И вас молю, аще кто где узрит ево письма подметныя*, предавайте огню господа ради, яко в них яд пишет мног сокровен и отсохлою своею рукою сеченою утвержает писанное: "сие-де писано рукою моею сеченою за православие, слушайте-де и сице веруйте, якоже писано". Называет себя святым, а явен враг божий. Исперва о казни нарочито говорил, а ныне онемел, при прежнем худо и говорит. Помните, писано: "и еже мнится имеяй, возьмется от него". А рука, отсеченой уд, исперва была цела, а ныне измозгла*. Он же со стыда ея велел в землю бросить. Видит сам, что нехорошо делает, а не хощет престать!
Да уж не о нем. Пропади он, враг проклятой, но вы господа ради блюдитеся ево учения. Лютой лис и обманщик, божится и ротится, хотя обольстити ково! Во един от дней отца Е[пифания] обольстя, и, ссоря со мною, говорит ему: "отче Епифаний, подвизайся всеми силами, как бы Аввакума преломить о образе троическом, и о прочих, и тогда-де наша будет добра".
А я, петь, коли послушаю, кроме писания о Христе? Обыкох бо я от купели троицу чести в трех образех по равенству, а не единицу жидовскую. Старец же прост человек, правду чаял шептание ево и напал на меня по ево учению всеми силами. Увы, горе часу тому, якоже пророк рече. Внимай, в конец да не растлиши. Тотчас было в погибель впал старец-от, на меня роптит, а мне с ним ростатися не хочется. Вздумал я потешить ево, пошел ночью ко врагу тому божию, как бы примирить ево. Прощаюся с ним и сам не знаю в чем. Он блюет на святую троицу, а я лише помикиваю, бытто и не слышу, токмо примиряю ево. И помиряся с ним, сказал старцу. Он рад, бедной, судит внешняя, а не внутренняя.
Пришел я в хижу свою, повалился спать. Вижу ся со старцем у церквицы некия, а одаль нас Ф[едор] д[ьякон] на холму высоком стоит со скоты и с немцами и с татарами. Старец же посла меня к нему, как на яве том было, так и тут видится, и горе и смех у беса тово блиско все. Пришел я к холму тому, к Ф[едору], он на меня почал сцать. На ноги мои мокрота та пловет. А се ноги мои стали гореть, зело больно горят, а я кричю: "господи, согреших, прости мя, окаяннаго!" Да не во сне уже, обудяся, горят. А некто, стоя, говорит мне: "то тебе за ходьбу!" Я молюся, ано не слушает, жгут ноги. Да он же, стоящей, рече: "вот еще за безумие твое в прибавку!" Да ну ж меня мучить, душить и ломать. Больно устряпал, покинул, и встать не могу. Лежа говорю: "благодарю тя, господи, – по писанию, – посылал еси ангелы лютыми путь сотворити, стезю гневу своему"*. Да сваляся с доски, кое-как лбом о землю, весь болю. Полехче мало стало, дьякона та опять проклял, да и оздоровел.
Ну же потом старца косить! Нечево о том много ковырять, и сами знаете, не до друшка стало – до своево брюшка, вправду осердился. Да после со старцем и помирился. А как бы не осердился, так бы меня самово велели до смерти забить, не подорожат, друг, тамо и не Аввакумом, много тое грязи у Христа наделано. Не тот А[ввакум], ино другой. А за ним дело не станет спасения человеческаго. Колесница та таки катится, как ей надобе. А[ввакум] п[ротопоп] бодрствовать станет господа ради, себе ему во грядущий век должная своя возьмет. А еже разленится, и ему кнут на спину. Не как Пашков – ременной*, но железо разженно огнем клокщущим. Лют есть он, братие, огнь, и вне и внутрь, наши кишки переест, проходя до членов же и мозгов, и до самыя окаянныя души. Потщимся будить друг друга нелицемерно, любя не токмо любовных, но и досадителей нам подобает любити, аще нас в душу не вредят. Любите враги ваша душеядцов же, еретиков, отгребайтеся. Аще спасение ваше вредят, подобает ненавидети их.
Послание Симеону, Ксении Ивановне и Александре Григорьевне
… Во странах сибирских от врага патриарха. Царие же тогда до меня зело добры быша. Егда же мя паки из Даур привезоша, тому лет 15, развратишася милыя мои други. Токмо добра была царица Марья*, а царя озлобили вожди злии и лукавыя власти, понеже приняли от Никона тово новизну ту. Как им сором покинуть стало, а мы обличать стали, так на бесстудие приидоша и сами глаголаша с нами: "хотя-де в черта веровати, да вам не покоримся!" Вселенские-те, было, и говорили взять старые те книги, да наши псы не восхотели, заупрямку им стало. Царь тот меня и зело милосердовал, да уже и ему нечево стало делать. Властишка те мне многия друзья духовныя были, да свратил бранью их, бывало так. Оне с сердца приговор написали сжечь меня да царица-покойница не дала. Да петь то много, возясь, что черти над попом, да и сюды послали. Я им, отсюду написав, послал всем фигуру. А бояроня-покойница, дочь мне была духовная, Феодосия Морозова, ревнивой человек была, свет моя, уставшицу ту, сестру свою Анну Веньяминовну* и в дому и в верху: "ты-де, блядь, Никоновы отирки, церковию колеблешь". А властей тех так же, бабоблудов. А отселе тож и им и досталь за беду стало. А Ртищевых тех ты и сам знаешь, да Артамон* заедино, наговоря царя со властьми, – возьми да пали бедных наших, и Соловки не пощадели. Ведаешь ты о сем и сам пространно, нечево мне ковырять много.
Оттоле и до днесь лежит устав той, тьмы тьмами и тысяща тысящами погублено народу. Да уже с горя милые, не хотя отступити бога, сами во огнь лезут христиане. Воистинну блажени и треблажени творящий таковая! И прежде сего при мучителях мнози во огнь сами дерзали, якоже и ныне воочию нашею бывает. Едина погибель: яко тогда идолу пожрати, тако и ныне от стараго благочестия отступити и лукавому духу поклонитися.
Аще бы кто разумел в новых книгах беды те, сам бы ся заморил не ядши. Во крещении напечатано: "но молим ти ся, господи, дух лукавый понеже помрачение помыслом наводяй"*. А в Шестодневе богородицу явно злословят, в слове Дамаскина Иоанна* переменили воровски. Евангельская речь: "и прият Иосиф жену свою и не знаяше ея, дондеже роди сына своего, первенца"*. И оне напечатали: "по сему-де не пресекается деторождение ея и по Христе". Я с ними говорил: "почто вы чистую деву бесчестите, глаголете, иных детей после Христа родила, яко и жиды глаголют, "дети быша со Иосифом"?" И оне токмо смеются: "надобе-де так". Я бы заедину ту богородицу пятью умер. Как бы мне мочь Илии пророка, всех бы еретиков тех, яко Илия, ножем переколол за владычицу ту, яко он в потоце Киссове пол-осма [74] ста перепластал, покойник, при Ахаве*. Сердит же был миленькой.
А во ином месте сокровенно напечатана Ариева ересь* сице: "аще кто речет, яко ты еси един бог, творяй чудеса – внутрь трижды, а иже исповесть сына единосущна отцу – вне трижды". Во-то каково красно сказывают: не единосущен сын отцу, но иного естества.
И все ли то в малых сих словесех могу тебе возвестить? И тремя теми персты Никон принудил царя креститися, то тем ум ево помрачил. Беда велика в трех перстах сих, глаголют богословци: змий, зверь, лжепророк являет в перстах сих, сиречь змий – диавол, зверь – антихрист, лжепророк – учитель лукавый, папа римский и патриарх руской, да и вси учители тому злому делу лжепророцы глаголются. Сам, собака, презрит свою душу, да в зазор пришед и протчих за собою же тянет. Не токмо о честных говорити, но и меньшие учители погуби.
Также здесь есть, в Пустозерье, попенко косой Оська Никольской. Не умеет трох свиней накормить, а губит людей, бутто и доброй еретик. Григорьем звали, байник, сын мне был духовной. Егда же еще в ызбах жили и после того, он [к] попенко на исповедь. Как причастил ево, так мужик и взбесился, да и без ума стал. Я с ним уведевся, говорю ему: "проклени попа тово со всею службою, так беси от тебя отступят. И я о тебе должен молити бога". И он говорит мне: "не могу-де никак тово сотворити: беси грозят, удавить хотят". Я и рукою махнул: "пропадай, – реку, – коли не хочешь обратиться". Послышу после, оно в бане и удавили черти. Таковы то оне, никонияне, человекогубцы, прелагатаи! После тово попенко той призвал меня к себе на лице свое и передо мною прощался и проклинал новизну ту. Я ево маслом помазал и потрахиль алтын в полтретьяцеть вздел на него, крест ему большой позолоченой дал ради поклонения тово. Агда же Артамон сюды приехал, и паки ево развратил. Артамон – ученой ловыга, и цареву душу в руках держал, а сия ему тварь – за ничто же.
Чесо ради много беседую о нем? Блюди и ты душу свою от него, держа старово отеческаго предания, и блажен будеши. И кая то игрушка душею играть настоящих ради временных? Есть пишет Исайя пророк сице, нарекая нам днесь: "размладел еси плотию и упитался еси сластьми, и светло имаши лице, юностию цветый, буй-силою. А наутре таже сый уныл и дряхл, и леты увянул или язею содручен онсица славный и богатством еловый зело, или самая постиже смерть. Увы! Где юность, где слава, где злато, и о здании, кони и колесницы четвероконныя? Вся с веком сим рассыпашася. Блажен человек, его же господь обрящет бдяща о единородной души, ему же слава в нетленых о господе.
Ксения Ивановна, учила ли ся еси, госпоже моя, псалмом, и како приносиши вечернюю песнь, и словесную службу сыну божию Христу? Разумно ли поешь псалом "Благослови, душе моя, господа"* о мирстем бытии, или учитися требуешь еще?
Да гряди убо, чадо, да тя повожу, прежде за руку ем, по граду и покажу ти сокровенная чюдеса великаго сего града и разумнаго, и угощу тя в нем. В нем же граде отечество наше исперва есть, из него же изведе человекогубец-бес, своими ласканьми прельстив человека.
Да ты узришь первое человече бытие и яже абие постиже смерть, ею же роди грех первый от продувнаго злаго беса. И познаеши земна суща родом, но дело руку божию, силою же зело хуждши скота, но владыку поставлена богом всему скоту и бездушней твари всей, естественным приготовлением хуждша, но умным обилием могуща и выше небес взыти.
Да аще то разумеваем, то и сами ся увемы, что есть мы, и бога познаем, и творцу поклонимся, владыце работаем, отца славим, кормителя любим, благодетеля устыдимся, начальника жизни нашея, иже есть быти, кланяющеся, не препочием.
Еже да есть нам богатство во обещанных, искушает бо сим искушением нынешним и утверждает нам чаемая. Да елма же малогодная суть сице, то како будет вечная? И аще видимая суть добро сия, то како будет невидимая? Аще величество небесное мысли человека превосходит и меры, то присносущее естество кий ум может исследити? Им же ти повинно есть солнце, толико есть добро величество имы противу всему, яко не именовать кроме всего намерения и добротою естественною, аки око светлое, украшает тварь. Да елма же годная суть позорующе, то како будет добротою солнце праведное Христос, бог наш? Да аще невышнему тщета бывает, елма сего солнца не видит, то какова тщета будет слепому, не хотящу истиннаго солнца, Христа, видети?
Разгнем книги, душе моя, и видим хитреца и содетеля и начен песнь вечернюю, псалом: "благослови, душе моя, господа".
Чесо ради Давид* понуждает душу свою хвалити господа, да нам отрыгнет словеса устен своих тако же славословити господа: "господи, боже мой, возвеличился еси зело"*. И когда и в кое время возвеличился? Толк: Не о горнем бытии глаголет пророк, но о смотрении. Тамо начало безначально, тамо начало несказанно. Здесь же на земли бысть Христово вочеловечение под леты. Отселе воссия величество плотяну богу.
Да слыши псалом: "Исповедание и в велелипоту ся облече. Одеяся светом, яко ризою"*. Толк: Проразуме псалмопевец духом святым за тысещу лет, яко прийти сыну божию на землю и вочеловечитися, пострадати за ны и облещися плотию в велелепоту. Когда же то бысть, онагрили [75] еси, душе, сего не разумеешь. Егда Христос пригвоздися на крест, таже во гробе положен бысть и в третий день воста, якоже жених от чертога *, того же пророка по словеси. Господь воцарися, в лепоту ся облече, облечеся господь в силу и препоясася, еже есть одеяся, яко ризою. По востании из гроба сниде во ад, якоже писание о нем свидетельствует, силою лучшею одолевшу ему, сиречь смертию на смерть наступи. И ада разруши, изведе вся святых отцы, и Адама свободи, и введе й в рай. Велий господь наш и велия крепость его, и разуму его несть числа! Той есть бог богом и господь господем, той есть сотворил небо и землю и вся видимая и невидимая. Есть бо ино тварное творение им – силы ангельския. Но прекращу беседу о сих, о видимом же с Давидом повем.
Псалом: "Пропиная небо, яко кожу. Покрывая водами превыспренная своя, полагая облаки на восхождение свое, ходяй на крилу ветреню"*. Толк: Небо сие видимое распростерто, кругом грядый над нами по повелению хитреца-бога, еже повеле исперва: "небо, вертися скоро, звезды, теките борзо, и друг другу не препинайте". На нем же воды недвижимы пребывают, а твердь под водами в посолонь кругом грядый. Звезды же под ним отлучене, разлучне со своими круги летяще под землю и по малой тверди под землею шедше, паки на око ю восходят, коловратствуя непрестанно.
А еже рече: "полагали облаки на восхождение свое, ходяй на крилу ветрену; творяй ангелы своя духи и слуги своя огнь палящ"*, и се являет псалмопевец: которой во ефире под горним небом сотворил ангельския силы, той же и по видимым силам – облаком – итти имать. И бысть. И по воскресении из мертвых взыде на небеса по облаком с горы Елеонския идуще. О нем же и Даниил провиде и рече сице, и видех: "и се сын человеч, грядый на облацех небесных, и прииде до ветхаго деньми, и дастся ему власть и царство. И власть его – власть вечна, и царство его не престанет"*.
Так веруем со пророки, яко вознесеся и седит одесную отца Христос и царствует непресекомо, его же царствию несть конца. А Никон блядет: не царствует Христос совершенно, но по судном дни воцарится, и тогда царству его не будет конца. Так Никон, алгимей, толкует ся и в символе говорит так же. Мы же не пресекаем Христова царства, но обладает бо Христос и владеет всеми верными и неверными, еллинами, и июдеями, и самыми бесами. Не пресекает бо ся его царство, его же царствию несть конца.
Псалом: "Основаяй землю на тверди своей, не преклонится в век века. Бездна, яко риза, одеяние ея"*. Толк: Разумно се идет. К сим сказует пророк под землею другую малую твердь, еже место несведомое. Бездна бо та глаголется тартар, якоже Патрикий Пруский* пиша сице глаголет: есть низу во основании земли ад, темное место. Низу же есть твердь под землею, под твердию же бездна, глаголемый тартар. Тамо по тверди зодии ходят, тамо планиты обтекают, и от них в тартаре строится лютая студень. Тамо река огненная в день последний снидет, тамо бо мучатся еллинстии бози, и тамо и диавол с бесы осужден будет, тамо и наши отступники будут, и мраз и огнь купно на врагов Христовых.
Еще же по Исайи – пророку: и солнце тогда седьмосугубеч свет приимет, едина в нем светящая сила будет, а жгущая отъимется и послется тамо же в тартар на врагов божиих, казителей закона. Добро так, праведен еси, господи, и праведно судишь!
Возвратимся о твари беседовати, паки прогнали отступников в тартар преисподний.
Псалом: "На горах станут воды. От запрещения твоего побегнут, от гласа грома твоего устрашатся"*. Толк: Егда разгнана бысть повелением божиим от земли тьма и мрак, и бысть свет, и протяжено во вторый день твердь, нами видимая, на ней же полводы положи хитрец – бог. Не бяше бо тогда солнца, и луны, и звезд, но свет просто простирался три дни и скутываяся, амо же весть господь отдохну; бо земли совлекшеся от воды, егда речет бог: "да соберутся воды в сонм един и да явится суша". И бысть дело божие скорее молнии. Обнажися земля повелением божиим, и быша горы, и холми, и юдоли, и равни, и быша в земле лукияты жилы. Двизашеся воздух, и быша ветри крепцы и погоняху морскую горькую воду в лукияты жилы. Вода же протесняяся, восходя на высоту гор, и горесть в земле оставляя, от них же сладка бываше. Текуще же от гор реки и источники водные, от них же строятся езера и болота.
Тако то псалмопевец глаголет: "восходят горы и нисходят поля в место, еже основал еси им. Предел положи, его же не прейдут, ниже обратятся покрыти землю"*. И како тварь поступити смеет? Повеленно земли преклонится в век века и горам.
Таже псалом: "Посылая источники в дебрех, посреде гор пройдут воды. Напаяют вся зверя сельныя. Ждут онагри в жажду свою. На ты птицы небесныя привитают, от среды камения дадят глас"*. Толк: Зри, слыша[те]лю, и поплачи, како то есть водное естество устроено. Повсюду напаяют зверей и птиц: в дебрех, и в камениях горских, и инде. Рассадит вода та камень текуще, ждет онагрев жадных напоити. Онагр по Алфавиту* конь глаголется или осел, а попросту – лошадь. Тепло на желание естество имать прилучается, или человек на нем едет, или просто в дебрех витает, обретает текущую воду, испивает, а хозяин ево, его же ради живот сей создася, глаголют, человек, о сем славит бога. Лошадка напиталася – опять поехал путем или на работу о имени господни. Не толико ан живот воды жаждет, якоже лошедь: велбуд, путем грядый, токмо соль лижет, под ярмом идуще.
Псалом: "Напояя горы от превыспренних своих, от плода дел твоих насытится земля. Прозябая пажити скотом и траву на службу человеком, извести хлеб от земли. И вино веселит сердце человеку"*. Толк: Виждь дело божие. До потопа исхождаше рекша и напаяше лице земли на плодотворение, по потопе грома и молния напояют поля и вереи горам, с высот сходя. Како же, да слыши, дождь строится? Егда бо солнце, пришед развратить воды морския, зайдет под землю, влага же от вод на воздух вземся, бывает мгла, и ста вся на воздусе, состынув, бывает облако, идеже богу хотящу, тамо по воздуху и носится, воды исполнено, иде же бог повелит, тамо проливается, напояет горы и поля, и юдолия, да насытится земля мокроты и прорастит траву, и вся пажити, хлеб и виноград. Что же вино веселит сердце человеку, рече пророк, проразуме бо духом святым? И яко от пшеницы хлеб будет тело Христово и от лозы виныя вино – кровь его, от масличных древ – масло на освящение.
Сего ради рече: "умастити лице елеом душевное, и хлеб сердце укрепит"*. Причастие истиннаго служения – хлеб, – в плоть нашу разыдется, а дух святый в душу внидет с верою приемлющим. Такожде и скверных еретик служение: хлеб в тело человече внидет, а дух лукавый в душу темную, не хотящую разумети истинны.
Псалом: "Насытятся древа польская, кедри ливанстии, их же еси насадил. Ту птица вогнездятся, Еродиево жилище обладает ими"*. Толк: Видя, виждь, боголюбезне, како то хитрец-бог землю утвердил человека ради, крины насадил и древа польская, влагою своею питает землю и кедри в Ливане, сиречь во благоуханных древах кипарисах, в них же вогнеждаются птицы, ими же обладает Еродий*, птица большая. Пишет о нем во Алексиконе: на многих древах гнездо свое делает и ту витает со птицами на кедрах ливанских. Преводне да разумееши: Еродий – Христос, Еродий и диавол, кедри – святии божии, на них же Христос селитьбу имать; ливан – благодать духа святаго, облагоухает правоверную душу; птицы – беси со диаволом живучи, блазнят в тех же недрах.
Псалом: "Горы высокия – еленем, камень – прибежище заяцем"*. Толк: Елени, глаголют, пустынницы, Христа ради отходят в дебри и рассели горския, яко елени по холмам скачуще; камень, глаголет, церковь божия; зайцы – християне православныя. Яко зайчик под камень хоронится от совы и от серагуя и от псов, наветующих ему, тако и христианин, в церковь приходя, избывает душегубителя диавола и бесов. А ныне и во церквах тех, яко под камень заец бедной не уйдет, яко совы, пастыри тово и ищут, как бы христианина погубити. И не токмо совы, но и псы тово и нюхают, сиречь своя братия, мирстии, друг друга предают. Люто время пришло. Муж жены боится, а жена мужа опасается, а все боятся бесов, не хотя, за страх мнози попускают в нечестие.