Виктор Васильев, составитель жития и акафиста матушке Марии, по поводу обретения мощей сказал: "Для нас это малая Пасха. Святая преподобномученица Мария Гатчинская является единственной из числа новомучеников российских, чьи мощи не лежат под спудом, а обретены. Несмотря на тяжелую болезнь, святая не жаловалась, а всегда приходила на помощь нуждавшимся, прежде всего своим молитвенным подвигом. Говорили, что если матушка Мария помолилась, то все сбудется".
Места для паломничества
• Павловский собор, г. Гатчина, Ленинградская область. Здесь хранятся мощи святой преподобномученицы Марии Гатчинской.
• Поклонный крест на месте захоронения святой преподобномученицы Марии Гатчинской на Смоленском кладбище, рядом с часовней Ксении Блаженной. Санкт-Петербург.
Молитвы и акафист к святой преподобномученице Марии Гатчинской
Тропарь и молитвы к святой Марии Гатчинской
Тропарь, глас 4
Агница Твоя, Иисусе, Мария, /
утешение рабом Твоим в годину лютую явися, /
крепость веры и благочестия показавши, /
мучения претерпе от богоборцев. //
Тоя молитвами, яко Милостив, спаси души наша.
Кондак, глас 4
Страдалице и благовестнице пречудная, /
молитвеннице за всех скорбящих и страждущих, /
преподобномученице Мати Марие, /
молися Господу Богу со всеми новомучениками Российскими //
спасение нам даровати и велию милость.
Молитва первая
О святая преподобная мати Марие, молитвеннице за весь род христианский! Се мы, грехми и треволненьми житейскаго моря обуреваеми, от глубины сердечныя взываем ти: не остави нас, немощных, печальных и унылых призрением милостивнаго твоего заступления!
Во дни земнаго жития твоего явилася еси болящим безмездная целительница, заблуждшим наставница, скорбящим и обидимым утешительница милосердная и всем притекающим к тебе скорая помощница и чадолюбивая мати. И ныне вемы, яко дана тебе от Господа и Пречистой Богородицы благодать молитися за ны.
О верная слуго Христова, сторицею возрастившая данный тебе талант, уврачуй страсти душ и телес наших, укрепи в добродетели и настави на путь покаяния: умягчи наша злая и хладная сердца, да паче всего возлюбим Христа, в Немже и ближняго своего. Умоли Господа сил низпослати милость Свою многострадальному Отечеству нашему, да тихое и безмолвное житие поживем во всяком благочестии и чистоте: и тако достигнем в немятежное пристанище Небеснаго Царствия, идеже ты в незаходимей сияеши славе, воспевая со всеми святыми хвалебную песнь Отцу и Сыну и Святому Духу, ныне и присно и во веки веков. Аминь.
Молитва вторая
О достоблаженная старице наша, преподобная мати Марие, недужных и скорбных скорая утешительнице и целительнице! Приими ныне моление недостойных чад твоих и донеси сей малый плод сердец и устен наших ко престолу Божию, да предстательством твоим низпослет нам Милосердный Господь щедроты Своя: подаст благоденствие Отечеству нашему: избавит от труса, огня, меча, нашествия иноплеменник и междоусобныя брани: недужным дарует исцеление, скорбящим утешение: гордых смирит, нерадивых к покаянию обратит, монашествуюших дух в горении к Богу укрепит: всем Христианом подаст, яже ко спасению потребная: наипаче же явит нам милость на Страшнем судище Своем и вселит в обители Небесныя со всеми святыми: Емуже подобает хвала и слава, честь и держава, Отцу и Сыну и Святому Духу, ныне и присно и во веки веков. Аминь.
Молитва третья
О святая преподобная мати Марие! Подвигом добрым подвизалася на земли, восприяла еси на небесех венец правды, егоже уготовал Господь всем любящим Его. Темже предстояще пред образом твом честным, радуемся о преславнем скончании земнаго жития твоего и чтем святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством твоим, аще и недостойнии есмы, видети благая на земли живых, славяще дивного во святых Своих Бога, Отца и Сына и Святаго Духа, ныне и во веки веков. Аминь.
Акафист святой преподобномученице Марии Гатчинской, преславной покровительнице нашей
Кондак 1
Избранней Предвечным Господом и Возлюбленной Богоматерию, преславней и пречудней невесте и страстотерпице Христовой, наставнице, защитнице, утешительнице благодатней и небесной покровительнице нашей, благодарственная восписуем ти, молитвенницы твои, святая и всехвальная мати наша Марие. Ты же, яко имуще дерзновение ко Господу, от всяких бед, зол и болезней свобождай нас, с любовию, радостию и надеждою тебе ныне зовущих:
Радуйся, святая преподобная мати наша Марие, мученице Христова и наставнице богомудрая!
Икос 1
Ангелов и человеков Творец Всемудрый Господь Наш, дарова тя, блаженная мати наша Марие, яко многоценное сокровище, людем российским, во дни великия смуты и мятежа братоубийственнаго, да видяще равноангельное житие твое и выну текущий источник исцеляющей благодати, не погибнут до конца во гресех своих и обратятся в покаянии к Создателю своему, тебе же благодарственно воспоют похвальную песнь сице:
Радуйся, голубице, под кровом Всевышняго вогнездившаяся;
Радуйся, с мудрыми девами в брачный чертог радостно возшедшая;
Радуйся, звездо, во мраце безбожия светло возсиявшая;
Радуйся, житием твоим Солнце Правды, Христа проповедавшая;
Радуйся, страдания Его ради добропобедно претерпевшая;
Радуйся, венец нетленный от Подвигоположника приимшая;
Радуйся, достойныя плоды покаяния приносити нас научающая;
Радуйся, печали наша в умиленной радости растворяющая;
Радуйся, святая преподобная мати наша Марие, мученице Христова и наставнице богомудрая!
Кондак 2
Видя Господь благое сердца твоего изволение, яко издетска послужити Ему восхотела еси, призва тя на тесный и прискорбный путь подвиг многотрудных, к Царствию Небесному ведущий: Ты же всем сердцем, всею душею и всею крепостию твоею Бога возлюбивши непрестанно взывала еси: Аллилуиа.
Икос 2
Разумом богопросвещенным в познании истины Евангелия Христова преуспевала еси от утра жизни твоея, достоблаженная мати, мудростию духовною обогащаяся, исполняяся крепости божественныя, в добродетелех христианских невозвратно душу твою утверждая. Темже мы, покланяющеся милосердному Богу, такова дивна сокровища тебе даровавшему, во умилении глаголем ти:
Радуйся, добраго корене отрасле благородная;
Радуйся, лозо винограда Христова многоплодная;
Радуйся, пламенем божественныя любве от юности возжженная;
Радуйся, многими добродетельми от младости украшенная;
Радуйся, светом твоим нашу тьму греховную разгоняющая;
Радуйся, теплотою любви твоея наша хладная сердца согревающая;
Радуйся, козни вражия предстательством твоим разрушающая;
Радуйся, сладостию молитв твоих скорби наша растворяющая;
Радуйся, святая преподобная мати наша Марие, мученице
Христова и наставнице богомудрая!
Кондак 3
Силе духовней, от тебе исходящей, дивляхуся людие, наставницу добрую и милосердную утешительницу в тебя обретше: любовию твоею согреваеми, к тебе благодарением простирахуся, радостию воспевающе Богу: Аллилуиа.
Икос 3
Имела еси едино попечение, святая мати, да спасеши душу твою и представиши ю Христу. Благий же и Человеколюбец Господь, видев таковое твое произволение, призывает тя быти наставницей людей страждущих и в вере колеблемых, наставницей благой и утешительницей богомудрой, и безбоязненной проповедницею слова Божия в годину смут и гонений. Мы же тебе, яко верной служительнице Господней, вопием:
Радуйтеся, плач пред Богом и умиление блаженное обретшая;
Радуйтеся, смирением своим высокая, нищетою же богатая явившая; Радуйся, правду, мир и радость о Дусе Святе стяжавшая;
Радуйся, милосердием и любовию к ближним своим исполненная;
Радуйся, сердца наша благодатию Божиею, тебе данною, очищающая; Радуйся, очи наши духовныя к зрению Бога изощряющая.
Радуйся, к терпению бед, лишений и скорбей нас воодушевляющая; Радуйся, в пренесении испытаний и гонений нас укрепляющая;
Радуйся, святая преподобная мати наша Марие, мученице Христова и наставнице богомудрая!
Кондак 4
Буря беззаконий поколеба державу российскую в годину испытаний лютых: злоба и уныние, скорбь и рыдания исполниша многострадальное отечество наше. Тобою же, святая мати, и тебе единонравными, церковь русская враты адовыми не одолена сохранися. Людие же, видяще непоколебиму веру твою, и светильник твой присно горящ, наставлениями твоими укрепляемы, с надеждою воспеваху Всемогущему Богу: Аллилуиа.
Икос 4
Слышаша людие града Гатчины боговдохновенныя поучения твоя, богоносная мати, к покаянию и исправлению жительства своего устремившеся, от грехов и страстей отвращающеся, в разум истинный прихождаху, отчаяния и скорби своя верою и надеждою на Милосердие Божие досточудно побеждаху; и твоею учительною беседою назидающеся, образом же жития твоего умиляющеся, глаголаху:
Радуйся, в помрачении страстей пребывающих просветительнице;
Радуйся, в суете и самозабвении жительствующих вразумительнице;
Радуйся, в недоумении и заблуждении сущих руководительнице;
Радуйся, добре жити начинающих управительнице;
Радуйся, малодушием и унынием колеблемых укрепительнице;
Радуйся, в небрежении спящих возбудительнице;
Радуйся, бодрости и трезвения предобрая учительнице;
Радуйся, чистаго и непорочнаго жития неусыпающая хранительнице;
Радуйся, святая преподобная мати наша Марие, мученице Христова и наставнице богомудрая!
Кондак 5
Боготечную звезду зрим тя, угоднице Божия, тя бо, восприимшую великия страдания, прослави убо тя Господь, яко сбышаша на тебе словеса апостольския "сила Божия в немощи совершается", ты бо благодать Духа Всесвятаго восприяла еси и Его дарами ближним твоим с любовию послужила еси, в вере, надежде и любви богомудро их утверждая. Мы же, вся сия ныне поимнающе, взираем ныне с любовию на честный образ твой, приклоняем колена, со умилением поя: Аллилуиа.
Икос 5
Видеша тя, угоднице Божия, ближния и други твоя, яко воистинну сосуд избранный Божия благодати, егда богомудрым святителем Вениамина наставляема, чин ангельский восприяв, подвигов твоих богоугодных не оставила еси, святая Марие, но многообразными деяньми плоть твою усмиряя, в молитвах за церковь и отечество и трудех преуспевала еси. Мы же таковым подвигом твоим дивящеся, не престанем славити тя:
Радуйся, монашеского жития истинный ревнительнице;
Радуйся, иноческих обетов пламенный исполнительнице;
Радуйся, никогоже от приходящих к тебе отвергавшая;
Радуйся, любовию твоею вся покрывавщая;
Радуйся, яко тобою ум наш в Богомыслии научается;
Радуйся, яко тобою мрак неведения прогоняется;
Радуйся, от плевел ненависти сердца наша очищающая;
Радуйся, заповеди Евангельския исполняти нас подвизающая;
Радуйся, святая преподобная мати наша Марие, мученице Христова и наставнице богомудрая!
Кондак 6
Проповедницею быв житием твоим евангельских добродетелей, мати блаженная, плоть твою постом и молитвою поработила еси, своими великима подвигами всезлобнаго врага посрамила еси, и ко свету Христовой истины многия люди града Гатчины привела еси, поучая непрестанно молитися друг за друга и выну благодарити и славословити Милосерднаго Господа нашего, поя Ему: Аллилуиа.
Икос 6
Возсия немеркнущий свет Богопознания, в боголюбивой душе твоей, святая мати Марие, вознесе тя на высоту духовнаго совершенства, яко на некий таемный Фавор, отонюдуже и наша затемненным души твоим молитвенным пред Господем предстательством просвети, во еже глаголати тебе сия похвалы:
Радуйся, исполнение заветов пастыря кронштадтского явившая;
Радуйся, многих святых добродетели в себе совокупившая;
Радуйся, яко солнце, в Царствии Небесном сияющая;
Радуйся, в радости Творца благодарити нас побуждающая;
Радуйся, безвестная и тайная премудрости Божия нам открывающая;
Радуйся, благия мысли и чувства в недоумении нам сущим внушающая;
Радуйся, святыя желания и намерения ко спасению нашему в сердца нам влагающая;
Радуйся, от всея души и сердца возносимая к вам прошения наша исполняющая;
Радуйся, во всех нуждах, бедах и обстояниих нам помогающая.
Радуйся, святая преподобная мати наша Марие, мученице Христова и наставнице богомудрая!
Кондак 7
Хотящих восхвалити подвигов трудов твоих и чудная деяния, вразуми нас, святая мати наша Марие, недоумеем бо изрещи достойныя тебе хвалы. Обаче во всех трудех и подвизех благодать Божию в тебе видяще, воспеваем о тебе Христу Богу: Аллилуиа.
Икос 7
Новую тя исповедницу и мученицу Христову, на небесех и на земли Всеблагим Господем нашим прославленную, позна многострадальная Россия, ранами безчисленными изъязвленная, кровию мученическою обильно напоенная, увенчанная славою множества святых мужей и жен своих. Почитающе тя, богоблаженнная Марие, яко единую от сих достойнейших и славнейших дщерей российских, пение хвалебное приносим ти сице:
Радуйся, в неизреченной славе Творца миров созерцающая;
Радуйся, со всеми ангелы и святыми хвалу Ему воспевающая;
Радуйся, милосердие Бога Отца к нам приклоняющая;
Радуйся, о вечнем спасении нашем Христа-Спасителя умоляющая;
Радуйся, плоды (дары) Духа Святаго стяжати нам помогающая;
Радуйся, свято и праведно Всесвятую Богородицу почитати научающая;
Радуйся, кающимся слезы утешительныя низпосылающая;
Радуйся, пламень злобный струями любве твоея угошающая;
Радуйся, святая преподобная мати наша Марие, мученице Христова и наставнице богомудрая!
Кондак 8
Странницу и пришелицу помышляла еси в себе быти в мире сем, преблаженная мати Марие; темже грядущаго града Иерусалима Небеснаго взыскуя, вся помышления твоя к небеси непрестанно возносила еси, и яко в тимпане, во умерщвленнем телеси, сладце воспевала еси победную песнь Христу Богу: Аллилуиа.
Икос 8
Всю себе воли Господни предав, страдания Его ради за честь почитала еси, досточудная мати, егда нечестивии, видя плоды просвещения духовнаго, взращенныя тобою, взяша тя купно со сродники твоима и в темницу ввергоша; ты бо узах суще, от гонителей веры Христовой оскорбления, надругания, заушение и лютыя биения незлобливе прияла еси, молящее Всеблагаго Спасителя о даровании ти в муках терпения и во страдания – укрепления. Мы же, покланяющеся мужеству и долготерпению твоему, хваления приносим ти таковая:
Радуйся, последовательнице верная Распятаго Учителя;
Радуйся, споспешнице всеусердная ада Разрушителя;
Радуйся, страстотерпице, Христа безстрашно исповедавшая;
Радуйся, боязни и страха человеческаго не ведавшая;
Радуйся, крилами богомыслия сети вражия сокрушившая;
Радуйся, злобные умышления того доброславно посрамившая;
Радуйся, прощати и благословляти ближних нас научающая;
Радуйся, в кротости и смирении нас укрепляющая;
Радуйся, святая преподобная мати наша Марие, мученице Христова и наставнице богомудрая!
Кондак 9
Всякия болезни душевныя и телесныя, всякия беды нужды плоти и духа нашего избави нас, всехвальная Марие, да веру твою в Подателя жизни вечныя видевше, в вере нашей да укрепимся невозбранно и дерзновенно с тобою пети крепость дающему Богу: Аллилуия.
Икос 9
Ветия многовещанныя не возмогут по достоянию воспети страдания твоя за Христа, святая преподобная мати наша Марие, яко в темнице заточенная, угоднице Божия, николиже возроптала еси, поминающе глаголы Господни: "Блажени есте, егда поносят вам, и ижденут, и рекут всяк зол глагол, на вы лжуще Мене ради, радуйтеся и веселитеся, яко мзда ваша многа на небесех". Мы же, сии глаголы почитающе, поем:
Радуйся, временныя жизни покой, правды Божия ради презревшая;
Радуйся, за Христа узы и темницу всерадостно приявшая;
Радуйся, истинную радость во страданиих о Господе обретавшая;
Радуйся, сими страдании в подвизе Христовы любве возраставшая;
Радуйся, враги твоя в незлобии евангельском простившая.
Радуйся, образ терпения и себе отречения добльственне явившая;
Радуйся, тихий свет любве на всех обильно изливавшая;
Радуйся, множество людей окрест себе спасавшая;
Радуйся, святая преподобная мати наша Марие, мученице Христова и наставнице богомудрая!
Кондак 10
Спасти хотя душу свою, Богомудрая Марие, смирение крестное вкупе со иными добродетельми в дар Господу принесла еси, уничижающим, мучащим и гонящим тя николиже противляяся; пристанище последнее земнаго жития твоего в мрачней лечебнице темничней обрела еси, идеже ты вслед апостолу помышляла еси "аще бо живем, Господеви живем, аще бо умираем, Господеви умираем" (Рим. 14:8); благодатию Христовой вспомошествуема путь страданий добропобедно прошла еси, неустанно воспевая всечасно укреплявшему тя Господу: Аллилуиа.
Икос 10
Стену необориму стяжала еси благодать Господню, блаженная мати Марие, защищающую тя от враг невидимых, не могущих души твоея погубити: достойна бо тоя благодати явилася еси богоугодными труды твоими и умиленными молитвами и велиим упованием на Распятаго Спасителя, веровала бо еси несомненно, яко смерть тела не есть конец, что Сам Христос есть путь в святыне веры и в лице Своем – истина, и в таинствах благодатных, и в существе своем – жизнь безконечная. Мы же, неизреченное величие любви твоея к Богу воспеваем и велией вере твоей подражати желая, таковыя похвалы смиренне приносим ти:
Радуйся, во испытаниях своих веру крепку, яко Авраам, явившая;
Радуйся, в злостраданиях терпение твердое, яко Иов, показавшая;
Радуйся, не суетному унынию, но Божьему благоволению себе предавшая;
Радуйся, Христу Богу в кротости и смирении подражавшая;
Радуйся, во гласе пения ангельскаго на небо душею твоею воспарившая;
Радуйся, мученический полк и праведных лики на небесех возвеселившая;
Радуйся, с девствующими, яко девственница возвеличенная;
Радуйся, венцем нетленным от руки Христовы увенчанная;
Радуйся, святая преподобная мати наша Марие, мученице Христова и наставнице богомудрая!