сне диавольскому искушению. Отжени от мене безсоние. Сопутствуй ми, во дни, на кийждо час, во всех входех и исходех моих. Даруй ми крепость телесных сил, еже понести горькия работы, в наказание мне налагаемыя, горькия же паче по вине их. Заступи мя от злобы бесов, люте нападающих на мою душу: ибо от единаго мановения десницы твоея бежат беси. Паче же всего отжени от мене смятение душевное и ропот вредный: сый бо смущен сердцем, не хощу ни на кого и ни на что благоприятно взирати и присно зде огорчеваюся. Даруй очам моим слезы о гресех, устам же тихое глаголание. Не отступи от мене, святый Ангеле, и егда душа моя начнет разлучатися от тела, но предстани ми у смертнаго моего одра тих и радостен; ибо имам тогда видети тебе близ суща. Не остави и послежде мою душу, яже ти от Бога предана бысть непорочне, но яже по смерти моея имать судитися, яко оскверненная многими грехми. О Хранителю мой! Призови тогда помолитися о мне и прочия Безплотныя Силы, да твоим заступлением помилован буду, грешный раб (имя), во веки веков. Аминь!
Тропарь, глас 6
Ангеле Божий, Хранителю мой святый, живот мой соблюди во страсе Христа Бога, ум мой утверди во истиннем пути, и к любви горней уязви душу мою, да тобою направляем, получу от Христа Бога велию милость.
Кондак, глас 4
Явися мне милосерд, святый Ангеле Господень, Хранителю мой, и не отлучайся от мене, сквернаго, но просвети мя светом неприкосновенным и сотвори мя достойна Царствия Небеснаго.
Ин кондак, глас 2
Божий служителю и Хранителю мой преизрядне, грешному присно мне спребываяй, злодействия мя всякаго демонов избавляяй, и к божественным стезям наставляяй, жизнь ходатайствуяй нетленную.
Молитвы всем святым
Молитва первая
Боже Святый и во святых почиваяй, трисвятым гласом на небеси от Ангел воспеваемый, на земли от человек во святых Своих хвалимый, давый святым Твоим Духом коемуждо благодать по мере дарования Христова, и тою поставивый Церкви Твоей святей овы апостолы, овы пророки, овы же благовестники, овы пастыри и учители, ихже словом проповеди, Тебе, Самому действующему вся во всех, мнози совершишася святии в коемждо роде и роде, различными благодетельми благоугодившии Тебе, и к Тебе, нам образ добрых подвигов своих оставивше, в радости прешедшии, готови, в немже сами искушени быша, и нам напаствуемым помогати. Сих святых всех и (имя святого) воспоминая и их богоугодное похваляя житие, Тебе Самаго, в них действовавшаго, восхваляю, и онех благотворения Твоя дарования быти веруя, прилежно молю Тя, Святе святых, даждь ми, грешному, последовати их учению, житию, любви, вере, долготерпению, и их молитвенною помощию, паче же Твоею вседействующею благодатию, небесныя с ними сподобитися славы, хваляще пресвятое имя Твое, Отца и Сына и Святаго Духа во веки. Аминь.
Молитва вторая
О преблаженнии угодницы Божии, вси святии, предстоящи престолу Пресвятыя Троицы и наслаждающийся неизреченнаго блаженства! Се ныне, в день общаго вашего торжества, милостивно призрите на нас, меньших братий ваших, приносящих вам сие хвалебное пение, и ходатайством вашим просящих милости и отпущения грехов у Преблагаго Господа; вемы бо, воистину вемы, яко вся, елика восхощете, испросити у Него можете. Темже убо смиренно молимся вам и (имя святого), молите Милостиваго Владыку, да подаст нам дух вашея ревности к хранению святых Его заповедей, яко, да текше по стопам вашим, возможем земное поприще в добродетельном житии без порока прейти, и в покаянии достигнути преславных селений райских, и тамо купно с вами прославляти Отца и Сына и Святаго Духа, во веки веков. Аминь!
Молитва третья
K вам, о святии вси и (имя святого), яко путеводным светильникам, деяньми своими осветившим путь небеснаго восхода, аз, многогрешный, смиренно колена сердца моего преклоняю и из глубины души взываю: умолите о мне Человеколюбца Бога, да не попустит ми еще блуждати по распутиям греха, но да просветит мой ум и сердце светом благодати Своея, яко да тою озаряем и подкрепляем, возмогу прочее время земнаго жития правою стезею непреткновенно преити и ходатайством вашим к Преблагому Господу сподоблюся, поне вмале причастник быти духовныя вашея трапезы в небесном чертозе Царя славы. Емуже со Безначальным Его Отцем и Пресвятым, Благим и Животворящим Духом буди слава, честь и поклонение во веки веков. Аминь.
Тропарь, глас 4
Боже отец наших, творяй присно с нами по Твоей кротости, не отстави милость Твою от нас, но молитвами их в мире управи живот наш.
Ин тропарь, глас 2
Апостоли, мученицы и пророцы, святителие, преподобнии и праведнии, добре подвиг совершившии и веру соблюдшии, дерзновение имуще ко Спасу, о нас Того, яко блага, молите, молимся, спастися душам нашим.
Ин тропарь, глас 4
Иже во всем мире мученик Твоих, яко багряницею и виссом, кровьми Церковь Твоя украсившися, теми вопиет Ти, Христе Боже: людем Твоим щедроты Твоя низпосли, мир жительству Твоему даруй и душам нашим велию милость.
Кондак, глас 8
Апостол проповедание, и отец догматы, Церкве едину веру запечатлеша, яже и ризу носящи истины исткану от еже свыше богословия, исправляет и славит благочестия великое таинство.
Ин кондак, глас тойже
Яко начатки естества Насадителю твари вселенная приносит Ти, Господи, богоносныя мученики, тех молитвами в мире глубоце Церковь Твою, жительство Твое Богородицею соблюди, Многомилостиве.
Величание
Величаем вас, апостоли, мученицы, пророцы и вси святии, и чтим святую память вашу, вы бо молите за нас Христа Бога нашего.
Молитвы святым отцам (на соборы)
Тропарь, глас 8
Препрославлен еси, Христе Боже наш, светила на земли отцы наша основавый, и теми ко истинней вере вся ны наставивый: Многоблагоутробне, слава Тебе.
Кондак, глас тойже
Апостол проповедание, и отец догматы, Церкве едину веру запечатлеша, яже и ризу носящи истины, исткану от еже свыше богословия, исправляет и славит благочестия великое таинство.
Молитвы пророкам
Пророку единому
Молитва
О прехвальный и пречудный пророче Божий (имя)!
Услыши нас, грешных и непотребных, в час сей предстоящих пред святою твоею иконою и усердно прибегающих к ходатайству твоему. Моли о нас Человеколюбца Бога, да подаст нам дух покаяния и сокрушения о гресех наших и всесильною Своею благодатию да поможет нам оставити пути нечестия, преспевати же во всяком деле блазе, да укрепит нас в борьбе со страстьми и похотьми нашими; да всадит в сердце наше дух смирения и кротости, дух братолюбия и незлобия, дух терпения и целомудрия, дух ревности к славе Божией и спасению ближних. Упраздни молитвами твоими, пророче, злыя обычаи мира, паче же погибельный и тлетворный дух века сего, заражающий христианский род неуважением к божественней Православней вере, к уставам святыя Церкви и к заповедем Господним, непочтением к родителем и властем предержащим, и низвергающий людей в бездну нечестия, развращения и погибели. Отврати от нас, пречудне пророче, предстательством твоим праведный гнев Божий, и избави вся грады и веси царства нашего от бездождия и глада, от страшных бурь и землетрясений, от смертоносных язв и болезней, от нашествия врагов и междоусобныя брани.
Укрепи твоими молитвами, преславне, православныя люди, благопоспешествуй им во всех благих деяниих и начинаниих к водворению мира и правды в державе их. Пособствуй всероссийскому христолюбивому воинству во бранех со врагами нашими. Испроси, пророче Божий, от Господа пастырем нашим святую ревность по Бозе, сердечное попечение о спасении пасомых, мудрость в учении и управлении, благочестие и крепость во искушениих, судиям испроси нелицеприятие и безкорыстие, правоту и сострадание к обидимым, всем начальствующим попечение о подчиненных, милость и правосудие, подчиненным же покорность и послушание ко властем и усердное исполнение своих обязанностей; да, тако в мире и благочестии поживше в сем веце, сподобимся причастия вечных благ в Царствии Господа и Спаса нашего Иисуса Христа, Емуже подобает честь и поклонение, со Безначальным Его Отцем и Пресвятым Духом, во веки веков. Аминь.