И ныне, Богородичен: Сосуд благостыни Твоея, Пречистая Дево Богородице, бысть святая дева, и страну, жребием Тебе свидетельствовану, просвети. Сего ради молим Тя: сию приими с Тобою в молитву вопиющих Тебе: помилуй жребий Твой.
Песнь 3
Ирмос: Призри на пения рабов Благодетелю, врага смиряя вознесенную гордыню; носяй же, Всевидче, греха превыше непоколеблемо, утвержденыя, Блаже, певцы, основанием веры.
Святая равноапостольная Нино, моли Бога о нас.
Милосердия ради Своего милостивно помянув нас, усердну благовестницу содела тя Бог, жену сущу, мужеским смыслом украшену, и исполнену Духа Свята яви нам, и твоею проповедию о Христе, чрез веру в Него, нас усыновил есть.
Святая равноапостольная Нино, моли Бога о нас.
Покрывало от сердец наших безчувственных отпаде, отягченный слух наш от гласа проповеди твоея открыся, омрачение ума нашего разсеяся светом учения Хрис това, тобою возвеще'ннаго, о святая равноапостольная Нино, доблественная ученице Христова.
Слава: Покланявшиися иногда кумиром и пребывавшии во тьме нечестия, от лести идольския твоим пришествием, блаженная Нино, свободишася; Армаз же вострепета, егда гром возгреме, и неистовства Задена престаша.
И ныне, Богородичен: Тобою, Богородице Дево, от рова нечестия подъяти быхом, егда Ти угодно бысть просвещение наше женою сотворити; повнегда же изыти нам от купели святыя, познахом Сына Твоего и Бога нашего блаженною Ниною.
Седален, глас 2
Якоже солнце незаход и мое, Солнца правды Христа Бога проповедница, светозарная звезда, светлый вселенныя светильник, неоцененное сокровище Ивер с кия страны, днесь Нина в земли нашей сияет и благоухает, наставница наша, равноапостольная раба Христова.
Песнь 4
Ирмос: Рода человеча обновление, древле поя, пророк Аввакум предвозвещает, видети неизреченно сподобився образ: младый Младенец бо из горы Девы изыде, людей во обновление, Слово.
Святая равноапостольная Нино, моли Бога о нас.
Якоже лев безстрашна пребывши, крепце Христа Бога проповедала еси: парфян силою чудес уловила еси, Гаианию же и Рипсимию подвигом доблественнаго их мученичества в дар Христу принесла еси. Той же сохрани тебе самую, во еже просветити тобою Иверскую страну.
Святая равноапостольная Нино, моли Бога о нас.
Я коже орел, во очию твоею возобразила еси И верскую страну нашу, преславная Нино, и святою ревностию по Бозе разжегшися, святым Евангелием сию просветила еси.
Власть имущи разгнати мглу, мудраго царя просветила еси, равноапостольному царю Константину уподобльшися, наставнице наша и врачу смыс ленный. Сего ради ублажаем имя твое, дево, проповеднице Христа, великая равноапостольная Нино.
И ныне, Богородичен: От лести идольския Тобою, Богородице, избавлени бывше людие Иверстии, ихже Тебе жребий показа, и благовестием преподобныя матере нашея Нины озаре'ни бы'вше, взывают к Тебе: избавление наше, спаси ны, Мати Христа Бога.
Песнь 5
Ирмос: Из нощи дел омраченныя прелести, очищение нам, Христе, бодренно ныне совершающим песнь, яко Благодетелю, прииди подаваяй удобну стезю, по не йже востекающе обрящем славу.
Святая равноапостольная Нино, моли Бога о нас.
Падоша идоли во стране Иверстей и создашася храмы Господни тобою, мати наша. Мы же, чада Сиона, тобою просвещени бывше, днесь прославляем Триипостасное Божество, славим Честный Крест Христа чествуем цельбоносный хитон Его.
Святая равноапостольная Нино, моли Бога о нас.
Сынове тех, иже от дней столпотворения Вавилонска злочестием пленени бы ша и песнь Господню воспевати не разумеша, ны не изшедше от святыя купели глаголют: во Христа облекохомся, во Христа крестившеся.
Слава: Егда царствова фараон над египтяны, тии, во тьме египетстей седяще истинному Богу служити не могоша; днесь же мы, чада Сиона, Ниною избавлени бывше, радостно поим Господеви.
И ныне, Богородичен: Егда приспе ко мне врач, Пресвятая Богородице, тогда востах от одра моего немощствуяй, и преподобною Ниною избавихся от лести идол нечистых, сия род Иверский взывает, глаголя: воспеваю Тя, упование мое, Мати Божия.
Песнь 6
Ирмос: Обитая Иона в преисподних морских, приити моляшеся, и бурю утолити; унзен же аз мучащаго стрелою, Христу воспеваю, зол губителю, скоро приити Тебе к моей лености.
Святая равноапостольная Нино, моли Бога о нас.
Возсиявшу свету от запада, престани, севере, и повей, юже, солнце бо восходит разгнати мглу, и близ есть дохновение теплоты, во еже таяти леду: се грядет проповедница Христа, Нина святая.
Святая равноапостольная Нино, моли Бога о нас.
От тьмы идольския избавлени бывше тобою, равноапостольная Нино, вси людие Карталинстии воспевают тя и умиленно взывают: отжени от нас злобу, диавола же и супостаты наша порази.
Слава: Уготованная тобою при столпе животворнем и месте хранения хитона Господня купель святая не мертвит младенцы, но сия возраждает, елеем святым умащающи. Темже вопием ти: радуйся, дево, равноапостольная Нино.
И ныне, Богородичен: Надеждо непостыдная надеющихся на Тя, едина рождшая паче естества плотию Христа Бога нашего, Того со блаже'нною Ниною моли подати Иверстей стране утверждение и преспеяние в вере, и всем нам прежде конца жития исправление.
Кондак, глас 2
Приидите днесь вси, воспоим избранную от Христа равноапостольную проповед ницу Божия слова, мудрую благовестницу, люди Карталинии приведшу на путь живота и истины, Бо гоматере ученицу, усердную заступницу и неусыпающую хранительницу нашу, Нину прехвальную.
Икос
В гуслех духовных да восхвалится мудрая проповедница, Иверии просветительница, в купели крещения избранными пастырьми освятившая люди, жребием свидетельствованныя, равноапостольная, воз любленная раба Христова, яже десять заповедей Божиих прият, якоже Моисей Боговидец. Приидите убо, днесь ублажим песньми усердную заступницу и неусыпающую хранительницу нашу, Нину прехвальную.
Песнь 7
Ирмос: Всецаря любовию уловленнии отроцы, укориша безчисленно яря'д ася мучителя злобожное языковредие.
Имже повинуся огнь многий, Владыце глаголющим: во веки благословен еси.
Святая равноапостольная Нино, моли Бога о нас.
Чертози царя и царицы яко пленницу и странницу тя призреша, обаче и сия от плена преисподняго благодатию Христовою привела еси ко Христу Богу, Нино равноапостольная, благовестнице спасения.
Святая равноапостольная Нино, моли Бога о нас.
Внегда воздвигнути тебе столп святый и воздеяти руце твои, устрашишася силы диавола и со трепетом бежаша возрыдаша горько. Мы же вопием: благословен еси, Христе Боже, во веки.
Слава: Возвещаемым словесем твоим, падоша ниц людие, яко от гла са труб царевых, и царства и царие вострепеташа, глаголюще: о пленнице и плен ных сво бождение! Буди благословено пришествие твое.
И ныне, Богородичен: Яве предреченная пророки, Мати Божия, пренепорочная Дево Марие, пребыванием Твоим во Египте с Богомладенцем, Иисусом Христом, истуканы египетския сокрушила еси до оснований и Ниною потребила еси кумиры Карта линии. Буди благословена, Приснодево.
Песнь 8
Ирмос: Утробу неопально образуют О троковицы, иже в ветсем опаляемии юно ши, преестественно раждающую, запе чатлену; обоя же содевающи чудодейство едино, люди к пению возставляет бла годать.
Святая равноапостольная Нино, моли Бога о нас.
Памяти святыя Нины подобает празднество. Приидите убо, вернии Христу, прославим и возблагодарим милостиваго Бога. Роди же и племена и чада Сиона, в духовней радости торжествуйте купно с нами, глаголюще: слава проповеднице Христа и Бога нашего.
Святая равноапостольная Нино, моли Бога о нас.
Радуйся, страно Карталинская, от Нины венцем Христовым венчанная светися и благоукрашайся: призывает бо ны равноапостольная святая Нина, светом Господним вся озаряющи.
Слава: Ты заповедала еси нам, равноапостольная, веру свято блюсти, ейже ново обращенныя люди научила еси. Сего ради вертограды, яже насадила еси духовней пастве твоей, посети и утверди.
И ныне, Богородичен: О Мати Христа Бога, Творца сущих, сподобльшийся Тобою жизни вечныя род Карталинский храни, молитвами Нины блаженныя.
Песнь 9
Ирмос: Любити убо нам, яко безбедное страхом, удобее молчание; любовию же, Дево, песни ткати, спротяженно сложенныя, неудобно есть. Но и, Мати, силу, елико есть произволение, даждь.
Святая равноапостольная Нино, моли Бога о нас.
Вожделенна нам память твоя, дивно чудодейство твое, свято житие твое.
Вся нам бывают во благо тобою, Нино целомудренная.
Святая равноапостольная Нино, моли Бога о нас.
Приятелище мощей твоих, благодать источающих, утверждение есть стране Иверийстей. Сего ради и взывает к тебе: блаже'нная Нино охраня'й нас твоим заступлением.
Слава: Проповеднице и просветительнице, призри на пение наше умиленное умилостиви к нам Господа, не попусти нам, хвалы твоея ревнителем, во гресех погибнути и, предстоящи Престолу Божию, моли Христа Бога спастися душам нашим.
И ныне, Богородичен: Услыши моления наша, Мати Божия, и преподобныя Нины заступлением отжени от нас вся искушения, даруй нам милость Т вою и победу на враги.
Акафист святой равноапостольной Нине, просветительнице Грузии
Кондак 1
Избранной служительнице слова Божия и подвигом святых апостол подражательнице, залог благословения от Божия Матере, честный Крест приявшей и во стране Иверстей водрузившей, благодарственная хваления восписуем ти, цевнице духовная, святая равноапостольная Нино. Ты же, яко имущая дерзновение ко Господу, не престай молящися избавити нас от всяких бед и скорбей, да со умилением благодарственно зовем ти: радуйся, святая, равноапостольная Нино, просветительнице Грузии.
Икос 1
Ангела дивна страны Иверския яви тя всея твари Содетель, обратити народы земли сея, седящия во тьме и сени смертней, от прелести идольския и призвати их во язык свят, в люди обновления. Темже мы, благодаряще Бога, прославляем тя яко просветительницу и молитвенницу нашу и прилежно зовем ти:
Радуйся, пречудная избраннице Божественнаго Промысла;
Радуйся, дивно процветшая розго благочестиваго корене.
Радуйся, сосуде благодати пре из рядный;
Радуйся, вместилище благодатныя силы.
Радуйся, Пресвятыя Девы Богородицы верная посланнице;
Радуйся, прехвальная апостолом подражательнице.
Радуйся, во благовестии первозванному Андрею поревновавшая;
Радуйся, еюже лжа идольская попрана бысть.
Радуйся, еюже святая вера насадися;
Радуйся, еюже нам земным путь к небесем показуется.
Радуйся, святая равноапостольная Нино, просветительнице Грузии.
Кондак 2
Видяще исполнение Божественнаго о людех смотрения Отца Небеснаго, Единороднаго Его Сына и Святаго Духа, воздвигшаго пророки и апостолы ко спасительному служению и нашего ради обращения к свету евангельския истины избравшаго святую равноапостольную Нину, вопием к Богу: Аллилуиа.
Икос 2
Разум Божественный возжелевши уразумети святая Нина, не единожды испытоваше от наставницы своея Нианфоры вся, я же известна быша о Господе Спасителе нашем и святом хитоне Его наученная же от нея истинными познании, восхоте поклонитися вседрагому хитону и месту подвигов святых апостол. Мы же, благоговения к жизни святыя Нины исполненнии, прославляем ю сице:
Радуйся, истины Царствия Божия уразумети искавшая;
Радуйся, от юности Христа возлюбившая.
Радуйся, от младости материю своею Сусанною благочестию наученная;
Радуйся, отца своего Завулона утешение.
Радуйся, святителем Иувеналием в страсе Божии упасенная;
Радуйся, Божиим словесем обученная.
Радуйся, во святем граде Иерусалиме возращенная;
Радуйся, течением своим к славе Божией во младости праведных удивившая.
Радуйся, земным благом небесная предпочетшая.
Радуйся, святая равноапостольная Нино, просветительнице Грузии.
Кондак 3
Сила Вышняго воздвигши тя, святая Нино, любовию благочестия, желанием поклонитися хитону Господню и ревностию апостольскою, постави тя я ко светильник лучезарен, да приемлющии от тебе свет богоразумия взывают к Богу: Аллилуиа.
Икос 3
Имущи святая Нина ревность непоколебимую ко благоугождению Господеви, возгарашеся желанием прийти во страну Иверскую и поклонитися тамо сокровенным святыням. Мы же, видяще таковое ея святое ревнование, возопиим к ней:
Радуйся, измлада суету мира през ревшая;
Радуйся, истинную мудрость возлюбившая.
Радуйся, верное сокровище богомуд рия в Божественном учении обретшая;
Радуйся, возлюбивших суету мира добродетельным житием превозшедшая.
Радуйся, на непоколебимом камени заповедей Христовых утвердившаяся;
Радуйся, преданностию воле Божией Ангелы и человеки удивившая.
Радуйся, постом и молитвою плоть свою духови покорившая;
Радуйся, любовию своею ко храму Божию томужде многи научившая.
Радуйся, добротою нрава к служению апостольства уготовившаяся;
Радуйся, добродетельным житием своим сосудом Духа Святаго соделавшаяся.
Радуйся, святая равноапостольная Нино, просветительнице Грузии.
Кондак 4
Бурею житейских страстей смущаеми, недоумеем, како достойно воспевати твое див ное мужество, святая богоизбранная Нино, не устрашила бо ся еси исполнити хотение свое, еже шествовати о имени Христове во языческий град Рим. Пречистая же Матерь Господа нашего благоизволи дати ти честныма рукама Своима святый крест и призвати тя ко благовестию спасения во стра не Иверстей всем хотящим взывати Богу: Аллилуиа.
Икос 4
Слышав святитель града Господня Иувеналий, яко Пресвятая Богородица призва тя проповедати слово Божие во жребии Ея, стране Иверстей, и дарова ти в видении крест, его же ты обвила еси власы своими, нача славити Бога, спасающаго человеки, и звати тебе сице:
Радуйся, благодатию Божиею приосененная;
Радуйся, смирением духа дерзновение ко Господу Иисусу и Пречистой Его Матери приобретшая.
Радуйся, обрадованная явлением Богоматере;
Радуйся, пресладкая словеса от Божия Матере слышавшая.
Радуйся, с Нею я ко со другинею беседовавшая;
Радуйся, благоговейно иерусалимскою братиею почтенная.
Радуйся, уготование ко просвещению нашему незаходимым светом;
Радуйся, свеще, Богом возжженная, во еже разгоня ти мрак нечестия.
Радуйся, честный крест, залог твоего преуспеяния во благовестии, приимшая.
Радуйся, святая равноапостольная Нино, просветительнице Грузии.
Кондак 5
Боготечною звездою явися святая Нина, возсиявши нам изволением Пресвятыя Владычицы нашея Богородицы и просветивши нас благовестием слова Божия. Сию небесную путеводницу, сияю щую славою подвигов благочестия и утешающую выну своею помощию всех нас, притекающих к ней с мольбами ублажающе, наипаче восхвалим Бога, явившаго святую Нину ходатаицею о нас, и возопиим Ему: Аллилуиа.
Икос 5
Видевше невесты Христовы, яже со святою Ниною и Рипсимиею постом и молитвою спасахуся, нечестивая по мышления беззаконновавшаго Диоклетиана, хотящаго Рипсимию пояти в жены себе и идолослужению научити, вся купно бежаша тайно из идольскаго града Рима во страну арменскую; таможе преданы бяху смерти повелением язычествовавшаго царя Тивридата. Святую же Нину Господь от сетей Диоклетиана и Тивридата спасе и приведе ю во Иверию благовестия ради слова евангельскаго. Темже и мы, радующеся сему промышлению Божию о спасении людей, восхваляем посланницу Божию, святую Нину, зовуще:
Радуйся, пребыванием своим в Риме путь благовестия себе уяснившая;
Радуйся, несокрушимостию духа и дивным мужеством в служении слова Божия прославившаяся.
Радуйся, трудный путь во Иверию безропотно во славу Божию прошедшая;
Радуйся, благода тию Божиею от руки Диоклетиана и Тивридата избавленная.
Радуйся, сущия у гор Триалетских гласом смирения огласившая;
Радуйся, образом кротости мир в душах утвердившая.
Радуйся, вонею благоухания словес Христовых многия облагоухавшая;
Радуйся, утверждение наше на пути спасения;
Радуйся, яко тобою сподобляемся благ вечных.
Радуйся, святая равноапостольная Нино, просветительнице Грузии.
Кондак 6
Проповедница велия показася святая Нина, труды бо и болезньми ея во Иверии Церковь Христова насадися, мрак неведения отгнася, свет истины явися, нам же, святою Ниною от тьмы идолослужения избавленным, достойно есть взывати ко Господу: Аллилуиа.
Икос 6
Возсия стране Иверстей просвещение истины, егда святая Нина огласи благовестием град Урбниси, отнюдуже мнози хождаху во Грузинский стольный град Мцхет кланятися лживым богам Ормузду и Задену; сих же идолов святая Нина молитвами своими сокруши и низпроверже. Те мже и мы я ко победительницу демонов восхвалим ю сице:
Радуйся, всемогущую силу истиннаго Бога во стране Иверстей первее показавшая;
Радуйся, силою Всевышняго идола Ормузда поразившая.
Радуйся, гордость его молитвами своими посрамившая;
Радуйся, прахом его безсилие злаго духа открывшая.
Радуйся, демона Заде на и ангелов его поправшая;
Радуйся, властителей тьмы отгнавшая.
Радуйся, безсильное царство их разрушившая;
Радуйся, бесовский пламень нечестия угасившая.
Радуйся, бурным дыханием и ог нем небесным служение идолом низ провергшая;
Радуйся, ревностию своею имя Истиннаго Бога во Иверии прославившая.
Радуйся, сыновом тьмы свет евангельский показавшая.
Радуйся, святая равноапостольная Нино, просветительнице Грузии.
Кондак 7
Хотя царь Мириан со слуги своими уразумети силу Истиннаго Бога, сокруши вшаго безсильныя идолы их, с не доумением глаголаше: "Что убо сие бысть, я ко бози наши падоша?" Дом же вертоградаря царева со Авиафаром, иереем иудейским, дщерию его Сидониею и иными девами, благоговейно приявшими благовестие святыя Нины, познавше Господа Христа, возопиша к Богу: Аллилуиа.
Икос 7
Новое житие дадеся сыновом Иверии приятием от Нины слова истины, вси бо чрез нея крестишася банею водною во очищение свое от грехов и освящение и достойни соделашася приимати от Бога исцеления мольбами сея предстательницы; царь же Мириан, благодатию Божиею от слепоты прозрев, Истиннаго Бога уразуме и Христа исповеда; царица Нана от одра болезни возста, отрок же их от духа злаго свободися, и вси в купели пакибытия возродишася. Сего ради вси народи, видяще таковая, по долгу прославляют память святыя Нины, воспевающе ей сице:
Радуйся, неверие царя Мириана в веру обратившая;