Глава 27. О канонарсе.
Подобает ведати, яко должно есть канонарху по еже творити поклонение, и начати канонархати, ожидати конца стихиры, и тогда творити поклонение равно вкупе с братиями: И в другую страну отшед, и тамо творит такожде. На конечный же стих: яко утвердися милость его на нас: егда начинается стихира, собираются оба лика насреди равно, ни единому предходящу, другому же на месте стоящу, или единому поклонение творящу, другому же небрегущу: но вкупе собравшимся обема ликома по обычаю своему, и ставшим отсюду и отонуду. И канонарху посреде стоящу, творит благочинно всем поклон. Такожде и оба лика творят поклон, яко от единаго телесе изсылающе купно, равне и благочинне, не преклоняюще колена, но выю свою со благоговением, и воздвизающе повышше глас, и поюще: яко утвердися милость его на нас: Слава, и ныне, богородичен, подобен гласа стихир минеи. По скончании же, паки всем с канонархом сотворшим поклонение, и на своя места отходящим, равно и благочинно поступающе, тойже канонарх прокимен поет, и аллилуиа, откровенною главою, и должен есть ожидати, дондеже совершится прокимен, и аллилуиа: и тогда поклонение по обычаю творит. Такожде, и на стиховну подобает всем сходитися на среди, и сотворше равно поклонение, поют стиховну стихиру, ожидати же канонарху подобно, якоже и прежде. И скончавшуся богородичну, такожде творит поклонение, и на место свое отходит. Подобает же ему покровенною главою канонархати, изряднее же, егда насреди стоит, благочиния ради.
Глава 28. О безчинных воплех.
Безчинный вопль поющих в церкви, не прияти того к церковному пению. Такоже и прилагаяй к церковному пению, не приятен есть: да извергутся сана своего, и паки в церкви да не поют. Подобает бо пети благочинно, и согласно возсылати владыце всех и господу славу, яко едиными усты от сердец своих: преслушающии же сия вечней муце повинни суть, яко не повинуются святых отец преданию и правилом.
Глава 29. О откровении глав.
Ведомо же буди, яко На Литургии открываем главы своя на входе, и на слышании святаго евангелиа, и на херувимской песни великаго входа, и на словеса Христова, и на Достойно есть, и на Отче наш, и во явление святых таин, и на входе на вечерни.
Глава 30. О еже не творити бесед в церкви.
Потребно есть ведати и сие братиям, еже не творити бесед, стоящим в лицех церковных: всяко бо и сие возбранено есть от святых отец: но ниже исходити кому, или входити, дондеже поставлено будет чтение. Не точию же, но ниже входити кому на место свое, егда поет лик, в немже стоит: Но егда начнет другий лик пети, тогда входит на место свое, творя поклон братии.
Глава 31. О еже како подобает имети будильника.
В великую четыредесятницу повелевает предстатель единому от братий возбуждати братию в церкви, иже на коеждо чтение, по еже почести мало чтущему, востает от своего места, и творит три поклоны насреди, и тако обходит братию молчя: и коегождо аще обрящет дремлюща, возбуждает его тихо: он же востав приходит в среду, и творит коленопреклонения 3, и к ликом по единому: и отшед сядет на месте своем. Сие же ныне не бывает, и во множайших уставех не обретается, мнится же ми, яко за леностное наше прилежание, и зане не терпим с любовию обличения, сего ради умолчано некиими. Тойже будильник и во все лето возбуждает братию по келлиам в церковь.
Глава 32. О велицей четыредесятнице, яже должен всякий христианин хранити.
Во святую и великую четыредесятницу, 1–я недели первый день, сиесть в понедельник, отнюд ясти не подобает, такожде и во вторый. В среду же по совершении преждесвященных, трапеза поставляется, и ядим хлеб тепл, и от снедей овощных теплых, дается же и укроп с медом. Не могущии же сохранити дву дней первых, ядят хлеб, и квас по вечерни, во вторник: Подобне же и старии творят. В субботы же и недели разрешаем на елей точию, и вино. В прочих же седмицах постимся, до вечера 5 дней, и ядим сухоядение, кроме суббот и недель: рыбы же во всю святую четыредесятницу никакоже дерзнем ясти, кроме праздника благовещения пресвятыя Богородицы, и недели цветоносныя. В пяток 1–я недели, и в среду великаго канона, и в великий четверток, аще нецыи уставы и повелевают на елей разрешати, но не творится за честность дней. В навечерие же праздника благовещения, прежде субботы святаго праведнаго лазаря, разрешаем на елей и вино. И аще монах святую четыредесятницу своим лакомством разорит, еже ясти рыбу, кроме праздника благовещения, и недели цветоносныя, то не причастится святых таин и на святую пасху: по друзии две недели покается, а поклонов на день, и на нощь 300.
о причащении христовых таин.
егда хощет кто причаститися святых христовых таин, подобает ему сохранити всю седмицу, от понедельника пребыти в посте, и молитве, и трезвости совершенной всеконечно, и тогда со страхом, и велиим благоговеинством приимет пречистыя тайны.
о помывании уст братий, причащающихся пречистых христовых таин.
Потребно есть и сие ведати, о помывании в храме причащающихся братий, якоже речеся: Достоит помывати уста в служебном: сице бо божественный златоуст повеле, вины ради плюновения. Бывает же сице: По приятии святых таин емлет брат антидор, и потребив и, и приемлет теплоты [оставльшия вливаемыя в божественную чашу] во уста мало, и пласкав поглотает, и уста помывает мало, и отирает платом чистым на сие устроенным над сосудом.
Во святую и великую неделю пасхи, и во всю светлую неделю разрешаем: монаси на сыр и яица и рыбы, мирстии же на вся.
от новыя же недели понедельника, по еже пети 3- й час, и 6–й, в чину их с междочасии, к сим же и обедницу: дается благословение братии, в понедельник, среду и пяток, во всю пятьдесятницу. благословение же мерити подобает, две онгии чисты паксимады (сухари), и то снедати точию подобает, и по отпетии 9–го часа совершенне ясти. Подобне и в навечерии рождества и богоявления господня, аще случится в субботу, и неделю. В неделю же сошествия святаго духа, бывает коленопреклонение на вечерни, и неделя тая разрешена ясти рыбы, сыр, и яица, и млеко: а миряном мясо, до недели всех святых.
Глава 33. О разрешении всего лета.
Подобает ведати: яко аще случится Христова рождества праздник, и святых богоявлений, в среду, или пяток, разрешаем на сыр и яица: миряне же на мясо. Аще ли случится рождество Богородицы, или сретение, или успение, в среду, и пяток, разрешаем на рыбу и вино. Праздник же преображения и введения, в кой день ни случится, разрешаем на рыбу и вино, и ядим дважды днем. благовещение же, в кой убо день будет святаго поста до недели цветоносныя, разрешаем на рыбу и вино, ядим же единою днем, кроме субботы, и недели. В великую же неделю, аще случится до великаго четвертка, разрешаем на елей и вино. В великий же пяток, на вино точию. Праздник же предтечев, рождество и святых апостол петра и павла, и возлюбленнаго Иоанна богослова, аще случится в среду и пяток, ядим рыбу, и пием вино, дващи днем. На воздвижение честнаго креста, и на усекновение предтечи не ядим рыбы, но елей и вино пием, и в вечер ядим без рыбы же, овощие от гроздия, или что Бог дарует от таковых. В дванадесятих же днех по рождестве христове, и в седмице пред мясопустом, и седмицу светлую и седмицу 8–ю, разрешают монаси на сыр и яица, мирстии же на мясо. В седмицу же сырную, разрешают монаси и мирстии на сыр и яица. В среду же и пяток, в девятый час, единою днем. В средах же и пятцех, всея пятьдесятницы, елей и вино, кроме среды преполовения, и среды отдания пасхи: В та бо два дни разрешаем на рыбу и вино. Нецыи же разрешают и в прочия.
[Смотри] Подобает ведати: яко в пост святых апостол, и Христова рождества, во вторник, и четверток, рыбы не ядим, но елей и вино точию. В понедельник, в среду и пяток ни елеа вкушаем, ни вина, но постимся до 9–го часа, и ядим в тыя дни сухоядение. В субботы же и недели, ядим рыбы. Аще случится святый во вторник, или в четверток имеяй славословие, ядим рыбу: Аще в понедельник, подобне. Аще среда и пяток, разрешаем на елей и вино точию: ядим же единою днем. Аще ли святый имеяй бдение, в среду, или пяток, разрешаем на елей и вино и рыбу. Аще ли случится память святаго, егоже есть храм, в среду, или пяток, творим подобне.
о посте пресвятыя Богородицы подобает ведати:
В пост святыя владычицы нашея Богородицы успения, 15 дней кроме преображения Христова, постимся до 9–го часа дне: понедельник, среду и пяток, сухо ясти: и творим коленопреклонение, даже до причащения. Во вторник и четверток, варение без елеа. В субботу же и неделю, варение со елеем, и вино пием: рыбы же не ядим, до успения пресвятыя Богородицы: но токмо на преображение христово, ядим рыбу, дважды днем.
о взаконеных постех, яже соборная церковь предаде православным христианом, (святых апостол правило 69.)
Аще кто епискп, или пресвитер, или диакон, или чтец или певец, святыя великия 40–цы не постится, и всякия среды и пятка всего лета, кроме немощи, да извержется, людин же да отлучится.
Сказание. Зри, яко правило святых апостолов, святую четыредесятницу, и всякую среду и пяток всего лета, равно законоположи пост, якоже во святую 40- цу ядим, такожде и в среду и пяток всего лета, кроме немощи и праздника. Глаголет бо правило: яко не постяйся в сих, священник убо извергается, мирский же отлучается от причащения на время.
Глава 34. О житии общежительнаго пребывания.
Вкратце и о нужнейших потребах, достоит смотряти настоятелю обители, и разсуждати неизменно предания святых и богоносных отец, и начальников общаго жития, о ястии и питии, якоже усмотрися: учими есмы от устава святыя горы, о малых праздниках, якоже глаголется тамо, пети Бог господь. О ястии же и питии, якоже прочии праздники не разрешают, ниже паки яко постныя сия отдавают. Сия же подобает, егда случится день постен, и мал праздник: владычния же сия и великия службы, рекше Христова рождества, и богоявления, и великаго четвертка, и великия субботы, ин образ службы имут.
Глава 35. Разсуждение о ястии и питии,
субботы и недели, и прочих дней седмичных, и о трапезном устроении всем.
В неделю, и господския праздники, подобает ясти три ядения, вечер же два: в прочия же дни седмицы во вторник, четверток и субботу, два: вечер же едино. Достоит же убо сие ведати: яко служай в трапезе братиям, должен есть ударяти в било, или кампан, и собиратися всем в трапезу, и глаголати псалом 144: Вознесу тя Боже мой, царю мой: Сему же исполншуся, и ядению готову сущу на трапезе, глаголет иерей молитву трапезы: Отче наш: И благословляя настоятель глаголет: Христе Боже, благослови ястие и питие рабом твоим: и прочая. И седает кийждо на своем месте по чину, со благоговением и молчанием, начинати же абие чтущему предисловие чтения, егоже хощет чести. Таже настоятель, или чредный иерей благословляя глаголет: молитвами, егоже чтение есть. И тако чтет чтец. И бывает ядение с молчанием, и вниманием ту сущаго чтения. На коеждо же послужение предлагаемых, настоятель ударяет в кандию или звонец: и всем воставшим служай глаголет: Господи благослови. Настоятель: Слава тебе Христе Боже, упование наше, слава тебе. Чтый же должен есть чести, дондеже воздвигнет пресвятую служай. Зде же обычай имамы, диакону сия действовати: егда же престанет чести, тогда шед станет конец трапезы братския, зря умиленне к настоятелю, и руце согбенне имея при персех, и велегласно возопив, но не безчинно, глаголет: отцы святии, простите мя грешнаго. И пад приклонится до земли. И приим молитву и благословение, востает. Трапезе же совершившейся, настоятель ударяет в кандию, и всем воставшим, абие глаголют благодарение. И воздвизает пресвятую по обычаю, яко предписася в службе воскресной. А идеже панагии чина не бывает, воставше глаголют: благословен Бог милуяй и питаяй нас от юности нашея: Слава тебе Господи: благодарим тя Христе Боже наш: Таже, Достойно есть: Слава, и ныне: Господи помилуй, трижды: благослови. Настоятель глаголет: благословен Бог милуяй и питаяй нас от своих богатых даров: Исходящу же ему из трапезы, трапезарь со служители падает пред ним, прося прощения. И настоятель глаголет: Бог да спасет и помилует послуживших нам. И тако братия исходят из трапезы в келлии благочинно и немятежно, творяще метание настоятелю. Сей убо устав суббот, и недель, и праздников, и дней седмичных, кроме 50–цы, во все лето держати и соблюдати лепо есть. Вино же, аще прилучится, не достоит датися по уставу во ин день, но в неделю, или в господския праздники, или в другая нуждная утешения: черпати же тогда потребно есть во все лето на таковыя, по единой чаши, или по две, или множицею по три, и ино ничтоже. Две бо, или три чаши, не по уставу рекохом, но по нужди бывати. И паче аще случится, якоже рехом о триех послужениих, в неделю, или в великия праздники, елма якоже в снеди два послужения, подобаше имети устав, многажды же и едино. Сице и в вине две чаши, множицею же и едину имети, устав. Аще случится и во уреченныя дни, якоже рехом всегда, якоже и великий симеон чудотворец глаголет: яко похвала монаху, еже не пити вина. Аще ли и пиет немощи ради тела своего, мало да испивает. Подобно же и великий пимен отец наш глаголет: яко вина отнюд не подобает пити монахом. Сего ради и во ин день прост, кроме недели, немощи ради нуждныя некия, по словеси святаго симеона, мало нечто подобает пити врачевания ради: и аще и есть, не дается на всяк день, якоже божественная правила повелевают. Аще ли прилучится в сих днех сыр, или яица, или рыба, ясти достоит, а не пещися: часть же сыра мерити подобает комуждо, подаяти братиям онгия, и пол другия. Такожде и масло мерою уставленою да влагается в коеждо варение. Сему уставу подобает быти всегда, егда ядят сия обоя. Аще ли некое утешение от некоего христолюбива будет, и за еже не опечалити принесшаго, по нужди меру оставляти, и се паки, не без разсмотрения и безпечальне: но полезнейшее творити во славу божию. Аще ли не тако случится, всегда учиненныя дни, темиже мерилы и мерами, о сыре и масле, и прочими подобает питатися: и множицею аще мощно есть, сия и умалити и умножити достоит, якоже убо и великий василий во своих постных писаниях объяви, рек: яко прикасатися убо комуждо лепо есть времени некогда случившуся, елико показовати ту сущим же и зрящим, и сия убо тако. И сим убо уставом о сыре, и масле, и вине, всего лета, по мере и по правилу творитися подобает, якоже и божественнии отцы наши завещаша, глаголюще: яко вся мерою и правилом. Подобне же и святый ефрем глаголет: яко велика беда, идеже законнии правила не жительствуют. Рцем же по чину: По скончании убо святыя 50–цы, рекше, от всех святых даже до святых апостол, во вторник и четверток, едино варение достоит ясти без масла, в 9–й час: и ино сухоядение. В понедельник, среду и пяток, сухоядение ясти подобает, хлеб и воду, и сим подобная. В субботу и неделю, два ядения подобает ясти, паче же аще обретаются и рыбы. И егда варение ядят, подобает и ино ядение с ним ясти: яко да будут с ним послужения два. От святых же апостол, даже до поста пресвятыя Богородицы, во вторник и четверток, два ядения подобает, дважды днем: в среду же и пяток, в 9–й час ясти единожды, по преданию святых отец. якоже и святый чудотворец симеон вообрази, глаголя: яко да постится монах не мнее 9–го часа. Подобне же и в житии преподобнаго отца нашего пахомиа, глаголет ангел: по преданию общежительному, яко в 9–й час. И егда хощут ясти, творити молитвы три.
И о вторей же трапезе мало подобает изрещи: По востании же братии от трапезы, да будет и второе ядение, да предложится брашно, якоже и на первой трапезе, да ядят трапезарь и чтец, и прочии служители. Подобает же и сие ведати, яко ни единому достоит поне мало укруха взяти от трапезы, или иному даяти, или во свою келлию нести. Но никто от братий да просит во свою келлию хлеба, или сочива, или варива, или овоща, или ино что тамо имети: но все обще да ядят. Аще ли кто немощи ради приити в трапезу не возможет, таковому, по повелению настоятеля, дати в келлию его все. Аще ли кто послан быв коея ради потребы, и умедлит приити с братиею на трапезу, дадят и тому: но в трапезе да яст. Ни единому же, по реченному образу, буди леть в келлии ясти: се убо отнюд отрицаем. По вечерни же ударяет в било трижды, и входят братия в трапезу. Вечери же ради, ничтоже варити подобает, не студеное же его ядят, но тепло, от обеда до вечера соблюдено: Да будет углие на огнищи, и на нем сосуд глинян станет до вечера, и тако сочиво тепло будет, и без вреда и сладостно, на вечери же поставится. Вшедше же братия в трапезу, и речет келарь велегласно: Господи благослови, и помолися. Таже настоятель ударит в кандию, и глаголют: ядят убозии и насытятся, и восхвалят Господа взыскающии его, жива будут сердца их в век века. Слава, и ныне: Господи помилуй, трижды. благослови. Настоятель речет: Христе Боже, благослови ястие и питие рабом твоим: яко свят еси всегда, ныне и присно, и во веки веков. Аще есть утешение: черпают пития по две чаши, по образу, иже на обеде. По вечери же востав от трапезы, келарь речет: молитвами святых отец наших: Мы же речем: Аминь. Слава, и ныне: Господи помилуй, трижды. благослови. Таже: Бысть чрево твое святая трапеза, имущая небеснаго хлеба, Христа бога нашего, от негоже всяк ядый не умирает, якоже рече всех богородительнице питатель. Таже: честнейшую херувим: И посем: Возвеселил ны еси Господи в творениих твоих, и в делех руку твоею возрадуемся: знаменася на нас свет лица твоего Господи: дал еси веселие в сердце моем, от плода пшеницы, вина и елеа своего умножишася: в мире вкупе усну и почию: яко ты Господи единаго на уповании вселил мя еси. Слава, и ныне: Господи помилуй, трижды. благослови. Настоятель глаголет: С нами бог, своею благодатию и человеколюбием всегда, и ныне и присно, и во веки веков, аминь. И исходяще из трапезы кождо в келлии своя, творят метание настоятелю.
Глава 36. О молчании на трапезе.
Многу же опасству подобает быти, еже не проглаголати никомуже на трапезе отнюд каковолибо слово, кроме стиха и чтения: егда же нужды время приключится, настоятелю должно есть проглаголати единому точию, или служащему трапезе, но со щадением и благоговением.
о сочиве же и овощии.