Ağılmandə odəmon bə çəvon sıxanon qorə bəzınen, sıxanon bə odəmon qorə ne.
Har xonəxo ıştə sıxani jiədə niyon bıə.
Əli əmirəlmominini votəşe:
"Har kəs ıştə zıvoni jinton niyon bıə"
Sıxan heste əy curiy bıvotoş odəmi rufi obəlovnie, həmonə sıxani co curə bıvotoş odəmi dıli barışte.
HIkoyət
Votedən ki, i kərə Harun ər-Rəşid hanədə vindedə ki, dandononış həmə ru bıə. Çəy maştə han ovıjqıniəkəson doedə vanq kardey, parsedə ki, çı hani məna çiçe?
Han oəvıjqın votedə ki, Əmirəlmominini umr dıroz bıbu, ıştı həmə oroğ-toroğ ıştısə rə bəmarde, tı coyli bəmandeş.
Harun ər-Rəşid əmr doedə ki, bı han oəvıjqıni sa veyz jə bıbu. Bə səbəb ki, jıqo bədə xəbəş bə çımı dim vote. Həmə ğom-əğrobonım marde bəpeştə az bə ki lozimim?
Əmrış karde co qıləy han oəvıjqınışon varde. Haruni həmonə hanış bəy qəp jəy. Əy votışe çe Əmirəlmominini vində hani məna əve ki, Əmirəlmominin ıştə həmə ğom-ğəbiləsə vey umr bəkarde. Harun ər-Rəşid vote: «Çe ağıli hıkm i curəye. Təbir həmonə təbire. Əncəx ibaronədə fərğ heste.»
Əmrış karde bə merdi 100 dinar bıdən.
Voteyım əve ki, bəpe bə ıştə sıxani navi-dumo fik bıdəy, ıştə votəy ğəşənqə tərzədə bıvot ki, həm ıştı sıxani dərəsın, həmən ıştən sıxan dəərəs bıbiy. Ehanə ıştən ıştə votə sıxani dərəsedənişbu, bəvədə ıştı de tuyəkijə (tutuquşu) fərğ çiçebu?
Əvən sıxan kardə, əncəx ıştə votəy dərəsedəni.
Sıxani yol hisob bıkə.
Əv osmono emə.
Çəy ğədi bızın.
Vırəş oməbu, sıxani bıvot – oməqət, həyfe.
Əncəx bə vırə enıqıniə sıxani ıştə qəvo beməroxın, sıxani çe ğırbo eməğand, bə hıkməti zılm məkə.
Har çi votedəş, rosti bıvot.
Bo beəsosə mıddəon sıbut kardey məşğul məbi.
Iştə nızınə çiyon məvot, bə nızınə elmon sə məjən, çəyku ıştı nun əvo ni.
De ıştə nızınə çiyon bə mətləb rəsey nibəzıneş.
Hikoyət
Votedən ki, qıləy jen Xısrovi (Ənuşirəvan) devrədə Buzurcmehri (çəy vəzir bıə-C.Ə.) paylo omedə ki, qıləy sıxan xəbə bıqətı. Çe Buzurcmehri sə bəvədə ğal bıeyro bəy votedə: «Jenə, az ıştı ın parsi cəvobi zınedənim».
Jen votedə: «Ehanə zınedənişbu, çıro çəmə hıkmdori nuni hardedəş?»
Buzurcmehr votedə:
«Hıkmdor bə çımı zınə çiyon xoto bəmı nun doedə, bə çımı nızınə çiyonro əv bəmı çiç doənine? Piyedə bışəmon çəy ıştəniku bıpars».
Əncəx koonədə ıştə həddi bızın, bə ifrat məşi. Cəhd bıkə, miyonə movqe bıqət. Çəmə şəriəti sohibi votəşe:
«Çe koon xəymandi miyonədə bıə qıləye».
Bo sıxan votey, bo ko qətey tadi məqət, dastpoçə məbi.
Bəmı qon lıveyro tənə bıjənon əfzəle, nəinki bo cinqənətiro tərif bıkon.
Sırpuş bıbi. Sırrı bə kəsi votebu, əy həni sırr hisob məkə.
Çiç bıvotoş, jəqo bıvot ki, həmə kəs çəy rost bıey təsdığ bıkə.
Sıxanə uston tono ğırbinən bıboş, bo hiç çiy şohid mandey rozi məbi. Şayət mandənin bıboş, veyən confəşonəti məkə, de ıştə ray şohidəti məkə.
Har votə sıxani bıməs, əncəx bo əməl kardey tadi məqət.
Çok-çoki bıfam, peşo sıxani ıştə qəvo bekə, səbin bəy ki, pəşmon bəbıeş. Navbənav faməy zıney bo ıştə vərdış bıkə.
Bo tı bırəvioən, nırəvioən – tosə orəx bə sıxani quş bıdə, bıdə sıxanon kəybə bo tı heqo oj bıbu.
Sərin-sərini hiç vaxt qəp məjən, çun boçi, dışmenəti bəvarde.
Alim bıboş, ıştəni nodon hisob bıkə, bıdə zınəyon kəybə bə ıştı dim oj bıbu.
Çanə ki, çe sıxani aybi, yaən çəy reçinəti dərəsəniş, sıxani məbır. Bəy nə tərifat bıdə, nəən bə çəy bevəci bıvot.
Piyedəşe yol bıbu, piyedəşe ruk – de har kəsi de çəy zıvoni sıxan bıkə, quşədon ıştəku bezo məkə.
Əncəx bə ıştı votəyon sıbut-dəlil bıpiyoşone, bəpe curiy bıkəy ki, əvon rozi bımandın, çəvonku de səğ-səloməti ıştə coni peroxnış.
Ehanə tı sıxani lap ustoən bıboş, ıştəni buruz mədə, bıdə sehbəti vaxti ıştı piyodə bıey bə məydon benışu.
Veəzın iyən kaməvojə odəm bıbi, nəinki kaməzın əmmo veyəvoj.
Votəşone ki, tam jəy səlomətətiye, vey sıxan kardey ısə boy beağılətiye.
Çanədəən ağılmand, momin, sofə odəm bıboş, şəvloyı taniku enıqını, çun boçi, bə ıştı ıştəni tərif kardey bovə əkə nibəbıe. Bıdə xəlğ tıni tərif bıkə.
Veən zınedəşbu, cəhd bıkə ki, ıştə zınəyonədə foydəyn kome, əy bıvotış. Ki, bənə Zəncanıjə ələvi bə ıştı səən ədovət nıvo.
Hikoyət
Votedən ki, Sohibi devrədə Zəncanədə qıləy piə merd hestbe. Im merd çe rəhmətmandə Şafei nəslikube ki, yolə nomışon hestbe. Iştən mıfti, vaiz, çe dini xadimən bıbo, çe ğazi mışovir ko kardedəbe. Çe Zəncani rəisi zoəən ələvibe, yəne çe Əli əmirəlmominini nəslikube. Iştənən həm vaizbe, həmən çe ğazi tono mışovir ko kardedəbe. Imon har dıynəən minbəriku i yəndı bevəci əvotin, bə yəndı ədres nımandə sıxanon əkəyn. Rujiy çe rujonən ın ələvi votışe ki, həmonə piəmerd kofire. Xəbə ome rəse bə piəmerdi. Əvən minbərədə votışe ki, çe rəisi həmonə zoə həromzodəye.
Rəisi zoə ın xəbə məsəcəğın bərk əsəbin bıe, ıştəku beşe, beşe şe bə Rey, bə Sohibi ğəbul.
Bə Sohibiş vote ki, şımə devrədə hiç caiz ni ki, bə səyd-peyğombəri avlodi hərəmzodə bıvotın.
Çe piəmerdi hərəkət bə Sohibi çoçin çiye, ğasidış vığande bə Zəncan ki, əy biyə bə çəy huzur.
De səydon, uləman iştiraki məhkəmə soxteşone.
Sohib əyo piəmerdiku parse:
– Bəmı diyəkə, Şıx, ıştən tı çe Şafei (Xıdo əy rəhmətkə) imomon odəmonədəş, alimiş, i lınqı ıyoye, i lınqı qurədəye. Bə ıştı kon vırə dəbame ki, bə peyğəmbəri avlodi həromzodə nom bınəy? Madam votə, ısə boy ıştə sıxanon sıbut bıkə. Sıbut nızınoş kardey, bətı çəmə şəriəti nəzərdə qətə jəqo qıləy yolə cəzo bədoem ki, bo əmandənion dərs bıbu, çı ğələtiku həni hiç kəs nıkə.
Piəmerdi votışe:
– Çımı sıbut heqo çə ələvi ıştəne. Çımı zınəyku əv həlolzodə iyən sof qıləy xonəxoye. Əncəx bə ıştə votə sıxaniro həromzodəye.
Sohib parse:
– Im votəyon çoknə sıbut bəkaş?
Piəmerdi votışe:
– Həmə Zəncan zınedə ki, çəy moə de çəy pıə kəbin mı bıriəme. Əncəx əy minbərədə votəşe ki, az kofirim. Ehanə əy dılısıxt ımış votəbu, jəqoədə kofiri bıriə kəbin hərom bıeyro, çəy ıştən sıxanon səkıştə ıme ki, əv həromzodəye. Ne, şayət dıliku votedənibu, bəvədə duəvoje, bəpe tənbeh kardə bıbu.
Peşo piəmerdi əlavəş karde:
– Har holədə ya duəvoje, yaən həromzodə. Oxo peyğəmbəri avlod duəvoj əbı ni. Votеyım əve ki, çı dıqlə sifətonku qıləy bəpe ğəbulkəy – bıpiyoən, nıpiyoən.
Hamonə cıvoni ranqış doe – ranqış se, nızıneşe çiç bıvotı. Yəne ıştə votə sıxanon cəzoş kəşe.
Çımı balə sıxan əkə bıbi, əmmo hıccət əkə məbi.
Hıccət kardey bənə divonəti qıləy çiye.
De har ki ki, həmsehbət bıedəş, fik bıdə bin əv ıştı sıxanon mıştəriye, ya ne.
Ehanə ruəninə mıştəri pəydokoş, çəy yəxəku dast məkəş, ıştə sıxanon bəy bə çokə ğıymət bəhəvat.
Ne, şayət mıştəri nibu, ıştə sıxani dəqışkə, çəy məsey piyə mətləbonku qəp bıjən ki, vəomoyədə bıdə ıştı mıştəri bıbu.
Cəhd bıkə ki, de odəmi odəm bıbi, de insoni inson. Çun boçi, odəm coye, inson co.
Çe ğəfləti hano beşəkəson de məxloği bənə çımı votəy rəftor kardəninin.
Çanə zınedəş, sıxan bıvot – sıxan bıməs. Çun boçi, bo sıxan kardey zıneyro, bəpe sıftə sıxan bıməsiy.
Timsal: Ehanə qıləy əğıli çəy moəku esındınon, zindonədə oqəton, çəy şıti, hardi, ovi vaxtədə bıdon, əy zindonədə yol bıkon, əncəx hiç kəs de əy i kəliməən sıxan nıkardo, əv çe hiç odəmi sədo nıməso – sıxan nibəzıne kardey, yəne çəy qəv sıxan nibəqəte. Əncəx həmonə əğıli ijən oqordınoş bə cəmiyəti dılə, mıəyyən vaxti bə çəton ijən zıvon okardey bəzıne.
Co qıləy sıbut: Məqər fikı doəni ki, korə odəmon həmən lolin?
Çımı balə, az molyətinə iyən nadirə sıxanonku yodədəm mandə qılon ın kitobədə nıvıştedəm ki, ın sıxanon çe əcəmi şahon şah Nuşirəvan Adil podşo zıvono beşə. Tı əvoni bəpe omutiy iyən bə əvon əməl bıkəy. Çun boçi, əmə çə şahon nəslədəmon.
Mı handəme ki, xəlifə Məmun (Xıdo əy rəhmətkə) bo Ənuşirəvani məğami ziyorət kardey şəbe. Çəy dəxmədə vindeşe ki, Ənuşirəvani astonən pıxən peqardən bə zəmin. Çəy taxti səpe, məğbərə divoədə pəhləvi zıvonədə de ğızıli i-dı satıl nıvıştəy hestbe. Məmuni pəhləvi zıvoni zınə tərcuməəkəonış doe vakarde. Əvon həmonə satılon bə ərəbişon peqordınie. Ərəbi tərcumə ısətən əcəmədə məşhure.
Əyo nıvıştə bıəbe: «Çanə ki az səğbim, bə Xıdo bandon həməy koməqım ərəsiy, jəqo odəm nəbiy ki, bə çımı kəybə bo, çəyo təyliə dast oqardı. Çe əcəli vədə ociz mandeədə, ın nəsihətinə sıxanonım bə ıştə məğbərə divom doe nıvışte bə səbəb ki, odəmon zəhmət bıkəşon, bə çımı ğəbi ziyorət bon, bıdə çıyo təyliə dast onıqardın, ıyoən çımı mərhəmətiku bəhrəmand bıbun.»
Hamonə nəsihətə sıxanon ımonin.
Həştminə fəsl
Adilə Nuşirəvani nəsihəton bə yod dəğandey həxədə
Sıftə votəşe:
˝Çanə ki şəv-ruj yəndı əvəz kardedə, bə ıştə udimiyən (tale) çoçinə qardışon təəccub məkə.˝
İjən votəşe:
˝İnsonon çıro bə ıştə pəşmon bıə koon i kərəən pəşmon bıbun?˝
Çəyo votəşe:
˝De podşo oşıno əbı çıro ıştə kədə rohət hıtedə?˝
Çəyo votəşe:
"Umri bənə ıştə piyəy nıjiyə odəm çıro ıştəni diri hisob kardedə?"
Çəyo votəşe:
"Şəxsiy ki, bo tı ˝fılonkəsi ıştı bevəciş vote˝ – xəbə bıvardo, ə folınkəsi rə bıbaxş, nəinki ın xəbə əvardi."
Çəyo votəşe:
"Befoydə bə sıxonon quş doə odəmi sə hətta səbəsəloməti ğəbul kardə odəmi səysə vey bədije."
Çəyo votəşe:
"Bə ziyon dəşə odəmonsə əy vey ziyonəkəş hisob bıkə ki, bini de ıştə çəşi ıştə ziyoni vindedə."
Çəyo votəşe:
"Ə ğuli ki həvatedən, sedən – ozodətiş veye, nəinki ıştə ləvə ğul bıə odəmi."
Çəyo votəşe:
"Ə şəxsi ki, elmış bıbo, ağlış nıbo – elm bə çəy sə bəlo bəvarde."
Çəyo votəşe:
"Şəxsiy ki, jimoni ıştəniku dərs sey zınedəni, co mıəllim bəpe bəy dərs nıdə, çun boçi, zəhmətış hədər bəşe."
Çəyo votəşe:
"Har çiy nodoniku hifz kardey hostone, nəinki nodoni ıştəni çe nodonətiku."
Çəyo votəşe:
"Bıpiyo xəlğ tıni tərif bıkə, tınən xəlği tərifkə."
Çəyo votəşe:
"Bıpiyo ıştı bo xəlği sərf kardə zəhmət hədər nışu, xəlği bo tı sərf kardə zəhməti bə lınq-ləğə məjən."
"Bıpiyo dustonı kam nıbu, bılxoqət (kinli) məbi."
Çəyo votəşe:
"Ve pərişon bıe piyedənibu, pəxıl məbi."
Çəyo votəşe:
"Bıpiyo, tıni rəncidə nıkən, bə ıştə rəvo nızınə çiyon bə co kəsiyən rəvo məzın."
Çəyo votəşe:
"Bıpiyo asudə umr bıkəy, bə hadison uyğun hərəkət bıkə."
Çəyo votəşe:
"Nıpiyo bətı divonə bıvotın, bə pəydo nıbıə çiyon sorəx eməqın."
Çəyo votəşe:
"De həyo-abru jiyey bıpiyo, xəlği beabru məkə."
Çəyo votəşe:
"Bıpiyo ki, tıni bə dast dənığandın, nimə ko bənə təmomə ko bə ğələm mədə."
Çəyo votəşe:
"Bıpiyo ıştı sırri səpe onıbu, xəlği sırri oşko məkə."
Çəyo votəşe:
"Bıpiyo ıştı peştono bo tı rışxand nıkən, de ıştə koəkon mıloyim rəftor bıkə."
Çəyo votəşe:
"Bıpiyo ki, pəşmon nıbuş, bə ıştə nəfsi tabe məbi."
Çəyo votəşe:
"Zırək bıe piyedəbu, co kəson ovəynədə bə ıştə diyə bıkə."
Çəyo votəşe:
"Bıpiyo ki, əmonədə bıjiy, bə xəlği bevəci məkə."
Çəyo votəşe:
"Piyedəbu ıştı ğədi bızının, co kəson ğədi bızın."
Çəyo votəşe:
"Bıpiyo ki, bə ıştı votəy diyə bıkən, ıştən bə ıştə votəyon əməl bıkə."
Çəyo votəşe:
"Bıpiyo ki xəlğ tıni ağılmand hisob bıkə, bə axməxə odəmi sırr mədə."
Çəyo votəşe:
"Bıpiyo ki, bə xəlği çəş çok bıçiy, nun-nemek ədə bıbi."
Çəyo votəşe:
"Oxo, çıro ə odəmi dışmen hisob nıkəy ki, bini xəlği rəncidə karde iqidəti hisob kardedə?!"
Çəyo votəşe:
"Çıro ə odəmi dust hisob bıkəy ki, bini de ıştı dışmeni dustəti kardedə."
Çəyo votəşe:
"De befərəsatə odəmi dustəti məkə, çun boçi, əv nə bo dışmenəti bə vəc bome, nəən bo dustəti."
Çəyo votəşe:
"Iştəni alim hisob kardə nodoniku duəro bınəv."
Çəyo votəşe:
"Ədolətin bıbı ki, koyı bə ədolətə məhkəmə enıqını."
Çəyo votəşe:
"Həx çanə telən bıbo, bəy tosə oxoy quş bıdə."
Çəyo votəşe:
"Bıpiyo dışmen ıştı sırri nızını, əy bo dusti oməkə."
Çəyo votəşe:
"Uci-uci əkə iyən bə xəlği yolə ziyan əjən məbi."
Çəyo votəşe:
"Çə odəmi ki ləyoğətış ni, əy diri hisob məkə."
Çəyo votəşe:
"Çəşdəğıl nıboş, besərvətən ərbobiş."
Çəyo votəşe:
"Hədərə məhır ki, hədərəən nıhəvatiy."
Çəyo votəşe:
"Bə tay-tuşon mıhtoc bıencə, bımardoş çoke."
Çəyo votəşe:
"Xəbisə odəmi nuni hardencə, bənə vəşi bımardoş çoke."
Çəyo votəşe:
"Iştə har faməy bə beetıboə odəmon məvot, əncəx etıboynə odəmonkuən nion məkə."
Çəyo votəşe:
"Bə ıştəsə bəyjiə odəmi mıhtoc mandey yolə mısibəte. Exrocə odəmiku komək piyencə, ruədə bıtasoş çoke."
Çəyo votəşe:
"Bo ın dınyo kulişiyə təvazoə xəbis bo ə dınyo kulişiyə təkəbburinə abidisə çoke."
Çəyo votəşe:
"Ən nodonə odəm əve ki, jinə mərtəbəku bə penə mərtəbə rost bıbu, əncəx əyən ji hisob bıkə."
Çəyo votəşe:
"Həni çəysəən bədtərə rısvoəti nibəzıne bıey ki, xonəxo ıştə nızınə çiy rost bıey iddo bıkə, peşo çəy du bə miyon bo."
Çəyo votəşe:
"Nağdi bə nısyə dəqış əkəsəən vey bə dast dəğandə bıə odəm nibəbıe."
Çəyo votəşe:
"Ən exrocə odəm əve ki, qıləy xonəxo bəy əjoş eqını, çəy bo dast qətey imkonış bıbu, əncəx imtino bıkə."
Çəyo votəşe:
"Bıpiyo ki, ıştı nom adilə odəmon restədə beşu, bətı tabe əbıə odəmon çok oqət."
Çəyo votəşe:
"Bıpiyo ki, ıştı nom nəcibə odəmon restədə beşu, ıştə tamə oqət, əy bə nez məhaşt."
Çəyo votəşe:
"Bıpiyo cəmat ıştı bevəci nıvotı, əvoni tərif bıkə."
Çəyo votəşe:
"Bıpiyo dılonədə ıştə vırə bıkəy, xəlği tono ğırbı bıbu, bə xəlği tərəf bıbi."
Çəyo votəşe:
"Bıpiyo məxloğ tıni bənə ğırbinə iyən bənə nıfuzinə odəmi bızını, bo ıştə məsləhət nızınə çiy bo hiç kəsi məsləhət məzın."
Çəyo votəşe:
"Bıpiyo bə ıştı dıli jıqo yarə nıqını ki, bini de hiç məlhəmi mıolicə kardey bıedəni, de nodoni bə hıcət dəməşi."
Çəyo votəşe:
"Bıpiyo ən çokə odəm bıbuş, xəlğiku hiç çiy bə kam məkə."
Oxoyədə votəşe:
"Bıpiyo zıvonı dıroz bıbu, dasti kırt bıkə."
Çe Adilə Nuşirəvani nəsihəton ımonin.
Çımı balə, bə ın sıxanon xor diyə məkə. Çun boçi, çımonku həm hıkməti bu omedə, həm hıkmdorəti, səbin bəy ki, ımon həm çe hakimon sıxanonin, həmən çe alimon.
Çanə ki, cıvoniş, omut. Piəmerdətiədə bımonı quş doey nibəpeye. Çun boçi, piə merdon jəqo çiyon bəzınen ki, cıvonon əvoni nibəzınen.
Nəvminə fəsl
Çe piəti iyən cıvonəti ğaydon həxədə
Çımı balə, cıvonən bıboş, piəmerdə ağılı bıbu. Votedənim ki, cıvonəti məkə, ıştəni bə dast sey zınə cıvononədə bıbi. Veyən mardə quşə bın məbi. Filosof Ərəstuni votəşe: ˝Cıvonəti çe cındoəti qıləy sorte.
De ağıli hərəkət bıkə. Çun boçi, zağarətiku, çıskətiku bəlo omedəni. Əncəx axmaxə koonku bəlo bome. Çanə fırsəte çokə cıvonəti bıkə, səbin bəy ki, ə koon həni piətiədə kardey nibəzıneş.˝
Çoknə ki, qləy piəmerdi votəşe:
˝Cıvonətiəədə de ğəm-ğussə famedəbim ki, piətiədə kinon mınışon nibəpeye. Həni zınedənıbim ki, hiç mı ıştənən əvonım nibəpeye.˝
Xıdolima, cıvon bim az i zəminBə şəv, bə ruj fikri-xıvət kardedəbim —Pi bim mıni nibəpiyen reçinon.Isət pi bəm, hiç koy bə vec vardedənim.Çanə cıvonən bıboş, izzətin bıbi, hiç vaxt Xıdo çe yod beməkə. Mardeyku arxayin məbi, çun boçi, mardey bə piəti, bə cıvonəti diyə kardedəni.
Bızın ki, oməbuş bə dınyo, kəynə ısə şəniniş.
Hikoyət
Qıləy şəhrədə qıləy derzi hestbe. Çəy dukun şəhəri dərvozə paylobe. Bə ğəbıston şə ro çı dukuni vəyku dəvardedəbe. Hamonə derzi divoku qıləy hımbəş bə mex pevoniəbe. Dərvozəku kəynə cənozə beəşiy, əy adətış kardəbe qıləy sığ şodə bə hımbə. Manq təmom bıeədə hımbə təy kardedəbe, sığon aşmardedəbe, məlum bıedəbe ki, bə manqi şəhərədə çand kəs bə rəhmət şə.
Ruji çe rujon derziyən eqıniedə mardedə.
Çe derzi mardeyku ənəxəbə bıə qıləy mıştəri omedə bə dukun, vindedə ki, kəybə bastə bıə.
Hamsiyəku derzi xəbə sedə.
Hamso votedə: «Eqınie bə hımbə».
* * *
Çımı balə, de ıştə cıvonəti fors məkə. İtaət kardedəbuş, ya kardedənıbuş – Yolə Ofəyəvoni hiç vaxt çe yodo beməkə. Çəyku bıpi ki, ıştı qınoon bıbaxşı. Bıtars ki, qınobəqıy hınqıfti bəşeş, derzi ğəzinə ebəqınieş bə hımbə.
Heqo de cıvonon əşt-nışt məkə, hakanə pionən bə yod biyə. Çəvonədəən bo ıştə dust bıqət. Çun boçi, kəynə ki, bə ıştə cıvonəti səbin curi xətoon bıkoş, ə pion tıni çəyku obəkırnien.
Çe pion zınəy cıvonon əzın nin.
Harçand bə pion peharış kardey çe cıvonon adəte, əncəx tı çəvonku məbi. Çoknə ki, pion cıvon bıeyışon piyedə, cıvononən, beşubhə, bə piəti rəse orzuədən. Əncəx ıyo qıləy ko heste ki, pion ıştə vaxtədə cıvonətişon dəvoniə, əncəx cıvonon pi bıeyən bəzınen, nıbıeyən. Əve, pion bə dast dəməğand, bəvon ğırb bınə, noloyığə sıxan məkə bəvon, çun boçi, cəvobışon vey qon bəbıe.