Сице достоит быти по уставу великих монастырей: боб, сочевица, горох, егда суть обварена, по единой полной миске коемуждо от братий, по равну. якоже убо и от одежды: ова убо суть приобретна, ова же скупейша: якоже рече и великий василий: яже удобь приобретаемая, и нужную потребу исполняющая, подобает избирати противу времене. На сухоядении же стафиды (виноград сухий), и маслицы, и ягоды винныя сухи, рекше едино коеждо на кийждо день: маслиц убо чашицу полну питию: стафид же равну: орехов 6: смоквей 8 средних: малыя убо, и великия разнствуют. Тако убо достоит и от прочих овощех подобных сим: якоже выше рехом, от пряженых сочивех. Сия же вся, и варена же и сурова, егда же суть суха, такоже подобно есть. егда же время имать зелена, и пища и мера разнствует. От зелей же якоже есть, подобно и варена и сурова, и еще же и квашена, рекомыя армеа и комбоста: фаво слано, и репа со уксусом, и прочая подобная сим уготовлена, и подобающая в постныя дни, и нужную потребу исполняющая. Сице убо окормляеми божиею благодатию, лихоимства свободимся, якоже некий от святых глаголет: яко лихоимение есть сие, еже излишнее и паче потребы. Отонудуже и апостол, яже от божия царствия нас отлучающая изсчитая, и сию страсть ко инем, глаголет: яко лихоимцы царствия божия не наследят. А еже лишше стяжевати, о всякой вещи приемлется.
Сия же вся общежительнии чини предаша. Сокоядения же и сухоядения меру всем опасно повелеша: и познавание равности, и прозябающих соблазн, и прочих вин, к хотящим со множайшими жити, сего ради убо аще и когда несть масла, и прилучится ино что творити, в потребу по нужди. Аще ли прилучаем ни сего несть, не достоит пещися о сем. В субботу, якоже и предваривше множицею рехом, в начале 5–го часа подобает поставляти трапезу, и ясти два ядения, якоже выше рехом: кроме же сих, аще послет Бог чтолибо, подобает ясти вся яже суть, во славу божию. Не достоит же пещися, якоже божественнии отцы предаша. И сам Господь глаголет: яко не пецытеся что ясте, и прочая. И апостол излишняя попечения отсецая, рече: имуще же пищу и одеяние, сими довольни будем. Такожде и в неделю, в 3–й час, рекше, на конце его лепо есть поставляти трапезу, и ясти два варения: аще ли послет Христос, и ино что не слагающееся обоему ястию, подобает ясти и третие, якоже предрекохом, по нужди. Не достоит же приимати се во устав, но по случаю аще будет: ясти же в субботу, и вечер, подобне же и в неделю, и в праздники, в нихже чтолибо забавление скораго вкушения не будет, на которыйждо яко подобно есть. такожде и о вине, якоже предрекохом, бывати должно есть. В великия же праздники, сиречь христовы, и богородичны, и предтечевы, рождество и усекновение: и еще к сим святых апостол петра и павла, в каков либо день прилучится, в понедельник, или среду, или пяток, сице творити подобает: в христовы убо и в богородичныя, яко в день недельный, кроме точию святыя 40–цы: подобне же и предтечевы, и реченных святых апостол. В средния же праздники, в 6–й час подобает поставляти трапезу и вечерю: о снеди же, якоже и в прочих днех. Аще ли случится в день постен сухо ясти достоит на обеде. Аще ли и варение подобает, без услаждения да бывает, аще угодно есть богу: или множицею и со услаждением, егда не зрится беда души. В малыя же праздники, в 9–й час подобает ясти, якоже угодно Богу да бывает, якоже и в прочия дни, единою же днем. Аще ли подобает и в малыя праздники, варение без елеа да бывает, аще угодно есть Богу, или с елеем, егда беда душевная не зрится. Сие же разсуждение снеди праздничной извествованое, по смотрению бысть всяко святых отец сия предавших: иже убо от отец воображенныя праздники, со опасством, и со страхом же и разумом божиим, в снедех проходити достоит, и в самых тех простых днех, множае же паче в постных: на многих бо местех взаконенных божественных писаниях обретаются отлучены снеди в праздниках, и пременены. но якоже и в старчествех глаголет: яко праздник не винопитием смотряй сотворяти, но обновлением ума, и душевною чистотою, объядаяйся же и опиваяйся прогневляет паче предначальствующаго торжество.
Глава 37. О пении, яко не подобает кроме собора особне пети.
Достоит и сие ведати: зане якоже предрекохом о пении, яко по преданию убо, не подобает имети во общем житии устава, кроме общины пети псалмы особне, или ину службу, но вся посреди быти, разве аще что по праведному слову на пользу и спасение души есть, по коемуждо предписахом образу, и с настоящаго советом.
Глава 38. О еже не подобает ясти кроме общия трапезы.
Потребно есть ведати: яко не подобает по преданию ясти кому особь, паче же настоятелю: но аще будет ради воздержания вящшаго и подвига или некия иныя благословныя вины, повелением духовне настоящаго, во спасение душ да бывает: а не по коварству бесовскому, и сие не неподобно, ниже не свидетельствовано: но и свидетельства множайша имамы в постных великаго василиа, якоже егда глаголет, яко противу месту и растворению. Сице и пища да бывает. И паки во еже о святом пахомии, пища премененна бысть от святаго, и божественнаго ангела, и нецыи же от святых в мужех же и женах, во общих житиях постишася вящшим постом и бдением, и ничтоже возбраняюще: точию о подвигах да бывает, аще и согласуется в славу божию, а не на вред души.
Глава 39. О одеждах и обущах, и всей телесней потребе.
яко убо о пищи монахом реша божественнии отцы, добро есть простое и не излишнее избирати: по томуже образу и одеяние имети нуждно, якоже великий василий в постных своих словесех, тонкочастне некако сказует, о подобающей всяцей потребе монаху. Потребно есть и нам противу силы сим уставом последовати: лепо убо есть, единому комуждо от братий две одежды имети, едину ветху и скропану, другую же здраву, за еже пременятися, якова же противу месту рубища творима суть, и паче инех суть удобь купуема, якоже божественнии отцы повелеша. Аще ли от иныя страны обретаются, и суть малоценнейша, и проста, и немятежна, и неукрасима, и подобает удобнейшее во всем гонити. Такожде и верхняя мантиа от нищетных и простых волн имети подобает, яко да служат зиме, во внутрь же и вне: в лете бо не много на потребу суть, якоже отцы повелевают. Такожде и холевы едины, якоже бы нищетны зело, другое же одеяние на потребу зимную: и просто рещи, аще что ино на потребу есть телес. И подобает образу нашему от внутрь же и вне: обаче во всем, якоже речеся, худое же и скудное, и ко единому смотрению, точию потребу исполняющее. Сие убо угодно есть, и во всем ключаемое незазорно и шапку (подкап) должно есть имети едину, и плат имущ покров, яково же есть и одеяние, сице и то имети.
Глава 40. егда кто хощет отлучитися братства.
И первое подобающее врачевание, о иже по бозе врача своего приимет, яко и Господь предал есть, не приходит же отнюд во исцеление, тогда прочее да будет ти яко иноязычник и мытарь. Образ таковых, явлена показовати того, да плат камилавце отшивает настояй, и вземлет и, или весь камилав: яко да данную ему благодать окаянному, от него к себе паки возвратит, якоже рече господь: Аще несть достоин мира дом, к вам возвратится мир ваш, и прочая. И святый же кассиан, иже ныне отрицающияся, и в преспеяние не преходящя, совлачити всячески рече обительная одеяния, и во свои его мирския облачити одежды, яже носяй вниде, и тако от обители исходит.
[Смотри] от горе святаго авксентиа: уведехом же о сем и нечто другое, дивно и зело изрядно, в горе святаго авксентиа, об он пол Константиня града, во обители глаголемей кир антониеве, глаголется нечто таково бывати: в дневном бо бдении, и на чтении, вси монаси седяще делают, иже от нас глаголемыя серяди, своими руками. Ово убо за еже бодрым быти, и внимати чтения: ово же и за еже благословитися сим, яко во время общаго собрания делаемым: и быти благословенным ихже пришивают на братних одеждах, якоже обычай есть монахом. И аще хощет кто монахов когда убо отити от обители, и по еже вся подобающая на нем исполнити. Аще ли не покорится и не хощет исправитися, тогда убо серядь точию от одежды его отшивше у себе удержавают: и благословение свое от него отемше, тому непричастное, злочастнаго же от обители отпущают. Сему убо образу древних отец, и евангельским последующе речением, лепо есть мало что подобающему держати, и мантию аще лепо есть взимати настоятелю, и во иное от внешних того одевати, аще есть монах. Аще ли ни, поне камилав точию взимати, и вместо того налагати ему иное нечто о внешних: или поне плат ея, еже имать покрывало: и тако того отпущати подучиненному же подобне, якоже лепо есть творити и отпущати их: а не просто тако творити, якоже он иже во отечнице настоятель, вземый весь образ братен: но со многим разумом божиим, и духовным разсуждением, и не оставляти тако идуща в мирское пребывание, дело делающа чужда таковаго образа, и вотще имя носяща. Обаче убо аще пользует во спасение души, и угодно есть о сем Богу, да будет в славу его, а не в хулу: аще ли ни, еже мнится Богу добро быти, то да бывает.
Глава 41. О служителех и прочих пребываниих братских.
Достоит ведати яже от святых отец прияхом: о великаго же василиа, и от жития святаго отца нашего пахомиа, и от святаго кассиана римлянина, и о прочих общежительных завещаний святых отец, како подобает имети устав служащим во святей обители общаго жития, дневником быти в церковней службе параекклисиархом. И во уставе убо святаго пахомиа, ангел предаде ему по три седмицы изменятися, повару и прочим служителем. Во святаго же кассиана по седмице единой, такожде и в постных великаго василиа. Сего ради подобает комуждо от братий по единому месяцу работати поварское служение, и прочих. И паки другий служение приемля работает братии, якоже и Господь глаголет, и понуждает еже любити и работати друг другу. Аще ли увесть настоятель коего от братий довольна суща, во еже служити и пользоватися, купно и пользовати, и попущати лепо есть того в служение: ибо ниже сие есть не неподобно, но и по преданию святых отец, якоже и святый кассиан во общежительных завещаниях глаголет.
Глава 42. О службах тяжких.
Подобает ведати: яко аще служение тяжко есть во общине, даже до 3–го часа достоит трудитися в нем: до 6–го же часа служения легкая зело, елика яве яко не имут много работы или труда, аще и обретаются: аще ли не обретаются, упразднитися подобает внутрь обители на рукоделие, или на ино что, еже приемлет. Аще ли обретаются вне обители, якоже рехом, подобает творити до 6–го часа. От 6–го часа на служения таковая да не исходят, но внутрь обители подобает упражднятися на рукоделие, и на поучения божественных писаний, и на учения, и просто комуждо подвизатися подобает, еже спастися, якоже произволение имать. и ниже виною дела, воздержание и прочее постничество да разоряется: ниже паки виною воздержания дается прекращение делу, но якоже лепо есть, сице творити подобает. Аще ли есть принужно служение, могущему лепо есть делати и множае, елико может без вреда прейти вящший труд. И паки, егда несть работы, достоит упражднятися на рукоделие, и поучения божественных писаний, и ино, еже аще подобает на потребу.
Глава 43. О дому особном.
Дом же един, рекше келлиа устроена на рукоделие собрания ради, должно есть бывати, и в ней собиратися: но еже делати вкупе, елика от рукоделия подобает, по уставу общежительных завещаний. единому же от братии свидетельствовану в добродетели, подобает предстояти же и наставляти: и овогда убо чести братиям делающим, овогда же смотряти и воспрещати им, во еже умолчавати им от всякаго празднословия. но и стих начинати им: потом же и прочая, овогда же и делати с ними и просто рещи, и вне на работу, и внутрь на рукоделие, той да бывает назирая и наставляя их. Такожде и безкнижныя учити божественным писанием. Такожде егда несть ту настояй, подобает быти вместо его и в духовных, аще доволен есть. Аще же ни, поне в телесных довлеет: да есть и во обоих действуя и служя, настоящаго же законному разуму, и божественным писанием последовати, дондеже видит настоятель таковаго довольна суща к служением. егда же увесть известно, истиною и страхом божиим, того настояй, недовольна суща к служением, или не действующа, якоже благоугодно есть Богу, подобает оставляти его, и инаго в него место поставляти, аще имать. аще ли несть кто на сие доволен, да оставится служение, дондеже обрящется достоин кто к служению тому.
Глава 44. О делании во общине.
Подобает ведати, яко всем братиям лепо есть делати, якоже и предречеся: обаче в каковейлюбо хитрости, кийждо художне имать: и могущему убо подобает делати землю до уставленнаго времене, и потом делати в рукоделии своем. Не могущии же землю делати, таковии во иных некиих различных, и противу силы да делают, и по апостольскому слову, не делаяй бо, рече, да не яст: пребывание бо, рече и потреба братняя от них хощет строитися. Иже ли от братии или неблагоумен есть на рукоделие: или се убо несть, и по коварству же некоему и лукавству не научается, таковаго подобает на множайшее дело земное устрояти, аще есть телом здрав, и пищею крепок. Аще ли есть немощен во обоих, на иная служения подобающая да повелевает, якоже и божественнии отцы глаголют, яко да не безплоден будет, и не вина соблазну в прочиих братиях, якоже рече господь: лукавый рабе и ленивый, и прочая. якоже прежде рекохом о пищи и питии, яко ради благословны некия вины бывати особне: и абие приведохом указание благословно от божественных писаний. Темже образом по благословней вине, с настоящаго законным повелением же и понуждением, аще на пользу есть, да бывает и о неких делающих: и да будет кождо особно делая подобное ему. Аще ли несть по чрезсловесней вине: вникнув бо в житие святаго пахомиа, и се обрящеши тамо по многу, изряднее же о оном, иже две рогозине соделавшем на день в келлии своей особь, со гнилым помыслом и тщеславным усердием. Сие же и инии от отец мнози правым помыслом содеяша и научиша: опасство же многое предано бысть нам о сем от святых отец, яко да от праведных трудов и своего делания дневную пищу притяжем себе, и прочая нуждная потребная телеси. Господь и пречистая его мати, яже о нас управит.
Глава 45. О стяжании чуждих трудов.
Стяжание же чуждих трудов вносити каковолюбо, отнюд несть на пользу нам, и паче же яко страстнии, и душею немощнии приимати во обители: но яко яда смертоносна отбегати же и отгоняти, яже о таковых, от божественных писаний сочетахом, по разуму, егоже возлюбихом соглашающа и утверждающа иже по бозе таковый разум имущим, во едино собравшимся общебратство. главизны же законны, обдержны, а не смотрительны, или от части: яже бо от части, смотрительны, некоего ради слова содеянная, или глаголанная, не достоит восприимати во обдержная и законная свидетельства. сего ради яже от части, смотрительная в сих не сочетахом: но обдержная же и законная во всем списании сем сочетахом о господе, сего устава церковнаго уставления, и чина непреложнаго: в негоже вникающу настоятелю общаго братства, такожде и церкви начальнику всечастне вникающу во обдержную сию книгу: и по настоящаго разсуждению, всегда учреждается, и украшается церковное исполнение. Приложим же и сие к ведению, ибо мирское жительство, заповеди господни обещавается: иноческое же сих вящше. что же есть сие, еже умертвитися миру всему, и распятое житие восприяти, во время пострижения и повиновения своего, которыйждо монах Богу обещавается? обдержна бо заповедь и предание монашеское сие есть. и мы убо сия исповедуем и мудрствуем.
Глава 46. О больнице и странноприимстве, и о старых и больных.
Подобает игумену тщатися больным на врачевство, или в монастыре живущим, или страннопришедшим, в тяжких недузех скораго просящим исцеления. Аще приидет кто, абие недужнаго призирати, и подавати ему здравие: аще ли нерадети начнет, велика есть беда. но врачем убо в монастыре, якоже речено есть, быти, и потщатися: устроити же ему пластырь и масло, и ино еже подобает уготовати на тех издание от хранительника подаемое, да кто в требовании тех будет. повелит же игумен хранительнику всяко потребное даровати: прежде купити, и полагати мед, и грузити зелие сушеное, вино, сливы, смоквы, елико врачеви угодно. елики же суть в монастыре монахи, или бельцы, недугом одержими будут, вся убо зелия подавати им: игумену же убо начасте приходити к ним, и промышляти о больных, по врачевской воли, и потребная да повелевает даяти. Врачеве же всею хитростию подвигшеся, крепость и здравие страждущим да подавают. Аще ли кто странен и бездомок в гостинницу приидет, недугом одержимь, иже с недужными, от игумена и от врача да получит покой во всем: и повелит пребывати в недужном храме, дондеже устрабится: и тогда потребное на путь от игумена с молитвою приим да отпущен будет. Старым же, и всякия помощи не имущим, повелевает требованных насладитися, и одры тем равночислены поставляти на покой им: от нихже старец да емлет на всяк день потребная им.
Глава 47. О знамениях владычних, и богородичных праздников, и святых.
Подобает ведати, яко праздницы разделени суть на великия, средния же и малыя.
Велицыи убо праздницы христовы, и богородичны, и предтечева два: рождество и усекновение: и обоих верховных апостолов, петра и павла, имут знамения, крест окружен (+): имже бдение и вся служба праздника совершается по уставу.
Среднии же праздницы святых имут двема виды, крест с полукружием: (+ имже бдение совершается: прилагается же и канон Богородицы на Утрени по уставу: Друзии же крест един точию +: имже бдение не совершается. На вечерни, блажен муж, 1–й антифон: и на Господи воззвах, стихиры на 6: от произвола же на 8: и чтения 3, и на стиховне. На Утрени полиелей, и евангелие, канон на 8: и славословие великое: и прочая служба по уставу.
Малии же праздницы имут двема виды три точки несовершенно окружены. Красен убо вид имущим (:.. На вечерни кафисма обычная: на Господи воззвах, стихиры на 6. На Утрени канон на 6, и славословие великое: и прочая служба по уставу. Черн же вид имущим (:.: точию на Господи воззвах, стихиры на 6: на Утрени канон на 6. На Литургии по чину устава. Не имущим же знамения, стихиры на 3: канон же на Утрени на 4.