Псалом: "Сотворил еси луну во времена, солнце позна запад свой. Положи тьму и бысть нощь, в них же пройдут вси зверие дубравнии"*. Толк: Сотворил бог светила сия в четвертый день и положи я на тверди небесней, яко сияет им по земли. Солнце сотворил на востоце, и потече днем к западу, а луну сотворил на западе полну, яко пятьнадесятую, и потече под землю. Солнце позна запад свой, а луна восхождаше на востоце во времена. Глаголет: яко луна изменяется, света своего лишаема, яко умирающе еще во времена, в леты и в годы менит, в последний день вся грамада сия рассыплется и будет вся нова, егда солнце зайдет под землю, а луна нощная – владыка умирающий. Тогда бывает нощь темная, в ней же пройдут вси зверие дубравнии: медведи и волцы аравитстии, и лисы, и мыши, и всякая гадина, ищуще себе потребная. Преводне: нощь – неведения божия; без солнца – праведнаго Христа – во тьме неверия всяк, яко зверь, шатается, ища, яко волк, сожрати искренняго. А нихто же безбожен, ин таков и зол, яко еретик, без милости есть, яко лис и яко псец, и единоплеменнаго, чюждь быв благодати божия осенения, яко лев, ища погубити вся зверьки церковная.
Псалом: "Скимни рыкающе восхитити и испросити от бога пищу себе. Воссия солнце, и собрашася и в ложах своих лягут"*. Толк: Скимен глаголется молодой львичищ*, рыкает, ища лов на снедь себе восхитити. Ему же и гласныя арганы бог в естество вложи. Егда какова зверя восхощет, тем гласом и зовет к себе, яко органом возбряцающе. Избытка же вчерашнего уловления не яст, яко царь, новое брашно имат по-всячески. Егда же лев обыдет остров кой, ни един зверь не смеет чрез прелести стези его – всех ту искоренит. Пишется в писании: лев – Христос, лев и антихрист. Злобы ради и умысла подобен лев антихристу, за образ же царский и владыческий подобен лев Христу, сыну божию, и по многим тайнам сокровенным. А егда бо лев спит, то единем оком спит, а другим бдит, яко и Христос во гробе, уснув плотию, а божеством зрех во ад из гроба. Еще же: егда родится скимен, сиречь львичищ младой, мертв рождается, и в третий день внидет дух животен в онь, и оживет, яко Христос мертв был плотию и в третий день воскресе из мертвых, сниде во ад, диавола связа и Адама свободи и нам дарова живот вечный. Воссия солнце праведное, и в ложах своих зверие – в темницах адовых дияволи – возлегли, страхом одержими, трепещуще. А и видимыя звери во дни том мало волочатся.
Псалом: "Изыдет человек на дело свое и на делание свое до вечера. Яко возвеличишася дела твоя, господи, вся премудростию сотворил еси"*. Толк: Подобает нам, христианом, весь день до вечера дела слична свету делать, егда же нощь приидет, сиречь покрыет очи наши гроб, тогда делать не имам, но токмо спать до дне восстаннаго.
Александра Григорьевна, госпоже и мати моя, не спи, не спи сном лености! Прииде вечер, приспе нощь ко дверем твоим. Тогда убо успнем на долгий сон, егда очеса не узрят животнаго света сего. Ныне время благоприятно делания, ныне дни спасения, во гробе бо никто же может делати. Им же образом желает елень за источники водныя, сице желает душею ко господу богу с верою правою. Елень бо, ядши мох, пожирает змей – гада ядовитаго. Егда же во утробе его змия учнет торгати, тогда елень зело быстро течет на воду текущую и пиюще жаждею уморяет в себе змию, гада ядовитаго. Аще укоснит елень живыя воды взыскати, проедает змия чрево его и пропадает весь*. Тако и мы, пожерше грех смертоносный, ускорим на покаяние, испивше живыя воды святых словес книжнаго разума. Аще ли обленимся и не взыщем своего спасения? Горе человеку, во гресех умершему! Лучши бы ему не родитися, нежели в себе образ божий обесчестити грехи скверными.
Молю тя, христолюбивая, не ходи к еретику попу Осипу! Ей, бога свидетеля поставляю, сосуд пагубы. Нарочито попенко богородское не пьяница, да и смирен. Али тут обновится, яко орлу, юность твоя ?* Орел бо егда состареется и естеству его изнемогшу и перьем обетшавшу, всяко старость сокрушит его, обретает же воды живы, сиречь текущий источник, и, вземся выспрь, возлетает на высоту ко огню небесному, еже есть высше облак, под солнцем. И обгорит от пламени того весь и, спустився низу на преждереченный источник, измывается в нем довольно и, опернатев, бывает паки на многи лета юн вместо ветха*. Тако то пророк и тебе, старийшую, понуждает, глаголя: "обновится, яко орлу, юность твоя", сиречь коснися, умом возлетев, престола огнезрачного, на нем же пребывает истневаяй горы и сокрушаяй камение. Той твою обновит ветхость и грехи возьмет, и чисту тя сотворит от греховныя скверны. Умойся естественною водою, еже имаши слезный источник, текущий паче воды живы в живот вечный.
Григорьевна, перестань-ко ты мясца кушать, господа ради, но питайся семеньми, яко трие отроцы в Вавилоне. Не уморит тебя о Христе Исусе и без мяса, яко стерчин родителя своего на старость. Есть стерх-птица, бела перьем, с жеровля ростом, егда состареется и не возможет летать, ни пищи добывает, тогда чада, ея подъемлюще, преносят с места на место крилома своима и пищу ему приносят. Виждь, нрав имеют вскрай словесных, как быть человецы, добрые детки о родителях своих пекутся. И за тот их добрый нрав преславно о них бог промышляет. Егда стрехи прелетают и отлетают, служат им враны, злосердыя птицы. Встречают их и провожают, оберегая от иных птиц сопостатных*.
Григорьевна, стараго нашего православия чадо, и винца перестань пить, ино пей квасок и воду, так в голове ум не мутится, и очи с похмелья не кружают, и руце и нозе не упадают, чревеса и утроба здрава, паче же греха меньши. Лоту и праведнику запят пиянство, и Ное* от того же поруган бысть. Сампсон и смерть прият от пиянства. Али мы крепчайше такова исполина? Некогда восторже врата градская, сиречь башню, вознесе на гору высоку. И путем ему идущу, нападоша на нь иноплеменницы 1000 человек, хотяху его убити: Он же восхитив ослию щоку и всех поби костию тою, и, поймав триста лисиц, ввяза в ошиби их по свещи горящей, и пусти в нивы их. И пожже вся нивы. Чтец да чтея в бытийстей книги*. А после погиб от пьянства. Окаянно таково то пиянство: ни юность блюдет, ни седин милует, ни святаго почитает, ни честна мужа хранит, но всех без ума творит и во грехи поощряет. Богатым скудость наводит, убогим – раны, женам – бесчестие, юнотам – поползновение, девам – срамота, а попам и чернцам всех злейши препретается. Яко богомольцы то есть, всегда жрут жертву пьяному Дионису*. Нас то мимо о Христе Исусе.
Подобает христианину правым путем ходити, понеже праведник, яко финике, процветет. Есть финикс-птица*, обретается близ рая во странах восточных, она же глаголется и сирин и неясыть пустынная. Излетает бо из рая и витает в кедрах ливанских. Красна и велелепа, перием созлатна и песни поет сладки, яко не восхощет человек ясти, слышавше ея гласы. Гнездо бо ея на 12 древах и вящще. Егда бо отлетает в Ливан обьюхатися арамат, птенца своего во гнезде оставя. Змей же с нею непрестанно враждуя и усмотря без нея, получа время, надхнет птенца ея ядом смертоносным, измирает. Прилетев же финике из Ливана, добыв змия, убивает, и проклевав своя ребра, кровию мертвеца своя покропляет. И оживотворятся юныя ея детки. Тако и Христос сотвори, на кресте вися, яко неясыть, от ребра своего источа кровь и воду, и оживотвори нас, умерших грехми, убив диавола крестом, и Адама свободи, и на 12 апостолех гнездо свое устрой, воссед яко на коня, послав их в поднебесную, да проповедят его, яко той есть судия живым и мертвым и воздает комуждо по делом его.
Возвратимся паки на первую беседу, отнюду же изыдохом.
Псалом: "Исполнися земля твари твоея"*. Толк: Колицы суть на земли, роди травы сельныя и древа дубравныя, по них же суть одушевленный живот: зверие и скоты, и птицы пернаты. Овы кормятся от земли, а инныя живот животом. Их же родов несведомое множество есть:* птицы зерноберные есть, друзии плотоядцы суть, а инии травою и древом питаются. Тако ж и зверие: овии мясоядцы суть, еже же и плижущеи по земли, и по воздуху паряще, и мухи большие и малые, и комарие от тины ся ражающе. Вся бо та увиди и настрой благий божия нас ради человек и нашего ради спасения.
Псалом: "Се море велико и пространно; ту гади, им же несть числа, животна малая с великими. Ту корабли преплавают"*. Толк: Елико суть живота на земли, толико и в водах и множае суть. Есть в мори во Алантичестей стране лежаги, сиречь киты велицыи, жируют. Егда воспловут, подобны суть горам великим или яко грады велицыи. Туды корабли не заходят. Но на удивление и на страх нам таковый живот сотворил хитрец. По них же и инии мнози велицы животи есть в море: пси велицы, и изугени, и приони, и дельфини, селахи же, и фоки, и ин живот дробный, его же родов несть числа, токмо той весть, иже я сотворил, рыбы и гады, и вся ныряющая и плавающая. Ови ся ражают птицами, ови яйца несут, и инии своим образом. Рыбы же икру пущают, и от того бывает живот, животна малая с великими.
Есть в мори живот именем острей, а другий – каркин*. И желает каркин ясти плоть астреев и немощно ему улучити ея, в сколку огражена. Егда же острея уразумеет каркин в заветренне месте греющеся, разверше сколца своя, бив его каркин, и ввержет камычец в сколца его. И к тому не возможет стягнути их, тако то его и погубит. О злый, пронырливый каркин, прехитрил милаго острея-живота! Тако то и никонияне добывают християн, умышляют, на смерть предают. Егда християнин, не хотя их жертвам приобщатися, в заветреннем месте греющеся или молитвует втай, или ино что служит богови, разверше сколца своя, сиречь не о[па]сется бедной горюн, уведав же, еретицы на нь и, бив его, совсем разорят, яко острея каркин, съедят совсем.
Есть в мори рыба многоножица*, пронырлива глубоце, изменяет вид своего естества. Егда прислонится к камени, бывает яко камень, а к зеленому – зелена, а белому – бела, или ко траве, или ко древу – везде ся пригодит. Мног же дробной живот, аки бы не разумив, заплывает в челюсти ея, она же поглатающе. Тацы мнози суть человецы во градех пронырливы, коварни суть, пременяются на нравы различныя, друг друга оманывая, а наипаче суть в духовном чину малии и велицыи изменяют лица своя. Кажутся, яко постницы, даже вящши чин улучат. Егда же взыдет на высоту, тогда от воздержания и раздует его девство. Где ся у святаго отца кожа возьмет! Был тоненек, а стал брюхат, яко корова-матушка, пестрая или черная.
Животна малая с великими. Ту корабли преплавают. Корабли бо по морю преплавают из царства в царство, строя нашу человеческую жизнь. Превозят бо вещи из земли в землю, иде же чево несть, отинуде превозят*. Море бо совокупляет воедино всех нас, да любим друг друга и хвалим чинотворца, хитреца-бога. Мы же несть тацы суть, не хощем бо обще стяжания иметь, но вся хощу мне собрать, яко несытый всеядец. Аще бы ми возможно, вся бы вещи морския и земския во утробу свою вместил.
Псалом: "Змий сей, его же созда, ругатися ему"*. Толк: Древне в породе змия крылья имела и нозе. Егда же прельсти праотца, тогда отъяты быша и нозе и крыле. И повеле бог ясти землю и ползати на чреве, якоже она наругала со дьяволом в человецех образ божий, науча преступить заповедь божию. Да тоже и сама поругание претерпе. Адама изгна из рая бог и постави у врат вертящееся оружие на стражу раю, и повеле Адаму делать землю, от нея же взят бых, жене же в печалех родить чада, а змеи на чреве ползать и ясти землю, а дьявола прокля*. Так то богопротивление зло есть, подобает внимати и нам, да не то ж правило подъимем и мы.
Псалом: "Всяк к тебе, чают дати пищу им во благо время. Давшу тебе им, соберут; отвершу тебе руку, всяческая исполнятся благости; отвращшу же тебе лице, возмятутся"*. Толк: И кая тварь может от небытия пищи себе привлещи, аще не господь земле повелит из нея умножитися пищи всему животу, человеком и скотом? Аще он, надежда, прострет пречистую руку свою и послет на землю дар свой – дождь и теплоту, тогда всяческая исполнятся благости: умножит земля хлеба и овоща человеком и скотом, и зверем, и птицам небесным, и всему животу; християне обогатеют, и бояром добро. Егда же отвратит лице свое за умножение беззакония грешных человек, тогда вся возмятутся, и самая стихия, еже есть воздух, и земля, и вода, и огнь огорчатся на противных богови и из предел своих выступают. Земля плоды своя умалит, вода иссыхает, а инде потопляет, огнь пожирает, якоже в Москве пожары видеша очи наши. Еще же и воздух изменяет: овогда студень, овогда сухо бывает и не подаст влаги на плоды земныя. Зверие оттекают, и птица небесныя от беззаконных отлетают, и в водах умаляются рыбы. А сами тии человецы, грешницы, мятутся, яко прузи бьются, и дерутся, яко пьяни суть. Не явно ли то бысть в нашей Росии бедной: Разовщина* – возмущение грех ради, и прежде того в Москве коломенская пагуба*, и мор, и война*, и иная многа. Отврати лице свое владыка, отнеле же Никон нача правоверие казити, оттоле вся злая постигоша ны и доселе. Преводне же "всяк тебе, чают дати пищу им во благо время", – сиречь благое время во грядущем веце, тогда бо насытятся святии пищи некончаемыя. Ему же по достоянию даст бог, той приимет вечная благая, а от него же лице свое отвратит, той возмятется вечно во пламени огненне.
А прежде се будет. Псалом: "Отъимеши духи их, и исчезнут, и в персть свою возвратятся. Послеши дух свой, и созиждутся, и обновиши лице земли"*. Толк: Виждь, кончину и воскресение и всему обновление глаголет пророк. "Отъимеши духи их" – ту смерть являет, а "исчезнут", рече, – ту раскидание плоти и в землю паки возвратит; а еже рече: "послеши дух свой, и созиждутся" – ту и востание являет. И тако то смысл, разум глубок.
О воскресении мертвых Павел апостол пишет: "вси убо не успнем, вси же изменимся во мгновении ока в после[дне]й трубе. Вострубит бо, и мертвии востанут нетленнии, и мы изменимся волею божиею. Подобает бо тлеемому сему облещися в нетление, и мертвенному сему облещися в бессмертие. И тогда убо пожерто будет мертвенное животом"*. Да слыши попросту, аще бы единою нагою душею жили, не требовали бы глагола, ниже слуха, но глагол и тутнание слуха деля, а слух глагола ради. Аще не быша уши и устне, и язык плотян, то бы от ума моего к твоему уму разумение исходило без звука и без грома, ныне же подоба глагола и слуха.
Да разумеется востание мертвых. Вся убо не успнем, вси же, глаголет Павел, сиречь не умрем, до последние трубы живущий на земли будут. Егда первая труба вострубит, в ней же повеление божие, гласом ея отверзутся гробы. Таже вторая труба вострубит, и потечет кость к кости и состав к составу своему. Третия труба вострубит, и созиждутся телеса мертвых. А живущий еще на земли есть. Егда же четвертая возгремит труба, в ней же глас божий: "востаните от гроб, мертвии, явите дела своя судии всех и богу", тогда во мгновении ока вси живущий изменятся, а мертвии оживут. Да слыши, Златоуст глаголет: "тамо узрим прах возметающ, всюду человецы воставают, дивен позор будет". И егда вси востанут, обымут их ангельския силы.
Тогда вся стихия разорят: небо, яко свиток свиется, солнце и луна, и звезды спадающе с небес, якоже смоковница отмещет листвие от себе, тако то звезды полетят на землю. Тогда от престола господня река огненная потечет, поядающи тварь от востока до запада, и вся изгорит. И будет небо ново и земля нова, бела, яко хартия. То же псалмопевец рече: "и обновиши лице земли"*. Тогда же ангелы поженут вся человеки во огнь негасимый. Ох, люте мне! Праведницы просветятся, а грешницы помрачатся, праведницы восхищени будут на сретение господне на облацех по воздуху, а грешницы, увы, яко огорелыя главни, валяются низу. Златоуст рече: "тогда бо плоть человеча легка будет и восперенна, добрымы делы носима, яко может ездить и по воздуху". Егда бо с небесе Христос, бог наш, приидет и сядет на престоле славы своея, и соберутся пред ним вси языцы, и разлучит их, яко овца от козлищ, понеже тьмы тьмами силы небесные предстояху ему и тысяща тысящами служаху ему. Ристаху же ангелы собирающе и поставляху праведныя одесную его, а грешныя отреваху ошуюю. И речет господь праведным: "приидите, благословении, наследуйте уготованное вам царствие небесное". Возрев же ярым оком на грешныя и речет: "отъидите от мене, проклятии, во огнь вечный со дьяволы". И идут сии в муку вечную, праведницы же в живот вечный*, еже есть взем судия святые своя и приведет их к богу и отцу и речет: "се отче, приношение мое, се есть плоды моя. Приими их, да будут едино с нами, яко же и мы". Тогда возвеселится господь о делех своих *.
Псалом: "Презираяй на землю творя ю трястися, прикасался горам – воздымятся"*. Толк: Егда на Синайстей горе с Моисеом беседоваше, тогда страшно бе видимое, понеже гора горяше огнем, и облак, и сумрак, и буря, и трубныя звуки, и гласы шумящи глаголанны. Моисей бо рече: "пристрашен и трепетен есмь, господи"*. Виждь, "прикасался горам – и воздымятся".
Воспою господеви в животе моем, пою богу моему, дондеже есмь. Да насладится ему беседа моя, аз же возвеселюся о господе *. А плуты те, – ну их к черту! И людьми их не зову. По писанию: "скончаются грешницы от земли и беззаконницы, яко не быти им"*. Вот ладно каково. Благослови, душе моя, господа *. Аминь, аминь, аминь.
Послание всем "ищущим живота вечнаго"
Господи Исусе Христе, сыне божий, помилуй нас.
Всем святым и а[постольския] церкви от господа бога и спаса нашего Исуса Христа слава и честь и нетление ищущим живота вечнаго. А иже по рвению противляющимся убо истинне, повинующим же ся неправде псам-никонияном – ярость и гнев, и скорбь, и теснота на всяку душу человека никониянина, творящаго злое, архиерею же прежде и рядному. Глаголют бо безумнии человецы, утесняюще свою душу: "не на нас-де взыщет бог законное дело и веру; нам-де что? Предали патриарси и митрополиты со архиепископы и епископы, мы-де и творим так".
О неразумныя души беззакония! Ни ли слышал еси апостола Павла: "сила божия есть всякому верующему, июдеови же прежде и еллину от веры в веру, якоже есть писано. Праведный же ет веры жив будет"*.
Зри: праведный от веры жив будет, а не от человеческаго предания.
И еще чтый да разумеет того же апостола рекша: "открывается гнев божий с небесе на всяко нечестие w неправду человеческую, содержащих истинну в неправде, зане разумное божие яве есть в них, бог бо явил есть им".
Вот апостол глаголет: "бог бо явил есть им"*.
Шлюся на твою совесть, зане разумное божие яве есть в тебе, бог бо явил, есть в тебе. С тем же Павлом глаголю: "невидимая бо его от создания твореньми помышляема видима суть, и присносущная же сила его и божество, во еже быти им безответным. Зане разумеша бога не яко бога, прославиша или благодариша, но осуетишася помышленьми своими, и омрачися неразумное их сердце"*.
Читай внятно: "и омрачися неразумное их сердце, во еже быти им безответным".