О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
Лик: Го́споди, поми́луй.
О Вели́ком Господи́не и отце́ на́шем Святе́йшем Патриа́рхе (имярек), и о господи́не на́шем преосвяще́ннейшем митрополи́те (или архиепи́скопе, или епи́скопе) (имярек), честне́м пресви́терстве, во Христе́ диа́констве, о всем при́чте и лю́дех, Го́споду помо́лимся.
Лик: Го́споди, поми́луй.
О Богохрани́мей стране́ на́шей, власте́х и во́инстве ея́, Го́споду помо́лимся.
Лик: Го́споди, поми́луй.
О граде́ сем (или о ве́си сей, или о святе́й оби́тели сей), вся́ком гра́де, стране́ и ве́рою живу́щих в них, Го́споду помо́лимся.
Лик: Го́споди, поми́луй.
О бла́горастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
Лик: Го́споди, поми́луй.
О пла́вающих, путеше́ствующих, неду́гующих, стра́ждущих, плене́нных и о спасе́нии их, Го́споду помо́лимся.
Лик: Го́споди, поми́луй.
О изба́витися нам от вся́кия ско́рби, гне́ва и ну́жды, Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Молитва перваго антифона:
Го́споди ще́дрый и ми́лостивый, долготерпели́ве и многоми́лостиве, внуши́ моли́тву на́шу и вонми́ гла́су моле́ния на́шего. Сотвори́ с на́ми зна́мение во бла́го, наста́ви нас на путь Твой, е́же ходи́ти во и́стине Твое́й, возвесели́ сердца́ на́ша, во е́же боя́тися и́мене Твоего́ свята́го. Зане́ ве́лий еси́ и творя́й чудеса́, Ты еси́ Бог еди́н, и несть подо́бен Тебе́ в бозе́х, Го́споди, си́лен в ми́лости, и благ в кре́пости, во е́же помога́ти, и утеша́ти, и спаса́ти вся упова́ющия во и́мя свято́е Твое́.
Возгласно:
Я́ко подоба́ет Тебе́ вся́кая сла́ва, честь, и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
И по возгласе, стихословится:
Ко Го́споду внегда́ скорбе́ти ми:
Бываемым и поклоном на Аллилуиа. На коемждо же антифоне бывает ектения малая от диакона и возглас от священника. Наченшуся же стихословию, отходит священник во святое предложение и взем Преждеосвященный Хлеб от хлебоносца, полагает и́ со благоговением многим во святый дискос, вложив во святую чашу вино и воду обычно, ничтоже глаголя. И взем кадильницу, кадит звездицу и покровы, и покрывает я́, ничтоже отнюд глаголя, ниже молитву предложения, но токмо:
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас.
Диакон:
Па́ки и па́ки ми́ром Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Молитва втораго антифона:
Го́споди, да не я́ростию Твое́ю обличи́ши нас, ниже́ гне́вом Твои́м нака́жеши нас, но сотвори́ с на́ми по ми́лости Твое́й, врачу́ и исцели́телю душ на́ших, наставля́я нас ко приста́нищу хоте́ния Твоего́. Просвети́ о́чи серде́ц на́ших в позна́ние Твоея́ и́стины; и да́руй нам про́чее настоя́щаго дне ми́рное и безгре́шное, и все вре́мя живота́ на́шего, моли́твами святы́я Богоро́дицы, и всех святы́х Твои́х.
Возглас:
Я́ко Твоя́ держа́ва и Твое́ есть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Лик: Ами́нь.
И по возгласе, стихословится:
Наде́ющиися на Го́спода:
Диакон:
Па́ки и па́ки ми́ром Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Молитва третияго антифона:
Го́споди Бо́же наш, помяни́ нас, гре́шных и непотре́бных раб Твои́х, внегда́ призыва́ти нам свято́е и покланя́емое и́мя Твое́, и не посрами́ нас от ча́яния ми́лости Твоея́; но да́руй нам, Го́споди, вся я́же ко спасе́нию проше́ния, и сподо́би нас люби́ти и боя́тися Тебе́ от всего́ се́рдца на́шего, и твори́ти во всех во́лю Твою́.
Возглас:
Я́ко благ и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
И по возгласе, стихословится:
Из глубины́ воззва́х к Тебе́:
Диакон:
Па́ки и па́ки ми́ром Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Священник возглашает:
Я́ко Ты еси́ Бог наш, Бог ми́ловати и спаса́ти, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
И поется: Го́споди, воззва́х к Тебе́:
И диакон кадит по чину. Вход с кадильницею, без Евангелиа. Егда же имать честися Евангелие, в празднование храма, или святаго, тогда вход творит со Евангелием.
Молитва входа:
Ве́чер и зау́тра и полу́дне, хва́лим, благослови́м, благодари́м и мо́лимся Тебе́, Влады́ко всех: испра́ви моли́тву на́шу, я́ко кади́ло пред Тобо́ю, и не уклони́ се́рдец на́ших в словеса́ или́ в помышле́ния лука́вствия, но изба́ви нас от всех ловя́щих ду́ши на́ша, я́ко к Тебе́, Го́споди Го́споди, о́чи наши, и на Тя упова́хом, да не посрами́ши нас, Бо́же наш. Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.
По конце же стихир, глаголет диакон, или священник возгласно:
Прему́дрость, про́сти.
И поют лики: Све́те ти́хий:
Диакон: Во́нмем.
Священник: Мир всем.
Лик: И ду́хови твоему́.
Диакон: Прему́дрость.
Чтец: Проки́мен:
Диакон: Прему́дрость.
Чтец: Бытия́ чте́ние:
Диакон: Во́нмем.
И Бытие:
Диакон: Прему́дрость.
И вторый прокимен.
Посем возглашает диакон: Повели́те.
Священник же, взем обема рукама кадильницу и свещник со свещею, стоит пред святою трапезою, зря к востоком, и назнаменуя крест, глаголет:
Прему́дрость, про́сти.
Таже обратяся на запад к народу, глаголет:
Све́т Христо́в просвеща́ет всех.
Чтец: При́тчей чте́ние.
Диакон: Во́нмем. И притча.
И по исполнении, глаголет священник:
Мир ти́.
И чтец: И ду́хови твоему́.
Диакон: Прему́дрость.
Чтец поет:
Да испра́вится моли́тва моя́, / я́ко кади́ло пред Тобо́ю, / воздея́ние руку́ мое́ю, / же́ртва вече́рняя.
И по пении чтеца, лик поет тоже.
Таже чтец, стих 1: Го́споди, воззва́х к Тебе́, услы́ши мя, / вонми́ гла́су моле́ния моего́, / внегда́ воззва́ти ми к Тебе́.
Лик: Да испра́вится:
Чтец, стих 2: Положи́, Го́споди, хране́ние усто́м мои́м, / и дверь огражде́ния о устна́х мои́х.
Лик: Да испра́вится:
Чтец, стих 3: Не уклони́ се́рдце мое́ в словеса́ лука́вствия, / непщева́ти вины́ о гресе́х.
Лик: Да испра́вится:
И паки чтец поет: Да испра́вится моли́тва моя́, / я́ко кади́ло пред Тобо́ю.
И лик поет: Воздея́ние руку́ мое́ю, / же́ртва вече́рняя.
Подобает ведати, егда чтец поет: Да испра́вится моли́тва моя́, я́ко кади́ло пред Тобо́ю: вси людие сущии во храме и во олтаре, стоят на коленах молящеся. Егда же начнет: Воздея́ние руку́ мое́ю: востают. На прочиих же стисех, при пении Да испра́вится: егда который лик поет, и вся страна стоит, вторый же лик и страна народа колена приклоняют. Иерей же, стоя во олтаре пред святою трапезою, прием кадильницу с фимиамом, кадит. Егда же чтец поет последнее Да испра́вится, тогда и сам иерей, отдав кадильницу диакону, приклоняет колена, моляся.
И по исполнении творим поклоны три:
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Поклон.
Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Поклон.
Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. Поклон.
(Аще празднуется святому, или храмовый праздник прилучится в постныя дни, тогда глаголет диакон, или иерей: Во́нмем, и чтец прокимен Апостола, и чтется Апостол, и Аллилуиа поется, и чтение Евангелия, таже ектения сия:)
По Да испра́вится: же,
глаголет диакон ектению.
Рцем вси́ от всея́ души́, и от всего́ помышле́ния на́шего рцем.
Лик: Го́споди, поми́луй.
Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.
Лик: Го́споди, поми́луй.
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Лик: Го́споди, поми́луй, трижды.
Еще́ мо́лимся о Вели́ком Господи́не и отце́ на́шем, Святе́йшем Патриа́рхе (имярек), и о господи́не на́шем преосвяще́ннейшем митрополи́те (или архиепи́скопе, или епи́скопе) (имя рек), и о всей во Христе́ бра́тии на́шей.
Лик: Го́споди, поми́луй, трижды.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Лик: Го́споди, поми́луй, трижды.
Еще́ мо́лимся о бра́тиях на́ших, свяще́нницех, священномона́сех, и всем во Христе́ бра́тстве на́шем.
Лик: Го́споди, поми́луй, трижды.
Еще́ мо́лимся о блаже́нных и приснопа́мятных святе́йших патриа́рсех правосла́вных и созда́телех свята́го хра́ма сего́ (аще во обители: святы́я оби́тели сея́), и о всех пре́жде почи́вших отце́х и бра́тиях, зде лежа́щих и повсю́ду, правосла́вных.
Лик: Го́споди, поми́луй, трижды.
Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих, бра́тии свята́го хра́ма сего́ (аще во обители: святы́я оби́тели сея́).
Лик: Го́споди, поми́луй, трижды.
Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.
Лик: Го́споди, поми́луй, трижды.
Молитва прилежнаго моления:
Го́споди Бо́же наш, приле́жное сие́ моле́ние приими́ от Твои́х раб, и поми́луй нас по мно́жеству ми́лости Твоея́, и щедро́ты Твоя́ низпосли́ на ны и на вся лю́ди Твоя́, ча́ющыя от Тебе́ бога́тыя ми́лости.
Возглашение:
Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Паки диакон глаголет ектению:
Помоли́теся, оглаше́ннии, Го́сподеви.
Лик: Го́споди, поми́луй.
Ве́рнии, о оглаше́нных помо́лимся, да Госпо́дь поми́лует их.
Лик: Го́споди, поми́луй.
Огласи́т их сло́вом и́стины.
Лик: Го́споди, поми́луй.
Откры́ет им Ева́нгелие пра́вды.
Лик: Го́споди, поми́луй.
Соедини́т их святе́й Свое́й собо́рней и апо́стольстей Це́ркви.
Лик: Го́споди, поми́луй.
Спаси́, поми́луй, заступи́ и сохрани́ их, Бо́же, Твое́ю благода́тию.
Лик: Го́споди, поми́луй.
Оглаше́ннии, главы ва́ша Го́сподеви приклони́те.
Лик: Тебе́, Го́споди.
Молитва о оглашенных:
Бо́же, Бо́же наш, созда́телю и соде́телю всех, и́же всем хотя́й спасти́ся и в ра́зум и́стины приити́, при́зри на рабы́ Твоя́ оглаше́нныя, и изба́ви их дре́вния пре́лести и ко́зни сопроти́внаго: и призови́ их в жизнь ве́чную, просвеща́я их ду́ши и телеса́, и сопричита́я их слове́сному Твоему́ ста́ду, на не́мже и́мя Твое́ свято́е нарица́ется.
Возгласно:
Да и ти́и с на́ми сла́вят пречестно́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в.
Лик: Ами́нь.
Паки диакон:
Ели́цы оглаше́ннии, изыди́те, оглаше́ннии изыди́те, ели́цы оглаше́ннии, изыди́те. Да ни кто от оглаше́нных, ели́цы ве́рнии, па́ки и па́ки ми́ром Го́споду помо́лимся.
Лик: Го́споди, поми́луй.
Зри. Сия точию глаголются до среды четвертыя седмицы поста. От среды же средопостныя, по еже рещи священнику: Да и ти́и с на́ми сла́вят: глаголются и сия диаконства от диакона, на Преждеосвященных точию Литургиах, аще и празднуемый день, кроме суббот и недель.
Ели́цы оглаше́ннии, изыди́те, оглаше́ннии изыди́те. Ели́цы ко просвеще́нию, изыди́те. Помоли́теся и́же ко просвеще́нию.
Лик: Го́споди, поми́луй.
Ве́рнии, о и́же ко свято́му просвеще́нию гото́вящихся бра́тиях и спасе́нии их, Го́споду помо́лимся.
Лик: Го́споди, поми́луй.
Я́ко да Госпо́дь Бог наш утверди́т их и укрепи́т.
Лик: Го́споди, поми́луй.
Просвети́т их просвеще́нием ра́зума и благоче́стия.
Лик: Го́споди, поми́луй.
Сподо́бит их во вре́мя благопотре́бно ба́ни пакибытия́, оставле́ния грехо́в и оде́жди нетле́ния.
Лик: Го́споди, поми́луй.
Породи́т их водо́ю и Ду́хом.
Лик: Го́споди, поми́луй.
Да́рует им соверше́ние ве́ры.
Лик: Го́споди, поми́луй.
Сопричте́т их свято́му Своему́ и избра́нному ста́ду.
Лик: Го́споди, поми́луй.
Спаси́, поми́луй, заступи́ и сохрани́ их, Бо́же, Твое́ю благода́тию.
Лик: Го́споди, поми́луй.
И́же ко просвеще́нию, главы ва́ша Го́сподеви приклони́те.
Лик: Тебе́, Го́споди.
Молитва о готовящихся
ко святому просвещению:
Яви́, Влады́ко, лице́ Твое́ на и́же ко свято́му просвеще́нию гото́вящихся и жела́ющих грехо́вную скве́рну оттрясти́. Озари́ их помышле́ние, извести́ я́ в ве́ре, утверди́ в наде́жди, соверши́ в любви́, у́ды че́стны Христа́ Твоего́ покажи́, да́вшаго Себе́ избавле́ние о душа́х на́ших.
Возглас:
Я́ко Ты еси́ просвеще́ние на́ше, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Диакон:
Ели́цы ко просвеще́нию, изыди́те, и́же ко просвеще́нию, изыди́те, ели́цы оглаше́ннии, изыди́те. Да никто́ от оглаше́нных, ели́цы ве́рнии, па́ки и па́ки ми́ром Го́споду помо́лимся.
Лик: Го́споди, поми́луй.
Даже до зде, яже от среды средопостныя.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Диакон: Прему́дрость.
Молитва верных первая:
Бо́же вели́кий и хва́льный, и́же животворя́щею Христа́ Твоего́ сме́ртию в нетле́ние нас от тле́ния преста́вивый, Ты вся на́ша чу́вства стра́стнаго умерщвле́ния свободи́, блага́го тем влады́ку вну́тренний по́мысл приста́вив; и о́ко у́бо да неприо́бщно бу́дет вся́каго лука́ваго зре́ния, слух же словесе́м пра́здным невхо́ден, язы́к же да очи́стится от глаго́л неподо́бных. Очи́сти же на́ша устне́, хва́лящия Тя, Го́споди; ру́ки на́ша сотвори́ злы́х у́бо оша́ятися дея́ний, де́йствовати же то́чию я́же Тебе́ благоуго́дная, вся на́ша у́ды и мысль Твое́ю утвержда́я благода́тию.
Священник возглашает:
Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Диакон:
Па́ки и па́ки ми́ром Го́споду помо́лимся.
Лик: Го́споди, поми́луй.
Егда священник един служит, сия не глаголет:
О свы́шнем ми́ре и спасе́нии душ на́ших, Го́споду помо́лимся.
Лик: Го́споди, поми́луй.
О ми́ре всего́ мiра, благостоя́нии святы́х Бо́жиих церкве́й и соедине́нии всех, Го́споду помо́лимся.
Лик: Го́споди, поми́луй.
О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.
Лик: Го́споди, поми́луй.
О изба́витися нам от вся́кия ско́рби, гне́ва и ну́жды, Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Прему́дрость.
Молитва верных вторая:
Влады́ко святы́й, преблаги́й, мо́лим Тя, в ми́лости бога́таго, ми́лостива бы́ти нам, гре́шным, и досто́йны нас сотвори́ подъя́тия Единоро́днаго Твоего́ Сы́на и Бо́га на́шего, Царя́ Сла́вы. Се бо пречи́стое Его́ Те́ло и животворя́щая Кровь, в настоя́щий час входя́щия, на та́йней сей предложи́тися и́мут трапе́зе, от мно́жества Во́инства небе́снаго неви́димо дориноси́ма. И́хже прича́стие неосужде́нно нам да́руй, да те́ми мы́сленным о́ком озаря́еми, сы́нове све́та и дне бу́дем.
Священник возглашает:
По да́ру Христа́ Твоего́, с Ни́мже благослове́н еси́, со Пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.
Лик: Ами́нь.
И поется:
Ны́не Си́лы Небе́сныя с на́ми неви́димо слу́жат, / се бо вхо́дит Ца́рь Сла́вы, се́ же́ртва та́йная соверше́на дорино́сится. / Ве́рою и любо́вию присту́пим, / да причастницы жи́зни ве́чныя бу́дем. / Аллилу́иа, аллилу́иа, аллилу́иа.
Сему же певаему, входит диакон северною страною во святый олтарь и кадит святую трапезу, и святое предложение, и священника, и ставше вкупе, глаголют: Ны́не Си́лы Небе́сныя: трижды. И поклонившеся трижды, отходят и преносят Святыя Дары по обычаю, идуще же ничтоже глаголют. И вшед поставляет я священник по обычаю на святей трапезе, и покрывает воздухом, ничесоже глаголя над ними, точию кадит я.
Таже диакон, взем время, исходит на обычное место и глаголет диаконства:
Испо́лним вече́рнюю моли́тву на́шу Го́сподеви.
Лик: Го́споди, поми́луй.
О предложе́нных и Преждеосвяще́нных Честны́х Даре́х, Го́споду помо́лимся.
Лик: Го́споди, поми́луй.
Я́ко да человеколю́бец Бог наш, прие́м я́ во святы́й и пренебе́сный и мы́сленный Свой же́ртвенник, в воню́ благоуха́ния духо́внаго, возниспо́слет нам Боже́ственную благода́ть и дар Свята́го Ду́ха, помо́лимся.
Лик: Го́споди, поми́луй.