Тропарь Кресту и молитва за Отечество
Спаси́, Го́споди, лю́ди Твоя́, и благослови́ достоя́ние Твоé, побéды на сопроти́вныя да́руя, и Твоé сохраня́я Кресто́м Твои́м жи́тельство.
Молитва о живых
Спаси́, Го́споди, и поми́луй рабов Твои́х: отца́ моего́ духо́внаго (имя), роди́телей мои́х (имена их), сро́дников (имена), нача́льников, наста́вников, благодéтелей (имена), и всех правосла́вных христиа́н (поклон). Изба́ви их от вся́кия ско́рби, гнéва и ну́жды (поклон), от вся́кия болéзни душéвныя и телéсныя (поклон). Прости́ им вся́кое согрешéние, во́льное и нево́льное (поклон) и душа́м на́шим полéзная сотвори́ (поклон).
Молитва о усопших
Упоко́й, Го́споди, ду́ши усо́пших раб Твои́х: [роди́телей мои́х], сро́дников, благодéтелей (имена их), и всех правосла́вных христиа́н (поклон), и ели́ко в житии́ сем я́ко человéцы согреши́ша, Ты же, я́ко Человеколю́бец Бог, прости́ их и поми́луй (поклон), вéчныя му́ки изба́ви (поклон), Небéсному Ца́рствию прича́стники учини́ (поклон) и душа́м на́шим полéзная сотвори́ (поклон).
Окончание молитв
Досто́йно есть я́ко вои́стинну блажи́ти Тя, Богоро́дицу, Присноблажéнную и Пренепоро́чную и Ма́терь Бо́га на́шего. Честнéйшую Херуви́м и сла́внейшую без сравнéния Серафи́м, без истлéния Бо́га Сло́ва ро́ждшую, су́щую Богоро́дицу Тя велича́ем. (Поклон.)
[От Пасхи до Вознесения вместо этой молитвы читается припев и ирмос 9-й песни Пасхального канона:
А́нгел вопия́ше Благода́тней: Чи́стая Дéво, ра́дуйся! И па́ки реку́: ра́дуйся! Твой Сын воскрéсе триднéвен от гро́ба и мéртвыя воздви́гнувый; лю́дие, весели́теся!
Свети́ся, свети́ся, но́вый Иерусали́ме, сла́ва бо Госпо́дня на Тебé возсия́. Лику́й ны́не и весели́ся, Сио́не. Ты же, Чи́стая, красу́йся, Богоро́дице, о воста́нии Рождества́ Твоéго́.
В двунадесятые праздники читается задостойник праздника.]
Сла́ва, и ны́не: Го́споди, поми́луй. (Трижды.)
Го́споди Иису́се Христé, Сы́не Бо́жий, моли́твами Пречи́стыя Твоея́ Ма́тере, преподо́бных и богоно́сных отéц на́ших и всех святы́х поми́луй и спаси́ нас, я́ко Благ и Человеколю́бец. Ами́нь.
Молитвы на сон грядущим
Во и́мя Отца́, и Сы́на, и Свята́го Ду́ха. Ами́нь.
Моли́твами святы́х оте́ц на́ших, Го́споди Иису́се Христé Бо́же наш, поми́луй нас. Ами́нь.
Сла́ва Тебé, Бо́же наш, сла́ва Тебé.
Царю́ Небéсный, Утéшителю, Ду́ше и́стины, И́же вездé сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия сквéрны, и спаси́, Бла́же, ду́ши на́ша.
[От Пасхи до Вознесения вместо этой молитвы читается тропарь:
Христо́с воскрéсе из мéртвых, смéртию смерть попра́в, и су́щим во гробéх живо́т дарова́в. (Трижды.)
От Вознесения до Троицы после молитвы предначинательной сразу читаем «Святы́й Бо́же…».]
Святы́й Бо́же, Святы́й Крéпкий, Святы́й Безсмéртный, поми́луй нас. (Трижды.)
Сла́ва Отцу́ и Сы́ну и Свято́му Ду́ху, и ны́не и при́сно и во вéки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ нéмощи на́ша, и́мене Твоéго́ ра́ди.
Го́споди, поми́луй. (Трижды.) Сла́ва, и ны́не:
О́тче наш, И́же еси́ на Небесéх, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставляем должнико́м на́шим; и не введи́ нас во искушéние, но изба́ви нас от лука́ваго.
Тропари
Поми́луй нас, Го́споди, поми́луй нас; вся́каго бо отвéта недоумéюще, сию́ Ти моли́тву, я́ко Влады́це, грéшнии прино́сим: поми́луй нас.
Сла́ва: Го́споди, поми́луй нас, на Тя бо упова́хом; не прогнéвайся на ны зело́, нижé помяни́ беззако́ний на́ших, но при́зри и ны́не, я́ко благоутро́бен, и изба́ви ны от враг на́ших; Ты бо еси́ Бог наш, и мы лю́дие Твои́, вси дела́ руку́ Твоéю, и и́мя Твоé призыва́ем.
И ны́не: Милосéрдия двéри отвéрзи нам, благословéнная Богоро́дице, надéющиися на Тя да не поги́бнем, но да изба́вимся Тобо́ю от бед: Ты бо еси́ спасéние ро́да христиа́нскаго.
Го́споди, поми́луй. (12 раз.)
Молитва 1-я, святого Макария Великого, к Богу Отцу
Бо́же вéчный и Царю́ вся́каго созда́ния, сподо́бивый мя да́же в час сей доспéти, прости ми грехи́, я́же сотвори́х в сей день дéлом, сло́вом и помышлéнием, и очи́сти, Го́споди, смирéнную мою́ ду́шу от вся́кия сквéрны пло́ти и ду́ха. И даждь ми, Го́споди, в нощи́ сей сон прейти́ в ми́ре, да воста́в от смирéннаго ми ло́жа, благоугожду́ пресвято́му и́мени Твоéму́, во вся дни живота́ моего́, и поперу́ борю́щия мя враги́ плотски́я и безпло́тныя. И изба́ви мя, Го́споди, от помышлéний су́етных, оскверня́ющих мя, и по́хотей лука́вых. Я́ко Твоé есть ца́рство и си́ла и сла́ва, Отца́ и Сы́на и Свята́го Ду́ха, ны́не и при́сно и во вéки веко́в. Ами́нь.
Молитва 2-я, святого Антиоха, ко Господу нашему Иисусу Христу
Вседержи́телю, Сло́во О́тчее, Сам совершéн сый Иису́се Христé, мно́гаго ра́ди милосéрдия Твоего tникогдажt е отлучайt ся мене, t раба tТвоéго, t но всегда́ во мне почива́й. Иису́се, до́брый Па́стырю Твои́х овéц, не преда́ждь менé крамолé змии́не, и жела́нию сатанину́ не оста́ви менé, я́ко сéмя тли во мне есть. Ты у́бо, Го́споди Бо́же покланя́емый, Царю́ Святы́й, Иису́се Христé, спя́ща мя сохрани́ немерца́ющим свéтом, Ду́хом Твои́м Святы́м, И́мже освяти́л еси́ Твоя́ ученики́. Даждь, Го́споди, и мне, недосто́йному рабу́ Твоéму́, спасéние Твоé на ло́жи моéм: просвети́ ум мой свéтом ра́зума свята́го Ева́нгелия Твоéго́, ду́шу любо́вию Креста́ Твоего́, сéрдце чистото́ю словесé Твоего́, тéло моé Твоéю стра́стию безстра́стною, мысль мою́ Твои́м смирéнием сохрани́, и воздви́гни мя во врéмя подо́бно на Твоé славосло́вие. Я́ко препросла́влен еси́ со Безнача́льным Твои́м Отцéм и с Пресвяты́м Ду́хом во вéки. Ами́нь.
Молитва 3-я, ко Пресвятому Духу
Го́споди, Царю́ Небéсный, Утéшителю, Ду́ше и́стины, умилосéрдися и поми́луй мя, грéшнаго раба́ Твоего́, и отпусти́ ми недосто́йному, и прости́ вся, ели́ка Ти согреши́х днесь я́ко человéк, па́че же и не я́ко человéк, но и горéе скота́, во́льныя моя́ грехи́ и нево́льныя, вéдомыя и невéдомыя: я́же от ю́ности и от нау́ки злы, и я́же суть от на́гльства и уны́ния. А́ще и́менем Твои́м кля́хся, или́ поху́лих é в помышлéнии моéм; или́ кого́ укори́х; или́ оклевета́х кого́ гнéвом мои́м, или́ опеча́лих, или́ о чем прогнéвахся; или́ солга́х, или́ безго́дно спах, или́ нищ прии́де ко мне, и презрéх его́; или́ бра́та моего́ опеча́лих, или́ сва́дих, или́ кого́ осуди́х; или́ развелича́хся, или́ разгордéхся, или́ разгнéвахся; или́ стоя́щу ми на моли́тве, ум мой о лука́вствии ми́ра сего́ подви́жеся, или́ развращéние помы́слих; или́ объядо́хся, или́ опи́хся, или́ без ума́ смея́хся; или́ лука́вое помы́слих, или́ добро́ту чужду́ю ви́дев, и то́ю уя́звен бых сéрдцем; или́ неподо́бная глаго́лах, или́ греху́ бра́та моего́ посмея́хся, моя́ же суть безчи́сленная согрешéния; или́ о моли́тве не ради́х, или́ и́но что содéях лука́вое, не по́мню, та бо вся и бо́льша сих содéях. Поми́луй мя, Тво́рче мой Влады́ко, уны́лаго и недосто́йнаго раба́ Твоего́, и оста́ви ми, и отпусти́, и прости́ мя, я́ко Благ и Человеколю́бец, да с ми́ром ля́гу, усну́ и почи́ю, блу́дный, грéшный и окая́нный аз, и поклоню́ся, и воспою́, и просла́влю пречестно́е и́мя Твоé, со Отцéм, и Единоро́дным Его́ Сы́ном, ны́не и при́сно и во вéки. Ами́нь.
Молитва 4-я, святого Макария Великого
Что́ Ти принесу́, или́ что́ Ти возда́м, великодарови́тый Безсмéртный Царю́, щéдре и Человеколю́бче Го́споди, я́ко леня́щася менé на Твоé угождéние, и ничто́же бла́го сотво́рша, привéл еси́ на конéц мимошéдшаго дне сего́, обращéние и спасéние души́ моéй стро́я? Ми́лостив ми бу́ди грéшному и обнажéнному вся́каго дéла бла́га, возста́ви па́дшую мою́ ду́шу, оскверни́вшуюся в безмéрных согрешéниих, и отыми́ от менé весь по́мысл лука́вый ви́димаго сего́ жития́. Прости́ моя́ согрешéния, еди́не Безгрéшне, я́же Ти согреши́х в сей день, вéдением и невéдением, сло́вом, и дéлом, и помышлéнием, и всéми мои́ми чу́вствы. Ты Сам, покрыва́я, сохрани́ мя от вся́каго сопроти́внаго обстоя́ния Божéственною Твоéю вла́стию, и неизречéнным человеколю́бием, и си́лою. Очи́сти, Бо́же, очи́сти мно́жество грехо́в мои́х. Благоволи́, Го́споди, изба́вити мя от сéти лука́ваго, и спаси́ стра́стную мою́ ду́шу, и осени́ мя свéтом лица́ Твоего́, егда́ прии́деши во сла́ве, и неосуждéнна ны́не сном усну́ти сотвори́, и без мечта́ния, и несмущéн по́мысл раба́ Твоего́ соблюди́, и всю сатанину́ дéтель отжени́ от менé, и просвети́ ми разу́мныя о́чи сердéчныя, да не усну́ в смерть. И посли́ ми А́нгела ми́рна, храни́теля и наста́вника души́ и тéлу моему́, да изба́вит мя от враг мои́х; да воста́в со одра́ моего́, принесу́ Ти благода́рственныя мольбы́. Ей, Го́споди, услы́ши мя грéшнаго и убо́гаго раба́ Твоéго́, изволéнием и со́вестию; да́руй ми воста́вшу словесéм Твои́м поучи́тися, и уны́ние бесо́вское дале́че от менé отгна́но бы́ти сотвори́ Твои́ми А́нгелы; да благословлю́ и́мя Твоé свято́е, и просла́влю, и сла́влю Пречи́стую Богоро́дицу Мари́ю, Ю́же дал еси́ нам грéшным заступлéние, и прии́ми Сию́ моля́щуюся за ны: вéм бо, я́ко подража́ет Твоé человеколю́бие, и моля́щися не престаéт. Тоя́ заступлéнием, и Честна́го Креста́ зна́мением, и всех святы́х Твои́х ра́ди, убо́гую ду́шу мою́ соблюди́, Иису́се Христé Бо́же наш, я́ко Свят еси́ и препросла́влен во вéки. Ами́нь.
Молитва 5-я
Го́споди Бо́же наш, éже согреши́х во дни сем сло́вом, дéлом и помышлéнием, я́ко Благ и Человеколю́бец прости́ ми. Ми́рен сон и безмятéжен да́руй ми. А́нгела Твоего́ храни́теля посли́, покрыва́юща и соблюда́юща мя от вся́каго зла, я́ко Ты еси́ храни́тель душа́м и телесéм на́шим, и Тебé сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во вéки веко́в. Ами́нь.
Молитва 6-я
Го́споди Бо́же наш, в Него́же вéровахом, и Его́же и́мя па́че вся́каго и́мене призыва́ем, даждь нам, ко сну отходя́щим, осла́бу души́ и тéлу; и соблюди́ нас от вся́каго мечта́ния, и тéмныя сла́сти кромé; уста́ви стремлéние страстéй; угаси́ разжжéния воста́ния телéснаго. Даждь нам целому́дренне пожи́ти дéлы и словесы́; да добродéтельное жи́тельство восприéмлюще, обетова́нных не отпадéм благи́х Твои́х, я́ко благословéн еси́ во вéки. Ами́нь.
Молитва 7-я, святого Иоанна Златоуста
(24 молитвы, по числу часов дня и ночи)
1Го́споди, не лиши́ менé небéсных Твои́х благ. 2Го́споди, изба́ви мя вéчных мук. 3Го́споди, умо́м ли или помышлéнием, сло́вом или́ дéлом согреши́х, прости́ мя. 4Го́споди, изба́ви мя вся́каго невéдения и забвéния, и малоду́шия, и окаменéннаго нечу́вствия. 5Го́споди, изба́ви мя от вся́каго искушéния. 6Го́споди, просвети́ моé сéрдце, éже помрачи́ лука́вое похотéние. 7Го́споди, аз я́ко человéк согреши́х, Ты же, я́ко Бог щедр, поми́луй мя, ви́дя нéмощь души́ моея́. 8Го́споди, посли́ благода́ть Твою́ в по́мощь мне, да просла́влю и́мя Твоé свято́е. 9Го́споди Иису́се Христé, напиши́ мя раба́ Твоего́ в кни́зе живо́тней и да́руй ми конéц благи́й. 10Го́споди Бо́же мой, а́ще и ничто́же бла́го сотвори́х пред Тобо́ю, но даждь ми по благода́ти Твоéй, положи́ти нача́ло благо́е. 11Го́споди, окропи́ в сéрдце моéм ро́су благода́ти Твоея́. 12Го́споди небесé и земли́, помяни́ мя грéшнаго раба́ Твоего́, сту́днаго и нечи́стаго, во Ца́рствии Твоéм. Ами́нь.
1Го́споди, в покая́нии прии́ми мя. 2Го́споди, не оста́ви менé. 3Го́споди, не введи́ менé в напа́сть. 4Го́споди, даждь ми мысль бла́гу. 5Го́споди, даждь ми слéзы, и па́мять смéртную, и умилéние. 6Го́споди, даждь ми по́мысл исповéдания грехо́в мои́х. 7Го́споди, даждь ми смирéние, целому́дрие и послуша́ние. 8Го́споди, даждь ми терпéние, великоду́шие и кро́тость. 9Го́споди, всели́ в мя ко́рень благи́х, страх Твой в сéрдце моé. 10Го́споди, сподо́би мя люби́ти Тя от всея́ души́ моея́ и помышлéния и твори́ти во всем во́лю Твою́. 11Го́споди, покры́й мя от человéк нéкоторых, и бесо́в, и страстéй, и от вся́кия ины́я неподо́бныя вéщи. 12Го́споди, вéси, я́ко твори́ши, я́коже Ты во́лиши, да бу́дет во́ля Твоя́ и во мне грéшнем, я́ко благословéн еси́ во вéки. Ами́нь.
Молитва 8-я, ко Господу нашему Иисусу Христу
Го́споди Иису́се Христé Сы́не Бо́жий, ра́ди Честнéйшия Ма́тере Твоея́ и безпло́тных Твои́х А́нгел, Проро́ка же и Предтéчи и Крести́теля Твоего́, богоглаго́ливых же апо́стол, свéтлых и добропобéдных му́ченик, преподо́бных и богоно́сных отéц, и всех святы́х моли́твами, изба́ви мя настоя́щаго обстоя́ния бесо́вскаго. Ей, Го́споди мой и Тво́рче, не хотя́й смéрти грéшнаго, но я́коже обрати́тися и жи́ву бы́ти ему́, даждь и мне обращéние окая́нному и недосто́йному; изми́ мя от уст па́губнаго зми́я, зия́ющаго пожрéти мя и свести́ во ад жи́ва. Ей, Го́споди мой, утешéние моé, И́же менé ра́ди окая́ннаго в тлéнную плоть оболки́йся, исто́ргни мя от окая́нства, и утешéние пода́ждь души́ моéй окая́нней. Всади́ в сéрдце моé твори́ти Твоя́ повелéния, и оста́вити лука́вая дея́ния, и получи́ти блажéнства Твоя́: на Тя́ бо, Го́споди, упова́х, спаси́ мя.
Молитва 9-я, ко Пресвятой Богородице, Петра Студийского
К Тебé Пречи́стей Бо́жией Ма́тери аз окая́нный припа́дая молю́ся: вéси, Цари́це, я́ко безпреста́ни согреша́ю и прогневля́ю Сы́на Твоéго́ и Бо́га моего́, и мно́гажды а́ще ка́юся, лож пред Бо́гом обрета́юся, и ка́юся трепéща: не ужéли Госпо́дь порази́т мя, и по часé па́ки та́яжде творю́; ведt ущи сия, t Владычt ице моя tГоспоже tБогородt ице, молю́, да поми́луеши, да укрепи́ши, и блага́я твори́ти да пода́си ми. Вéси бо, Влады́чице моя́ Богоро́дице, я́ко отню́д и́мам в нéнависти зла́я моя́ дела́, и всéю мы́слию люблю́ зако́н Бо́га моего́; но не вем, Госпожé Пречи́стая, отку́ду я́же ненави́жду, та и люблю́, а блага́я преступа́ю. Не попуща́й, Пречи́стая, во́ли моéй соверша́тися, не уго́дна бо есть, но да бу́дет во́ля Сы́на Твоего́ и Бо́га моего́: да мя спасéт, и вразуми́т, и пода́ст благода́ть Свята́го Ду́ха, да бых аз отсéле преста́л сквернодéйства, и прочéе пожи́л бых в повелéнии Сы́на Твоего́, Ему́же подоба́ет вся́кая сла́ва, честь и держа́ва, со Безнача́льным Его́ Отцéм, и Пресвяты́м и Благи́м и Животворя́щим Его́ Ду́хом, ны́не и при́сно и во вéки веко́в. Ами́нь.
Молитва 10-я, ко Пресвятой Богородице
Блага́го Царя́ блага́я Ма́ти, Пречи́стая и Благословéнная Богоро́дице Мари́е, ми́лость Сы́на Твоего́ и Бо́га на́шего излéй на стра́стную мою́ ду́шу и Твои́ми моли́твами наста́ви мя на дея́ния блага́я; да про́чее врéмя живота́ моего́ без поро́ка прейду́ и Тобо́ю рай да обря́щу, Богоро́дице Дéво, еди́на Чи́стая и Благословéнная.
Молитва 11-я, ко святому Ангелу хранителю
А́нгеле Христо́в, храни́телю мой святы́й и покрови́телю души́ и тéла моего́, вся ми прости́, ели́ка согреши́х во днéшний день, и от вся́каго лука́вствия проти́внаго ми врага́ изба́ви мя, да ни в ко́емже гресé прогнéваю Бо́га моего́; но моли́ за мя грéшнаго и недосто́йнаго раба́, я́ко да досто́йна мя пока́жеши бла́гости и ми́лости Всесвяты́я Тро́ицы и Ма́тере Го́спода моего́ Иису́са Христа́ и всех святы́х. Ами́нь.